I te pae aui: Mataˈi rorofai Ian i Floride i Marite, Tetepa 2022 (Sean Rayford/Getty Images); I ropu: Afaihia ra te hoê metua vahine e ta ˈna tamaiti i Donetsk i Ukraine, Tiurai 2022 (Alex Chan Tsz Yuk/SOPA Images/LightRocket via Getty Images); I te pae atau: Vahi tamatamataraa COVID, i Pékin i Taina, Eperera 2022 (Kevin Frayer/Getty Images)
A VAI ARA!
2022: Te matahiti ahoaho: Eaha ta te Bibilia e parau ra?
I te roaraa o te matahiti 2022, pinepine tatou i te faaroo i te parau o te tamaˈi, te faanavairaa faufaa e te ati natura. O te Bibilia anaˈe o te nehenehe e faataa i teie mau tupuraa.
Te auraa mau o te mau tupuraa i te matahiti 2022
Te haapapu ra te mau tupuraa i te matahiti i mairi aˈenei e te ora ra tatou mai ta te Bibilia e parau ra “i te mau mahana hopea.” (Timoteo 2, 3:1) Ua haamata teie tau i te matahiti 1914. E hiˈo anaˈe e nafea te mau tupuraa e tuea ˈi i te mau parau tohu Bibilia i to tatou tau:
“Te tamaˈi.”—Mataio 24:6.
“2022 te matahiti i hoˈi faahou mai ai te tamaˈi iino i Europa.”a
A hiˈo i te tumu parau “Tomoraa Rusia i Ukraine.”
“Te oˈe.”—Mataio 24:7.
“2022: Te matahiti o te oˈe ino mau.”b
A hiˈo i te tumu parau “No te tamaˈi i Ukraine, e nehenehe te oˈe e tupu na te ao nei.”
“Te maˈi pee.”—Luka 21:11.
“Ua hoˈi faahou mai te maˈi polio, ua maraa te maˈi parauhia variole du singe e ua tamau te COVID-19 i te parare atoa. Te faaite ra teie mau tupuraa e mea riaria mau te mau maˈi parare e aita ta te taata e nehenehe e paruru ia ˈna.”c
A hiˈo i te tumu parau “E ono mirioni taata tei pohe i te COVID.”
“Te mau mea riaria.”—Luka 21:11.
“Te veavea rahi e te âhu, te paˈurâ, te ati auahi e te pape pue. I te tau veavea matahiti 2022, e haamanaˈo iho â tatou i te mau ati natura o tei haapohe tausani rahiraa taata e ua ere e mirioni taata na te ao nei i to ratou fare.”d
A hiˈo i te tumu parau “Ua maraa roa ino te veavea na te ao atoa nei.”
“Te arepurepu [aore ra “faahuehueraa,” “orureraa hau.” Nota.].”—Luka 21:9.
“No te mea ua riri te rahiraa o te taata no nia i te parau o te fifi moni, te maraaraa iho â ra o te oraraa, ua rahi mai te patoiraa i te mau faatereraa i te matahiti 2022.”e
A hiˈo i te tumu parau “Te maraaraa o te moni hoo na te ao nei.”
Eaha te tupu i te matahiti i mua nei?
Aita tatou e ite eaha te tupu i te matahiti 2023. Fatata roa râ te Faatereraa arii a te Atua aore ra te faatereraa i te raˈi i te ohipa i nia i te fenua nei. (Daniela 2:44) E haamou tera faatereraa i te mau ohipa e haamauiui ra i te taata e e tupu iho â te hinaaro o te Atua no te fenua.—Mataio 6:9, 10.
Te faaitoitohia ra outou ia pee i te faaararaa a Iesu “a ara noa” e e nafea te mau tupuraa na te ao nei e faatupu ai i te mau parau tohu Bibilia. (Mareko 13:37) Te titau-manihini-hia ˈtu nei outou ia haapii atu â nafea te Bibilia e tauturu ai ia outou e e nafea te Bibilia e horoa ˈi no outou e to outou utuafare i te hoê tiaturiraa mau no a muri aˈe.
a AP News, “2022 Was Year the Horror of War Returned to Europe,” na Jill Lawless, 8 no Titema 2022.
b Faanahoraa no nia i te opereraa maa na te ao nei, “Te oˈe e tupu na te ao nei.”
c JAMA Health Forum, “Living in an Age of Pandemics—From COVID-19 to Monkeypox, Polio, and Disease X,” na Lawrence Gostin, 22 no Tetepa 2022.
d Earth.Org, “What’s Behind the Record-Breaking Extreme Weather Events of Summer 2022?” na Martina Igini, 24 no Atopa 2022.
e Carnegie Endowment for International Peace, “Economic Anger Dominated Global Protests in 2022,” na Thomas Carothers e Benjamin Feldman, 8 no Titema 2022.