E nehenehe outou e fanaˈo rahi atu â i te hau a te Atua
Ahiri oe i faaroo mai i te mau faaue na ˈu e; ua riro ïa to oe maitai mai te pape pue ra; ta oe utua mai te are moana ra.” — ISAIA 48:18.
1. Nafea tatou e nehenehe ai e fanaˈo roa i te hau a te Atua?
TE FEIA e haere tamau nei, i roto i te mau amuiraa, i te haapiiraa o te Bibilia e ravehia na roto i te ravea o teie nei vea, te ite mau nei ïa ratou i te faufaaraa o te hau ta te Atua e horoa mai nei, e te hinaaro nei hoi ratou i taua hau ra. Aita e feaaraa e te fanaˈo nei te rahiraa o ratou i taua hau ra. Teie râ, aita te taatoaraa e fanaˈo roa nei mai ta ratou e nehenehe. No te aha hoi? Ua parau aˈera Iehova i te feia o te nehenehe e ite i te hau a te Atua e: “O vau to Atua ra, o Iehova; o tei faaite ia oe i te mea e maitai ai oe ra; o tei aratai ia oe na te eˈatia maitai ia haere oe ra. Ahiri oe i faaroo mai i te mau faaue na ˈu e; ua riro ïa to oe maitai mai te pape pue ra; e ta oe utua mai te are moana ra.” — Isaia 48:17, 18.
2. a) Eaha te auraa te parau ra ‘haapao’? b) E hia rahiraa faaueraa a te Atua ta tatou e haapao (Ioane 1, 5:3)?
2 Parau mau, te feia atoa e haere nei i te mau putuputuraa i reira matou e tuatapapa ˈi i te Bibilia, e nehenehe ratou e huti mai i te tahi mau haamaitairaa. Teie râ, o te feia anaˈe e haapao i te mau faaueraa a Iehova, oia hoi o te faaohipa roa e o te faaau i to ratou oraraa i te reira, o ratou te fanaˈo mau i te hau a te Atua. Te vai ra anei te tahi mau tuhaa e tia ˈi outou ia pee maite i taua mau aˈoraa ra (Petero 2, 1:2)? Eita e navai ia haapao noa tatou i te tahi mau faaueraa a te Atua e a vaiiho atu ai i te hiti te mau faaueraa ta tatou e ore e au aore ra ta tatou e manaˈo ra e mea fifi roa ia faaohipa. A tamata ˈi te Diabolo i te aratai ia Iesu i roto i te eˈa o te miimii, ua pahono tia ˈtura oia e: “Ua papaihia, E ore te taata e ora i te maa anaˈe ra, i te mau mea atoa râ i haapaohia e te Atua.” — Mataio 4:4.
3. Mai te peu e hinaaro tatou e fanaˈo i te rahi o te hau ra, eaha te mau huru o to tatou oraraa nei te tia ia au maite e te mau haerea o Iehova?
3 E ohipa te mau faaueraa a te Atua i nia i te mau tuhaa atoa o to tatou oraraa. A tahi, to tatou mau auraa e o Iehova; i muri iho, to tatou huru i nia i ta ˈna faanahonahoraa itehia e te mata taata nei e i te taviniraa kerisetiano; e te tuhaa hopea, to tatou huru i nia i te mau melo o to tatou utuafare e i nia i te tahi atu mau taata e ere i te Ite no Iehova. Te feia e haapao mau nei i te mau faaueraa a te Atua i roto i taua mau tuhaa ra, e hau rahi mau ïa ta ratou e ite nei. E hiˈopoa anaˈe na i te tahi mau aˈoraa o te nehenehe e tauturu ia tatou ia fanaˈo i taua hau ra.
E tia anei ia outou ia anaanatae i te hoê o teie mau uiraa?
4. a) No te aha eita te hoê haapiiraa bibilia i te fare o te taata aore ra te haereraa i te Piha o te Basileia e ore ai e haapapu mai e te vai hau noa ra tatou e te Atua? b) I te mea e e tia ia tatou ia atuatu i te faaroo i roto ia Iesu Mesia, eaha ïa ta te reira e titau ra (Ioane 3:36)?
4 Ua haamata anei outou i te haapii i te Bibilia e te mau Ite no Iehova? Aore ra te amui ra anei outou i roto i te amuiraa a hia ˈtura avae i teie nei, aore ra a hia ˈtura matahiti? Mai te peu e e, eita e ore te iteraa outou i te mau opuaraa a te Atua, ua faaoaoa te reira ia outou. Teie râ, noa ˈtu â ïa e te fanaˈo ra te hoê taata i te hoê haapiiraa bibilia i to ˈna utuafare aore ra te haere ra o ˈna i te Piha o te Basileia, e te oaoa ra hoi oia i te reira, e ere te reira i te haapapuraa e te vai hau noa ra oia e te Atua. E feia hara tatou paatoa, e e nehenehe noa tatou e fanaˈo i te hau a te Atua na roto anaˈe ra i te arai o Iesu Mesia (Isaia 53:5; Ohipa 10:36). Eita te hoê faaroo aita e ohipa e nehenehe oia anaˈe ra, e hopoi mai i taua hau ra. E tia ia tatou tataitahi ia ite e mea hinaaro mau na tatou ia hoohia mai tatou e e tia ia tatou ia atuatu i te faaroo i roto i te tusia o Iesu, e ei haapapuraa i taua faaroo ra, ia auraro i ta ˈna mau faaueraa (Iakobo 2:26). Ia au i te hoê o te mau faaueraa ta Iesu i horoa mai a parahi mai ai oia i te fenua nei, e tia i te feia e hinaaro e riro atu ei mau pǐpǐ na ˈna, ia bapetizohia i roto i te pape (Mataio 28:19, 20). Ua bapetizo anei outou ia outou ei faaiteraa e te pûpû ra outou ia outou iho no Iehova na roto ia Iesu Mesia?
5. No te aha e mea faufaa roa ia pûpû tatou ia tatou no Iehova e ia rave i te bapetizoraa ia nehenehe tatou ia hau e te Atua?
5 Te vai ra anei i roto i to outou oraraa te tahi ohipa o te tapea ra ia outou ia bapetizo ia outou? Mai te peu e te ite ra outou aore ra te haapii ra outou i roto i ta outou haapiiraa e te vai ra te hoê ohipa e tapea ra ia outou, eiaha e haamaoro i te faatitiaifaro i te reira. Ia papu na ia outou e te mau huru feruriraa atoa e te mau huru haerea atoa e haafifi ra e ia bapetizohia outou, te opani atoa ra ïa te reira e ia vai hau noa outou e te Atua. Ia haavitiviti na outou i te faatitiaifaro oi vai aˈe te taime. Mai ta te Petero 1, 3:21 e faaite ra, te pûpû nei te feia, ta te Atua ra o Iehova i horoa i te hoê haava manaˈo maitai, ia ratou no ˈna no te mea te tiaturi nei ratou i te tusia o te Mesia, e te faataipe nei ratou taua opuaraa ra na roto i te bapetizoraa e te faaohipa ra hoi ratou i te hinaaro o te Atua. Ma te fanaˈo atura ïa i te haamaitairaa a te Atua, te ite ra hoi ratou i te hau e noaa i te hoê haava manaˈo maitai. Eita te hau a te Atua e nehenehe e noaa na roto i te tahi atu ravea. Parau mau, e haamataraa noa teie.
6. No te aha ta tatou huru hiˈoraa i te mau putuputuraa a te amuiraa e nehenehe ai e tauturu ia tatou ia ite i te hau?
6 E tia atoa ia outou ia amui tamau atu i roto i te mau putuputuraa a te amuiraa e ia horoa ˈtu i te mau pahonoraa ia au i tei maraa ia outou. E parahiraa anei to taua mau putuputuraa ra i roto i to outou oraraa, e te faaitoito ra anei outou ia ore teie nei ao aore ra te tahi atu mau ohipa ta outou ia na nia ˈˈe i te reira? Te faaineine ra anei outou ia outou no taua mau putuputuraa ra, e te faariro ra anei outou ei haamaitairaa ia horoa ˈtu outou i te mau pahonoraa? Mea papu maitai e e nehenehe atoa taua mau mea ra e tauturu ia tatou ia ite i te hau. No te aha? No te mea te varua o te Atua tei te vahi ïa i reira to ˈna nunaa e putuputu ai, e ua riro hoi te hau ei hotu no taua varua ra (Galatia 5:22). E tauturu te mau putuputuraa kerisetiano ia tatou ia papu e eaha ta Iehova e titau maira ia tatou, ia riro tatou ei mau taata maitatai i mua i to ˈna aro. E haapii atoa mai te reira ia tatou nafea tatou ia vai hau noa e to tatou mau taata-tupu, i roto i te amuiraa, i te fare, i te fare haapiiraa aore ra i ta tatou vahi raveraa ohipa. Te mau putuputuraa, o te hoê ïa o te mau ravea e na reira mai ai Iehova i te haapii ia tatou, e mai ta te mau Papai e faaite mai nei, o te feia i haapiihia e Iehova teie e fanaˈo nei i te rahi o te hau ra. — Isaia 54:13.
7. E nafea tatou i te mau mea ta tatou e faaroo nei i te mau putuputuraa?
7 E tia atoa ia tatou ia haapao i te hoê tumu parau e tuati maite i te mau putuputuraa, oia hoi: e tia ia tatou ia faaohipa tamau noa i roto i to tatou oraraa te mau mea ta tatou e haapii. Eita tatou e hinaaro e riro mai taua mau ati Iseraela ra oia hoi, mai ta Iehova i parau, ‘o te faaroo e o te faaroo â, aita râ e taa ra i te auraa’. (Isaia 6:9.) Taa ê atu, e hinaaro anei tatou e riro mai te mau taata ta Iehova, ia ˈna i parau atu ia Ezekiela, e na ô ra e e faaroo ratou i te peropheta a te Atua, eita râ ratou e faaohipa i ta ˈna mau parau no te mea ua opua ratou e haamâha i to ratou iho mau hinaaro viivii aore ra nounou taoˈa (Ezekiela 33:31, 32)? Eita, inaha, teie tei parauhia no te feia, i to tatou nei tau, e putuputu i te fare o Iehova e o te haamaitaihia mai e ana: “E haere tatou i nia i te mouˈa o Iehova, i te hiero o te Atua o Iakoba; e na ˈna e haapii mai ia tatou i ta ˈna haapaoraa, e haere tatou na te eˈa ta ˈna e faaite maira.” (Mika 4:2). Ia haapao papu tatou i te haapiiraa e horoahia mai i roto i ta tatou mau putuputuraa, e ia tamau mai tatou i te mau putuputuraa atoa te hoê mea e tano no tatou iho e ia faaitoito tatou i te haere i mua i roto i taua tuhaa ra, te hotu ïa o te hau ta tatou e ooti mai. Mai ta Iesu i parau i roto i te Luka 11:28, “o tei faaroo â e ua haapao i te parau a te Atua, o ratou tei maitai”!
8. Ia apiti atu tatou mai ta tatou e nehenehe, i roto i te pororaa, eaha ïa te mau haamaitairaa ta tatou e huti mai?
8 Te hoê o te mau tuhaa ta ta tatou mau putuputuraa e titau ra, te faufaaraa ïa ia amui rahi atu i roto i te pororaa i te Basileia o te Atua e te tautururaa vetahi atu mau taata ia riro mai ei pǐpǐ na te Mesia (Mataio 24:14; 28:19). Eaha te parahiraa o taua mau ohipa ra i roto i to outou oraraa? Mai te peu e ua haapao maitai tatou i te mau mea ta Iehova e parau maira ia tatou na roto i te ravea o ta ˈna Parau e ta ˈna faanahonahoraa, ua ite ïa tatou e o te reira te ohipa faufaa roa ˈˈe te tia ia ravehia i nia i te fenua nei i to tatou nei tau (Apokalupo 14:6, 7). E te ite nei tatou e te feia e tavini nei ma te taime taatoa — e tae noa ˈtu te feia o te ore e nehenehe e riro ei pionie, o te faaitoito mau nei râ i roto i te taviniraa — e mau kerisetiano ïa e itehia te oaoa i nia ia ratou, i roto i te amuiraa. E ere te hau ta ratou e ite ra mai te hoê noa topata pape, e riro mai râ oia mai ta Iehova e parau ra ei “pape pue ra”. (Isaia 48:18.) O ta outou anei ïa e ite ra? Inaha, e maraa hoi te reira ia tatou paatoa.
9. Na te aha e nehenehe e tauturu ia tatou ia tapea mai i te hau ta te Atua e horoa mai nei noa ˈtu te mau fifi ino roa e farereihia e tatou?
9 Teie râ, e tia ia tatou ia ite e, i roto i te amuiraa o te mau mea nei, noa ˈtu e e faaohipa tatou i taua mau aˈoraa atoa ra, eita tatou e ore e roohia i te fifi. Tera râ, noa ˈtu eaha te huru teimaha o te tahi mau tupuraa, te haapapu mai nei te Atua e e tauturu mai oia ia tatou ma te aroha rahi, ia fariu anaˈe iho â râ tatou i nia ia ˈna (Petero 1, 5:6, 7). Ua haapii anei tatou nafea ia imi i te tauturu e te aratairaa a Iehova i roto i te mau mea atoa o ta tatou e rave, ma te ore e haamarirau i te paraparau atu ia ˈna na roto i te pure? E ia oti tatou i te rave i ta tatou e nehenehe e rave no te faatitiaifaro i te hoê huru tupuraa fifi mau, te tuu ra anei tatou i ta tatou hopoia i nia ia Iehova, ma te tiaturi mau (Maseli 3:5, 6; Salamo 55:22)? I roto i te Philipi 4:6, 7, teie te faaitoitoraa mahanahana mau e horoahia mai nei: “Eiaha outou e ahoaho noa ˈtu i te mau mea atoa nei; e faaite hua râ i to outou hinaaro i te mau mea atoa nei i te Atua, i te pure, i te aniraa ˈtu ma te haamaitai. E na te hau a te Atua, o tei hau ê atu i te ite taata nei, e faaitoito mai i to outou aau, e to outou manaˈo i te Mesia nei ia Iesu.” Auê ïa faanahoraa faahiahia mau e! Ua haapii anei outou nafea ia fanaˈo roa i te hau ta te Atua e horoa mai nei mai te reira te huru?
Ia tamau na tatou i te aruaru [tapapa] i te hau
10. Eaha te tia ia tatou ia rave ia itea mai ia tatou te hau?
10 Ia noaa anaˈe taua hau ra ia tatou, eita ïa ta tatou e nehenehe e haafaufaa ore i te reira. E tia ia tatou ia rave i te mau tutavaraa tuutuu ore ia vai noa mai te reira. Inaha, teie ta Petero 1, 3:10, 11 e parau mai nei: “O te hinaaro hoi i te ora ra, e ia maitai to ˈna ra pue mahana, (...) e imi oia i te hau, e aruaru atu i te reira.” Mea maamaa roa hoi mai te peu e e opua tatou e rave i te hoê ohipa e ia tupu taua ohipa i opuahia ra a haafaufaa ore atu ai. Oia atoa, ia imi tatou e a itea mai ai ia tatou te hau, e tia ia tatou ia haapao maitai i te mea e nehenehe e faaino i taua hau ra. Hau atu, e tia ia tatou ia tamau maite i te rave i te mau mea e turu i te hau.
11. Eaha te huru manaˈo te nehenehe e haafifi i to tatou mau auraa e o Iehova? b) No nia i te faahemaraa, afea tatou e ani atu ai i te Atua ia tauturu mai ia tatou (Mataio 6:13)?
11 Mai te peu e te hau ra tatou e te Atua maoti te ravea ta ˈna i horoa mai, e tia ia tatou ia ara maitai ia ore to tatou mau auraa e o ˈna ia ino na roto i te rave-tamau-faahou-raa tatou i te hara. Parau mau no to tatou tiaraa taata hara, e hara paatoa hoi tatou. Mea ataatâ roa râ, ia faariro tatou ei mea tano te tahi mau manaˈo aore ra ohipa ta te Atua e opani roa. Eita ta tatou e nehenehe e parau noa e: “Aita e ravea, mai tera iho â vau!” (Roma 6:16, 17). Maori hoi i te faariro ei mea tano te hoê ohipa ino, e tia ia tatou ia tatarahapa e ia ani i te Atua ia faaore mai oia i ta tatou hara na roto i to tatou faaroo i roto i te tusia o Iesu. E tia atoa ia tatou ia haapii i te ani atu i te Atua ia tauturu mai ia tatou na mua ˈˈe e rave atu ai i te ino, maori hoi i te tamata i te tiaturi ia tatou iho, a topa ˈtu ai i roto i te hara e i muri iho e ani atu ai ia faaore mai oia i ta tatou hara. Ma te tauturu a Iehova, e nehenehe tatou e manuïa i te “faataata apî [ia tatou], o tei hamanihia ia au i te Atua ra, i te parau-tia e te maitai mau ra”. — Ephesia 4:20-24.
12. a) No te fanaˈo i te hau, e tia atoa ia tatou ia haapao i to tatou mau auraa e o vai? b) Eaha ïa te tia ia tatou ia rave i roto i taua tuhaa ra?
12 Parau mau, ia ite tatou i te hau, e tia ia tatou ia haapao i to tatou mau auraa e vetahi ê. Te tavini nei te mau kerisetiano mau i roto i te hoê faanahonahoraa; e “huitaeae” hoi ratou (Petero 1, 2:17). Mai ta Iesu e haapapu ra, e itehia te mau pǐpǐ mau a Iesu i to ratou here te tahi i te tahi (Ioane 13:35). Tera râ, e ere hoê noa ˈˈe o ratou i te taata tia. E no to tatou tiaraa taata hara e te huru taata tia ore o vetahi ê, e tia paha ïa ia tatou, i te tahi taime, ia pure uˈana e ia rave i te mau tutavaraa puai no te faatitiaifaro i to tatou mau fifi. Teie ta te Hebera 12:14 e aˈo maira: “E tapi i te hau i te taata atoa nei.” E, e tia hoi ia tatou ia tapi i te hau, ma te tuu ore, i roto i to tatou mau auraa e to tatou mau taeae e tuahine. I roto i te Tesalonia 1, 5:13, te haapapu-maitai-hia ra hoi e: “E ei hau hoi to roto ia outou iho.” E ere ïa te auraa e te ore-roa-raa e faahoˈi atu mai tei ravehia i nia ia tatou nei, e tia râ ia tatou ia haˈa i te faatupu i te hau na roto i te raveraa i te taahiraa avae matamua no te faahoˈi faahou mai i te hau e ia ineine hoi tatou i te tuu ia vai noa mai taua hau ra. — Ephesia 4:1-3.
13. a) E nehenehe tatou e rave i te aha no te faatupu i te hau e te feia faaroo ore (aita to roto i te parau mau), e nafea tatou ia faaite e o te hau a te Atua te mea faufaa roa ˈˈe? b) Nafea tatou e nehenehe ai e fanaˈo i te hau mai te peu e te arepurepu ra na pihai iho ia tatou?
13 I rapae mai i te amuiraa, eita te taatoaraa e hinaaro e ora i roto i te hau. No reira te Roma 12:18 e horoa mai ai i teie nei aˈoraa tano maitai: “Peneiaˈe o te tia ra, e parahi hau noa outou i roto i te taata atoa nei.” Eiaha roa ˈtu râ ta tatou mau tutavaraa no te faatupu i te hau ia aratai ia tatou ia ore tatou e haapao i te mau faaueraa tia a Iehova. E riro atoa paha tatou i te faahuru ê i ta tatou tabura ohipa ia vai hau noa tatou e to tatou hoa faaipoipo aore ra to tatou fetii, ua ite râ tatou e e ere i te mea tano ia ore tatou e haere faahou i te mau putuputuraa a te amuiraa aore ra ia ore tatou ia apiti faahou atu i roto i te pororaa e taeahia ˈtu ai ia tatou taua tapao ra. E ua ite hoi tatou e eita roa ˈtu Iehova e farii mai ia tatou ia amui atu tatou i roto i te mau ohipa paieti ore a to tatou mau hoa ohipa aore ra a to tatou mau hoa haapiiraa, ia farii mai ratou ia tatou. Ua ite tatou e te hau mau tei te feia ïa e fanaˈo na mua ra i te hau a te Atua, i te feia mea au na ratou te ture a Iehova e teie e haere nei na nia i to ˈna eˈa. E tuu tatou i taua hau ra i nia ˈˈe i te mau mea atoa nei (Salamo 119:165). Parau mau, e riro atoa paha e te arepurepu ra na pihai iho ia tatou; te tatamaˈi nei te feia faaroo ore (aita to roto i te parau mau) aore ra te aro nei te tahi i te tahi, e tae roa atoa hoi ratou i te hamani ino mai ia tatou no to tatou faaroo; i te mea râ hoi e ua haapiihia tatou na te Parau a te Atua, ua ite atura ïa tatou e nafea râ tatou. Ia tamau â tatou i te faaohipa i roto i to tatou oraraa te mau haerea tia o Iehova, eita roa ˈtu ïa tatou e erehia i te hau o te riro hoi ei mea faufaa roa ˈˈe. — Hiˈo Salamo 46:1, 2.
14. Mai te peu e te ite ra tatou i te hamani-ino-raa i teie taime, na te aha e nehenehe e tauturu mai ia tatou ia faaea hau noa e ia atuatu i te hoê tiaturiraa ora?
14 Te rui hou to ˈna poheraa, teie ta Iesu i parau atu i ta ˈna mau aposetolo haapao maitai: “I parau atu vau ia outou i teie nei mau parau, ia hauhia to outou ia ˈu nei. E pohe to outou i teie nei ao. E faaitoito râ, ua riro te re o teie nei ao ia ˈu.” (Ioane 16:33). Parau mau, te ite nei tatou i te hamani-ino-raa. No te mea e mau kerisetiano tatou, te ite nei ïa tatou i te mau huru hamani-ino-raa atoa. E riro paha e te faaruru ra tatou i te ohipa tia ore; e rave rahi i rotopu ia tatou teie e roohia nei i te mau maˈi ino roa. Teie râ, te turu mai nei te hau a te Atua ia tatou i roto i taua mau fifi atoa ra. I te mea hoi na Iehova e haapii ra ia tatou, ua ite atura ïa tatou e no te aha te mau kerisetiano e hamani-ino-hia ˈi. Ua ite mau hoi tatou te tumu o te ohipa tia ore e o te maˈi. Ua ite atoa tatou e eaha te oraraa i mua ia tatou nei. Ua haapii tatou e maoti te haapao maitai ta Iesu i faaite i roto i to ˈna oraraa e maoti to ˈna pohe tusia, ua riro atura ïa te faaoraraa ei mea papu maitai. Taa ê atu, noa ˈtu eaha te mau fifi e farereihia e tatou i teie nei taime, e nehenehe ta tatou e haafatata ˈtu i te Atua na roto i te pure, ma te tiaturi maite, e te papu e, i roto i to ˈna here, te aupuru mai nei oia ia tatou e te turu mai nei oia ia tatou na roto i to ˈna varua. — Roma 8:38, 39.
15. No te aha e nehenehe ai e parau e te hau ta te Mesia e faatupu e ere roa ˈtu ïa mai te hau ta teie nei ao e pûpû mai nei?
15 Mea tano maitai te mau parau ta Iesu i parau i roto i te Ioane 14:27 e na ô ra e: “E hau ta ˈu e vaiiho ia outou nei, o to ˈu nei hau ta ˈu e ho atu no outou; e ere mai ta to te ao nei horoa ta ˈu horoa ia outou. Eiaha e taiâ to outou aau, eiaha hoi e mǎtaˈu.” Ma te feaa ore, aita roa ˈtu hoê noa ˈˈe mea ta teie nei ao e nehenehe e horoa mai mai te hau ta te Atua e horoa mai na roto i te arai o Iesu Mesia. E faaetaeta taua hau ra ia tatou i roto i te mau huru tupuraa ta vetahi pae e manaˈo e aore roa e tiaturiraa faahou.
16. a) Eaha te tiaturiraa i mua i te feia e farii mai teie atu nei i te hau ta te Atua e horoa mai nei? b) Nafea tatou e nehenehe ai e faaite e mea faufaa mau na tatou taua hau ra?
16 Eaha te oraraa faahiahia e tiai maira i te mau taata atoa i teie mahana,teie e farii nei i te hau a te Atua e teie e tuu nei i te reira i nia i te vairaa tia mau, i roto i to ratou oraraa! Fatata roa te ao nei, oia hoi te enemi o te Atua i te mou roa. E tahoê-paatoa-hia te mau mea i poietehia ra i roto i te hau maoti te mau ture tia a te Mana hope o teie nei ao. Ia faaitoito na to tatou mauruuru i taua tiaturiraa faahiahia mau ra ia tatou, ia ohipa ia au maite i te reira, mai teie atu nei! Ia faaroo maite na tatou paatoa i te haapiiraa a Iehova e ia faaô papu tatou ta ˈna mau faaueraa i roto i to tatou mafatu, ia here mau tatou i to ˈna mau haerea e ia rave tatou i ta ˈna e titau maira ia tatou. Mai ta te Maseli 3:1, 2 e parau ra: “E tau tamaiti, eiaha e haamoe i ta ˈu nei aˈo; ia haapao maite to aau i ta ˈu nei ture: e maoro hoi to oe ra pue mahana e to ore mau matahiti, e te ora hoi e te hau ta te reira e amui atoa mai ia oe ra.
Ei haapoto-noa-raa
◻ Ia au i te Isaia 48:18, nafea tatou e nehenehe ai e fanaˈo i te rahi o te hau?
◻ Eaha te tia ia tatou ia rave, ia fanaˈo roa tatou i te hau a te Atua?
◻ Nafea tatou e nehenehe ai e tapea i te hau e to tatou mau taeae e mau tuahine?
◻ Nafea tatou e nehenehe ai e ohipa no te hau i pihai iho i te feia faaroo ore (aita to roto i te parau mau)?
[Hohoˈa i te api 27]
Bapetizoraa
[Hohoˈa i te api 28]
Haere tamau i te mau putuputuraa
Faaohipa te mea ta tatou e haapii
[Hohoˈa i te api 29]
Apiti rahi atu i roto i te pororaa
Tuu i ta tatou hopoia i nia ia Iehova