E faufaahia tatou i te hoo o Iesu
Hoê taime i te matahiti, e putuputu te mau Ite no Iehova e e mirioni taata tei titau-manihini-hia no te faatupu i te Oroa haamanaˈoraa o te pohe o Iesu, mai ta ˈna i faaue. (Luka 22:19) E tauturu mai teie oroa ia haafaufaa i te auraa o ta Iesu i rave, a horoa ˈi oia i to ˈna ora no te huitaata. Te faaite atoa ra te reira te faufaaraa o to ˈna hoo no tatou i teie nei â e no a muri aˈe.—Ioane 3:16.
Noa ˈtu ua apiti outou i te oroa i teie matahiti aore ra aita, nafea outou e faufaahia ˈi i te hoo o Iesu? Ua haapii mai Iesu e e titauhia ia tatou ia rave e piti ohipa faufaa:
1. Haapii no nia i te Atua e Iesu. Ua pure Iesu i to ˈna Metua i te raˈi, e ua parau: “No te fanaˈo i te ora mure ore, ia ite ïa ratou o vai oe te Atua mau hoê roa e ta oe i tono mai o Iesu Mesia e tia ˈi.”—Ioane 17:3.
2. A haa ia au i ta outou i haapii. Ua faataa Iesu mea titauhia ia faaohipa tatou teie mau haapiiraa i roto i to tatou oraraa. Ei hiˈoraa, ua faaoti o ˈna i ta ˈna aˈoraa tuiroo i nia i te mouˈa ma te faaue i te taata ia “faaroo i [ta ˈna] mau parau, a haapao atu ai.” (Luka 6:46-48) I te tahi atoa taime ua parau oia: “Ua ite outou i teie mau mea, e oaoa outou ia rave outou i te reira.”—Ioane 13:17.
E hinaaro anei outou e haapii hau atu â no nia i te Atua e Iesu? E hinaaro anei outou i te mau aratairaa papu no te haa ia au i ta outou i haapii? Teie te tahi mau ravea o te nehenehe e tauturu ia outou.
Haapiiraa Bibilia
Ua tauturu ta matou haapiiraa Bibilia tamoni ore e rave rahi taata ia hiˈopoa i te Bibilia e ia faaohipa i te reira i roto i to ratou oraraa.
A haere e hiˈo i te tuhaa Haapiiraa Bibilia e te hoê taata haapii no te ite atu â eaha teie faanahoraa.
A mataitai i te video Farii-popou-hia oe no ta oe haapiiraa Bibilia no te ite eaha te hoê haapiiraa Bibilia e te mau Ite no Iehova.
Te mau putuputuraa a te mau Ite no Iehova
E putuputu te mau Ite no Iehova e piti taime i te hebedoma i roto i te Piha a te Basileia. I tera mau putuputuraa, e aparau matou i nia i te Bibilia e e nafea ia faaohipa i teie mau haapiiraa i roto i to matou oraraa.
E nehenehe te mau taata atoa e apiti mai i teie mau putuputuraa, aita e faufaa ia riro mai ei Ite no te apiti mai. I te tupuraa o to outou vahi, e nehenehe outou e apiti tino roa mai aore ra na roto i te ravea natirara.
A mataitai i te video Eaha te ravehia i te hoê Piha a te Basileia? ia ite outou mai te aha teie mau putuputuraa.
A imi i te hoê putuputuraa i pihai iho i ǒ oe ma te haere i nia te tuhaa Putuputuraa a te mau Ite no Iehova.
Te mau tumu parau e video i nia i te reni natirara
E tauturu mai e rave rahi tumu parau e video i nia i teie reni ia ite hau atu â no nia i te mau haapiiraa a Iesu e te faufaaraa o to ˈna pohe.
Ei hiˈoraa, no te ite e nafea e mirioni taata e faufaahia ˈi i te pohe o te hoê taata, a taio i te mau tumu parau “Eaha ta Iesu i rave no te faaora ia tatou?” e “No te aha Iesu i mauiui e i pohe ai?” aore ra a mataitai i te video No te aha Iesu i pohe ai?