Ua maraa roa ino te veavea na te ao atoa nei: Eaha ta te Bibilia e parau ra?

I Tiurai 2022, ua tapaohia e ua maraa roa ino te veavea na te ao atoa nei:

• “A piti taime teie avaˈe ua faaara te feia mana i Taina i te taata e maraa roa ino te veavea i roto fatata 70 oire.”—I te 25 no Tiurai 2022, CNN Wire Service.

• “No te maraaraa o te anuvera i Europa, ua ura atoa mai te mau uru raau i roto e rave rahi fenua.”—I te 17 no Tiurai 2022, The Guardian.

• “I te Tapati, a tahi ra i itehia ˈi teie faito veavea i roto e rave rahi oire i Marite e ua parare te reira i te hitia o te râ e tae atu i te tahi tuhaa o te pae apatoa e tooa o te râ.”—I te 24 no Tiurai 2022, The New York Times.

Eaha te auraa o te reira? E nehenehe anei e ora noa i nia i te fenua? Eaha ta te Bibilia e parau ra?

Ua tohu anei te Bibilia no nia i te maraaraa o te veavea?

E. Te tupu ra te maraaraa o te veavea o ta te Bibilia i tohu i to tatou nei tau. Ei hiˈoraa, ua parau Iesu e ite mai tatou “te mau mea riaria.” (Luka 21:11) Ua faatupu te maraaraa o te anuvera te riaria no ta te taata e rave no te fenua nei.

E nehenehe anei e ora noa i nia i te fenua?

E. Ua poiete te Atua i te fenua ia nehenehe te huitaata e ora e a muri noa ˈtu. (Salamo 115:16; Koheleta 1:4) Eita oia e vaiiho i te taata ia tuino i te fenua, ua fafau oia “e haamou i te feia e tuino ra i te fenua.”—Apokalupo 11:18.

A hiˈo na i teie e piti parau tohu e faataa ra eaha ta te Atua e rave no te fenua:

• “E oaoa roa te medebara e te fenua mǎrô, e e oaoa te vahi papu pâpâmǎrô e e uaa mai te tiare.” (Isaia 35:1) Eita te Atua e vaiiho te fenua ia riro ei vahi ano e haamaitai râ oia te fenua.

• “Te haapao nei oe i te fenua, ma te faahotu e te faaruperupe ia ˈna.” (Salamo 65:9) Maoti te haamaitairaa a te Atua, e riro mai te fenua ei paradaiso.

No te ite atu â no ta te Bibilia e parau ra no nia i te tauiraa o te ahuaraˈi, a taio te tumu parau “Les changements climatiques et notre avenir : qu’en dit la Bible ?”

No te ite atu â no nia i ta te Bibilia e tohu ra e nafea e haamaitai ai te fenua, a taio te tumu parau “Na vai e faaora i te fenua?”