E itehia te hau

E hinaaro te taata e ora i roto i te hoê ao e itehia ˈi te hau. Ta te mau tia faatere ïa i tamata i te haamau e tae roa mai i teie mahana. Ua manuïa ratou maa taime aita râ i maoro, ua tatamaˈi faahou te taata. E itehia anei te hau i te hoê mahana? E! E hiˈo anaˈe eaha te haapii mai i te hiˈoraa o Iesu.

Eaha ta Iesu e rave?

Te faaite ra te Bibilia eaha ta Iesu e fatata roa i te rave ia tupu te hau.

• “E topahia to [Iesu] iˈoa o . . . Huiarii o te hau. E aano noa ˈtu â ta ˈna faatereraa. E te hau aita e hopearaa.” (Isaia 9:6, 7) Ei Arii o te Faatereraa arii a te Atua, e haamau Iesu i te hau na te ao atoa o te ore roa e mou.

• “E faaora hoi oia i te taata veve o te hinaaro ra i te tauturu . . . e te taata aita e tauturu.” (Salamo 72:12-14) E faaohipa Iesu i to ˈna mana no te haamau i te parau-tia. E ore ïa te tamaˈi, te ino e te mauiui.

• “E ore te hoê nunaa e amo i ta ratou ˈoˈe i nia i te tahi nunaa. E ore atoa ratou e haapii faahou i te tamaˈi.” (Isaia 2:4) I raro aˈe i ta Iesu faatereraa, e haapii te mau taata atoa e nafea ia faatupu i te hau eiaha râ te tamaˈi.

No te haapii nafea Iesu e haamau ai i te hau e eaha te auraa no oe, a mataitai i teie video Eaha te Basileia o te Atua?

Eaha ta Iesu i haapii?

I teie mahana, e tauturu te mau haapiiraa a Iesu i e mirioni taata ia ora ma te hau. I roto i ta ˈna Aˈoraa i nia i te mouˈa, ua haapii Iesu i te mau aratairaa o te tauturu i te taata ia faatupu i te hau.

• “E oaoa te feia faatupu i te hau.” (Mataio 5:9) Ua faaitoito Iesu i ta ˈna mau pǐpǐ eiaha noa ia ore e tatamaˈi, ia faatupu râ i te hau.

• “Ia hau orua na mua e hoˈi mai ai oe e pûpû i ta oe ô.” (Mataio 5:23, 24) Ua faaitoito atu Iesu ia faaafaro oioi i te mau peapea. Ua haapii o ˈna e mea faufaa ia faatupu i te hau e te tahi atu no te fanaˈo i te auhoaraa maitai e te Atua.

• “A faaea i te haava ia ore outou ia haavahia.” (Mataio 7:1) Ua faaara Iesu eiaha e haava etaeta i te tahi atu aore ra e tiai ia rave vetahi ê i ta tatou iho e ore e rave. E tatamaˈi to muri mai. Ua haapii Iesu eiaha e faaino ia vetahi ê, e ‘faaore noa râ i ta vetahi ê hara.’—Luka 6:37.

Te faaohipa ra te taata na te ao nei i ta Iesu mau haapiiraa. I te mau vahi mea rahi te ino e te tatamaˈi, te haapii nei ratou ia faaafaro i te mau peapea ma te ore e riri, ia faaore i te hara e ia faaite i te here noa ˈtu mea ino te tahi atu.

No te ite nafea ta Iesu mau haapiiraa i te tautururaa ia vetahi ia ite mai i te hau, a taio i te tumu parau “Te hau noa ˈtu te tamaˈi e te faahuehueraa.”