Eaha mau na te Evanelia?
I TE tau Noele, i roto e rave rahi mau fenua, e faaroo te taata aore ra e faahiti ratou i te parau no te Evanelia. E parau matauhia teie, tera râ, ua hau anei to ˈna auraa i ta te rahiraa e manaˈo nei? E nehenehe anei te Evanelia e riro ei taoˈa maitai roa no outou iho e no te feia e herehia ra e outou?
Te auraa o te parau “evanelia,” e “parau apî maitai” ïa, e mea papu, e farii-popou-hia te hoê parau apî maitai eiaha noa i te oroa Noele, i te mau taime atoa râ. Teie râ, e ere te Evanelia i te tahi noa parau apî maitai matauhia. E parau apî maitai taa ê roa râ no ǒ mai i te hoê tumu otahi no nia i te hoê tumu parau papu. Inaha, e poroi teie ta te Atua i opua e faaite i te huitaata atoa nei.
Ua faahiti o Eugênio Salles, arii epikopo no Rio de Janeiro, i Beresilia, i te parau no teie parau apî maitai ia ˈna i faaue e: “E tia ia tatou ia ohipa ia au i te Evanelia eiaha râ ia au i te tahi mau tatararaa manaˈo.” Ua tano teie arii epikopo. Teie râ, no te ohipa ia au maite i te Evanelia, e tia ia tatou ia ite e eaha mau na te Evanelia. Nafea tatou e ite ai i te reira? E nafea te ohiparaa ia au i te Evanelia e tauturu ai ia tatou?
Eaha te Evanelia?
Mea pinepine te tiaraa o te Evanelia i te taa-hape-hia. I te matahiti 1918, ua haapopou te Apooraa hau a te mau Ekalesia o te Mesia i Marite i te Totaiete o te mau Nunaa tei moe i teie nei, mai te faaiteraa politita o te Basileia o te Atua i nia i te fenua nei e ua faˈi oia e ua “niuhia oia i nia i te Evanelia.” Aita roa ˈtu teie Totaiete i manuïa i te faatupu i ta ˈna tapao e paruru i te hau. Papu maitai, ua hape taua apooraa ra. Aita to te Totaiete o te mau Nunaa e tuearaa e te Evanelia.
I te mau matahiti i mairi aˈenei, ua faahiti te feia turu i te faatiamâraa faaroo i te Evanelia ma te haamarirau ore i roto i ta ratou mau tauaparauraa no nia i to ratou mau manaˈo no te tauiraa politita aore ra totiale. I to ratou na reiraraa, ua faahapa ratou i te Evanelia mau. Ua faataa te vea beresilia Veja e: “Ua haamata te Ekalesia Katolika i te turu i te basileia totiale, ma te haamoe i te mau hinaaro i te pae varua o to ˈna mau taata faaroo. Mea pinepine ua ite noa mai te feia o tei imi i te parau ra Atua i roto i te hoê oreroraa faaroo i te mau tatararaa parau no te patoi i te mau ohipa tia ore i te pae totiale.”
Ua riro te haamaitairaa i te oraraa aore ra te hoê tauiraa i roto i te mau faanahoraa politita, ei parau apî maitai no vetahi pae. Teie râ, e ere te reira te parau apî maitai, oia hoi te Evanelia. Ma te farii i te manuïa ore o ta ˈna ekalesia ia poro i te Evanelia mau, ua parau te hoê epikopo e: “Aita matou i haapao i te haapiiraa ˈtu i ta matou mau taata faaroo i te pae varua mai te mau matahiti 60 mai â, no te mea ua anoihia mai te paeau materia i roto i ta matou haapiiraa.”
Te faaite ra te hoê tumu parau i roto i te vea marite Time e ua atea ê atoa te mau Porotetani i te Evanelia. Te faataa ra teie vea e: “Aita noa te mau haapaoraa tumu i ore i manuïa i te haaparare i ta ratou poroi; tera râ, aita atoa ratou e papu faahou ra e eaha mau na teie poroi ta ratou.” Eaha hoi te poroi te tia ia ratou ia faaara? E eaha te Evanelia?
Te haapapuraa e eaha te Evanelia
Te faataa ra te hoê titionare (Webster’s Ninth New Collegiate Dictionary) i te “Evanelia” mai “te poroi no nia i te Mesia, te basileia o te Atua, e te faaoraraa.” Ua faataa-atoa-hia te parau “evanelia” mai “te hoê tatararaa o te poroi kerisetiano (te evanelia totiale)”; “te poroi aore ra te mau haapiiraa a te hoê orometua faaroo.” E tano anei teie mau faataaraa atoa? Eita, eita te reira e tano no te Evanelia. Ua niuhia te Evanelia mau i nia i te Bibilia; no reira, o te faataaraa matamua noa ïa o teie na faataaraa e toru o tei tano. Te faaite noa nei râ na faataaraa hopea e piti i te auraa o te parau “evanelia” mai tei matauhia i teie mahana.
Ia au i teie manaˈo, te parau ra te hoê titionare (Vine’s Expository Dictionary of New Testament Words) e i roto i te mau Papai Heleni Kerisetiano (te “Faufaa Apî”), “te faataa ra [te Evanelia] i te parau apî maitai o te Basileia o te Atua e o te faaoraraa na roto i te Mesia, e fanaˈohia na roto i te faaroo, ia au i te niu o To ˈna pohe taraehara.” Mea faufaa roa ia papu i te reira, no te mea ua taaihia te ite-papu-raa i te parau apî maitai mau e to tatou maitairaa i teie nei e to tatou oaoa no a muri aˈe.
Te poroi taa maitai
Mai ta te buka i faahitihia ˈtu nei e faaite ra, ua taai-piri-hia te Evanelia e o Iesu Mesia—inaha ua piihia na faatiaraa e maha a te Bibilia no nia i to ˈna oraraa, na Evanelia e maha. Mai te omuaraa mai â o to ˈna oraraa taata nei, ua riro te parau apî no nia ia Iesu ei parau oaoa. I to ˈna faaiteraa i te fanauraa o Iesu, ua parau te hoê melahi e: “Inaha hoi e parau maitai [oia hoi e evanelia] ta ˈu e hopoi mai ia outou nei, o te riro ïa ei oaoaraa no te taata atoa. I nauanei hoi i fanau ai te Ora no outou . . . oia hoi te Mesia ra o te Fatu.”—Luka 2:10, 11.
E paari mai te aiû fanau apî ra o Iesu e e riro mai oia ei Mesia i tǎpǔhia mai. E faaite oia i te opuaraa a te Atua no te faaoraraa, e pûpû oia i to ˈna ora taata tia no te huitaata nei, e faatiahia mai oia, e e riro mai oia ei Arii maitihia o te Basileia a te Atua. E parau apî maitai mau â teie! No reira, te poroi no nia ia ˈna e piihia ˈi te Evanelia.
I te roaraa o ta ˈna taviniraa poto i nia te fenua nei, ua faaite o Iesu i te itoito rahi i te pororaa i te parau apî maitai. Te taio nei tatou i roto i te Evanelia a Mataio e: “Haere atura Iesu na roto i te mau oire e te mau oire rii atoa, i te haapiiraa i roto i to ratou mau sunago, e te aˈoraa i te parau [apî] maitai o te [basileia].” (Mataio 9:35) Aita noa oia i poro ia maitai mai te taata. Te faataa ra o Mareko i te parau a Iesu: “Ua tae i te tau, te fatata mai nei te basileia o te Atua; a tatarahapa, a faaroo mai i te evanelia nei.” (Mareko 1:15) Oia mau, te feia o tei farii e o tei auraro i te parau apî maitai, ua ite ratou e ua taui te reira i to ratou oraraa.
I muri aˈe i te poheraa o Iesu, ua tamau noa ta ˈna mau pǐpǐ i te poro i te Evanelia. Aita noa ratou i faaite i te Basileia, ua faahiti atoa râ ratou i te parau oaoa e ua faatiahia mai o Iesu i te pae atau o te Atua i nia i te raˈi e ua pûpû oia i te faufaa o to ˈna ora taata tia no te huitaata nei. Na nia i to ˈna tiaraa taata maitihia e te Atua no te faatere i te fenua ei Arii o te Basileia o te Atua, e riro ïa oia ei Mauhaa na te Atua no te haamou i te mau enemi o te Atua e no te haamau faahou i te paradaiso i nia i te fenua nei.—Ohipa 2:32-36; Tesalonia 2, 1:6-10; Hebera 9:24-28; Apokalupo 22:1-5.
I teie mahana, te vai ra te hoê tuhaa ê atu i roto i te parau apî maitai. Ia au i te mau haapapuraa atoa o te tupuraa o te parau tohu, ua faateronohia o Iesu i teie nei, e te ora nei tatou i roto i te mau mahana hopea o teie faanahoraa o te mau mea. (Timoteo 2, 3:1-5; Apokalupo 12:7-12) Te fatata oioi maira te taime i reira te Basileia e ohipa ˈi i nia i te mau enemi a te Atua. Aita ˈtu ïa parau apî maitai aˈe!
E ite tatou i roto i te tumu parau i muri nei i te puairaa o te Evanelia. Ua tauturu oia i te hoê vahine o tei faatîtîhia i te peu tahutahu ino ia tiamâ mai oia. Ua tauturu oia i te hoê taata tei eiâ e tei mau i te auri ia ite i te oaoaraa. E e faufaa-rahi-atoa-hia outou—mai te peu e e faaroo outou e e auraro outou i te parau apî maitai.