Afea te mau Evanelia i te papairaahia?

Te pahonoraa a te Bibilia

No nia i te mau faatiaraa ta te aposetolo Ioane i papai no nia ia Iesu, ua na ô oia: “O tei ite mata i te reira, ua faaite mai ïa, e e parau mau ta ˈna i faaite mai. Ua ite taua taata ra e e parau mau ta ˈna i parau, ia tiaturi hoi outou atoa.”—Ioane 19:35.

A papai noa ˈi o Mataio, Mareko, Luka e Ioane i te mau Evanelia, te ora noa ra te mau taata o tei ite mata roa i te mau tupuraa faataahia e ratou. No reira ïa, e nehenehe tatou e tiaturi i te mau Evanelia. Ia au i te tahi mau tuatapaparaa, ua papaihia te evanelia a Mataio i te area matahiti 41, e vaˈu ïa matahiti i muri aˈe i te pohe o Iesu. E farii ra te rahiraa o te mau aivanaa e ua papaihia te mau buka o te Papai Heleni Kerisetiano aore ra Faufaa Apî i te roaraa o te senekele matamua. Noa ˈtu no vetahi, ua manaˈo ratou e ua papaihia te reira tau matahiti i muri iho.

No te mea ua ite mata te mau taata ia Iesu a ora noa ˈi oia i nia i te fenua, ua ite ratou i to ˈna poheraa e to ˈna tia-faahou-raa, ua nehenehe ïa ratou e haapapu e mea mau te mau Evanelia i papaihia. Ahani te vai ra te tahi faatiaraa hape, eita e ore e faaite iho â ratou i te reira. Ua parau te orometua tuatoru o Frederick Bruce: “Te mea faahiahia, ua tiaturihia te pororaa ta te mau aposetolo i rave no te mea ua ite mata roa te taata i tei tupu. Aita noa ratou i parau ‘ua ite matou i tera mau mea,’ oia atoa, ‘mai ta outou i ite’ (Ohipa 2:22).”