E ere te haavîraa uˈana i te ravea

I teie mahana, mea rahi te taata o te manaˈo ra o te haavîraa uˈana te ravea no te faatitiaifaro i te mau aroraa aore ra i te mau fifi. Teie râ, aita teie huru feruriraa e tuati ra i te mau haapiiraa a Iesu e i te hiˈoraa ta ˈna i vaiiho mai. E hiˈo mai tatou eaha ta ˈna i parau e i rave.

Eaha ta Iesu i parau?

I ta ˈna Aˈoraa i nia i te mouˈa, ua haapii Iesu e ere te riri e te haavîraa uˈana i te ravea no te faatitiaifaro i te mau fifi. E hiˈo anaˈe i te tahi mau hiˈoraa.

• “Te mau mea atoa . . . ta outou e hinaaro ia rave te taata no outou, a rave atoa ïa no ratou.” (Mataio 7:12; Luka 6:31) Te faaitoito mai ra teie aˈoraa, pii-atoa-hia te Ture auro,a ia haa tatou i nia ia vetahi ê mai ta tatou e hinaaro ia ravehia i nia ia tatou. Eita hoê aˈe o tatou e hinaaro ia rave-ino-hia tatou, e faatura râ tatou i te mau taata atoa ma te hamani maitai.

• “I tei poara mai . . . i to papariˈa atau, a fariu atoa ˈtu i te tahi atu papariˈa.” (Mataio 5:38, 39; Luka 6:29) Aita Iesu i faaitoito i te mau taata ia vaiihohia ratou ia rave-ino-hia. Ua hinaaro râ o ˈna ia faatitiaifaro i teie manaˈo hape haapiihia e te mau tia haapaoraa, oia hoi e fariihia ia tahoo. Ua parau o ˈna i ta ˈna mau pǐpǐ eiaha ratou e tahoo, e faaite noa râ ratou i te mǎrû ia imi-hara-hia ratou.b

• “A here noa i to outou mau enemi.” (Mataio 5:43, 44; Luka 6:27) Ua haapii Iesu ia tatou ia hamani maitai i te feia o te riri mai ia tatou aore ra o te hamani ino ia tatou. Aita o ˈna i parau ia farii i to ratou haerea tano ore.c Tera râ, ia faaite tatou i te hamani maitai ia ratou, e nehenehe ratou e mǎrû mai e peneiaˈe e faaite atoa ratou i te hamani maitai i nia ia tatou.

Eaha ta Iesu i rave e e rave a muri aˈe?

Ua haapii Iesu e ere te haavîraa uˈana i te ravea e ua faaohipa atoa o ˈna i ta ˈna i poro. I te po a tapeahia ˈi o ˈna, ua rave hoê o ta ˈna mau pǐpǐ i te hoê ohipa tano ore, ua parau râ Iesu ia ˈna: “A faahoˈi i ta oe ˈoˈe i roto i te vehî, te taata atoa hoi e rave i te ˈoˈe, e pohe ïa i te ˈoˈe.” (Mataio 26:52) Ua faaite Iesu i to ˈna here i nia i to ˈna mau enemi ma te faaore i ta ratou mau hapa a pure atu ai no ratou.—Luka 23:33, 34; Petero 1, 2:23.

Ua fafau te Bibilia, fatata Iesu te Huiarii o te hau e haamou i te mau haavîraa uˈana. (Isaia 9:6, 7) No te haapii hau atu â no nia i teie parau fafau, a taio i te tumu parau “E nafea te tamaˈi e te faahuehueraa e ore ai?.”