Aramagedo—Eaha te reira no vetahi?

“Ua haaputuputu ihora ratou i te hoê vahi, o Aramagedo te iˈoa i te parau Hebera ra.”—APOKALUPO 16:16.

EAHA ta oe e manaˈo a faaroo ai i te taˈo “Aramagedo”? E puta mai paha te hohoˈa o te hoê ati riaria mau. E itehia teie taˈo hoê noa taime i roto i te Bibilia, e faahiti pinepine râ te mau parau apî e te mau tia faaroo i te reira.

Te tuati ra anei tei faaroo-noa-hia no nia ia Aramagedo e ta te Bibilia e haapii ra? Mea hoona ia ite i te pahonoraa. No te aha? Ia ite oe i te parau mau no nia ia Aramagedo, eita oe e mǎtaˈu faufaa ore noa e e maitai mai ta oe huru hiˈoraa i te tau no a muri aˈe e oia atoa to oe manaˈo no nia i te Atua.

A hiˈopoa i na uiraa e toru i muri nei e a faaau i tei faaroo-noa-hia no nia ia Aramagedo e ta te Bibilia e haapii mau ra.

1. O TE TAATA ANEI TE TUMU O ARAMAGEDO?

E pinepine te mau papai vea e aivanaa i te faaohipa i te taˈo “Aramagedo” no te faataa i te mau ati o te taata te tumu. Tera ïa no te Tamaˈi rahi Matamua e te Piti. I muri iho i teie mau tamaˈi, ua riaria te taata e ia taora o Marite i te paura atomi i nia i te Hau Amui Soviétique e ia na reira atoa tera faatereraa. Ua pii te mau papai vea i teie ati atâta ‘te Aramagedo faatupuhia e te paura atomi.’ Te taui rahi atoa nei te huru o te reva no te haaviiviiraa o te fenua. No reira te feia maimi e faaara ˈi e fatata roa Aramagedo.

Eaha ïa te auraa no ratou? Na te taata e faatere i te a muri aˈe o te fenua e o te mau mea ora atoa e vai ra i nia iho. Ia ore te mau faatereraa e haa ma te paari, e faaino-noa-hia te fenua.

Eaha ta te Bibilia e haapii ra? Eita te Atua e vaiiho i te taata ia faaino i te fenua. Te haapapu maira te Bibilia e aita Iehovaa i poiete i te fenua “ia vaiiho-taata-ore-noa-hia,” “ia taatahia” râ. (Isaia 45:18) E e haamou oia i te feia e faaino ra i te fenua.—Apokalupo 11:18.

2. E ATI NATURA ANEI O ARAMAGEDO?

I te tahi taime, e faaohipa te mau papai vea i te taˈo “Aramagedo” no te mau ati natura puai mau. “‘Aramagedo’ i Haïti,” te parau ïa a te hoê vea i 2010 ra o te faataa ra i te mau mauiui, te mau ino, e te rahiraa taata i pohe no te aueueraa fenua puai i tairi i tera fenua. Te faaohipa ra te mau papai vea e te feia taviri hohoˈa teata i teie taˈo no te mau ati i tupu ê na e no te mau ati ta ratou e riaria ra ia tupu. Mai te mau faahopearaa o te hoê paraneta nainai e tairi mai i to tatou fenua.

Eaha ïa te auraa no ratou? E ati o Aramagedo o te haapohe i te taata mai tera noa, oia atoa te feia hapa ore. Aita rea mea ta oe e nehenehe e rave no te paruru ia oe.

Eaha ta te Bibilia e haapii ra? Eita Aramagedo e haapohe i te taata mai tera noa. O te feia ino noa râ te haamouhia. Te fafau ra te Bibilia e fatata aita e paieti ore faahou, “oia â ïa, e hiˈo â oe i to ˈna vahi, e aita nei.”—Salamo 37:10.

3. E HAAMOU ANEI TE ATUA I TE FENUA I ARAMAGEDO?

Mea rahi te taata faaroo e tiaturi ra e e tupu te hoê tamaˈi hopea i rotopu i te maitai e te ino a mou atu ai to tatou fenua. Ua faaite te hoê pu titorotororaa (Princeton Survey Research Associates) e i Marite e 40 % taata paari tei uiuihia e tiaturi ra e e haamouhia te fenua i “te tamaˈi o Aramagedo.”

Eaha ïa te auraa no ratou? Aita te taata i poietehia no te ora e a muri noa ˈtu, oia atoa te fenua no te vai e a muri noa ˈtu. Ua poiete te Atua i te taata ia pohe iho â ratou.

Eaha ta te Bibilia e haapii ra? Te parau maitai ra te Bibilia e ‘ua haamau te Atua i te tumu o te fenua, ia ore roa ia aueue.’ (Salamo 104:5) No nia i te feia e ora i nia iho, te na ô ra te mau Papai: “E parahi te feia parau-tia i nia i te fenua, e parahi tamau â ratou i reira.”—Salamo 37:29.

Te patoi ra iho â te Bibilia i te mau parau e rave rahi e faaroo-noa-hia no nia ia Aramagedo. Eaha ïa te parau mau?

[Nota i raro i te api]