Ua faaara te mau tia poritita e fatata Aramagedo i te tupu: Eaha ta te Bibilia e parau ra?

I te poipoi Monire 10 no Atopa 2022, ua tupita to Rusia i te tahi mau oire no Ukraine. Eaha te tumu? E piti mahana na mua ˈtu, ua ino roa te eˈa turu i ropu ia Crimée e Rusia no te hoê paura atomi tei tuuhia. Ua tupu te reira i muri aˈe i to te mau tia poritita faaararaa e fatata Aramagedo i te tupu.

“Mai te tau mai â o te peretiteni Marite John Kennedy e te tamaˈi i tupu i Cuba, aita te parau o Aramagedo i faahitihia aˈenei. I to ˈu manaˈo, ia faaohipahia te hoê paura atomi, papu, e tupu iho â Aramagedo.”—Te peretiteni no Marite Joe Biden, 6 no Atopa 2022.
“No ˈu, fatata roa Aramagedo e e fifihia te ao taatoa.”—I te uiuiraahia te peretiteni no Ukraine Volodymyr Zelensky no nia i te mau faahopearaa ia faaohipa i te mau mauhaa tamaˈi atomi, BBC News, 8 no Atopa 2022.

E nehenehe anei Aramagedo e tupu maoti te faaohiparaa i te mauhaa tamaˈi atomi? Eaha ta te Bibilia e parau ra?

E nehenehe anei Aramagedo e tupu maoti te faaohiparaa i te mauhaa tamaˈi atomi?

Aita. I roto anaˈe i te Bibilia e itehia ˈi te taˈo “Aramagedo.” Ia au i te Apokalupo 16:16, e ere i te hoê tamaˈi i rotopu i te mau nunaa, e tamaˈi râ i rotopu i te Atua e “te mau arii atoa o te fenua nei.” (Apokalupo 16:14) I Aramagedo, e haamou roa te Atua i te mau faatereraa taata.—Daniela 2:44.

No te ite atu â eaha te faufaaraa o Aramagedo no tatou, a taio i te tumu parau Eaha te tamaˈi o Aramagedo?

E haamouhia anei te fenua e te huitaata na roto i te tamaˈi atomi?

Aita. Noa ˈtu e faaohipa te mau tia mana i te mauhaa atomi, eita te Atua e vaiiho ia haamouhia te fenua. Te parau ra te Bibilia:

“E vai noa râ te fenua e a muri noa ˈtu.”—Koheleta 1:4.
“E fatu te feia parau-tia i te fenua, e e parahi ratou i nia iho e a muri noa ˈtu.”—Salamo 37:29.

Tera râ, ia au i te mau parau tohu e te mau tupuraa itehia na te ao nei, fatata te hoê tauiraa rahi i te tupu i nia i te fenua. (Mataio 24:3-7; Timoteo 2, 3:1-5) No te ite eaha ta te Bibilia e parau ra no a muri aˈe a farii i te hoê haapiiraa Bibilia tamoni ore.