Feia paari ma, mea faufaa roa outou no te amuiraa

Mai tera atoa paha no oe i teie nei. Noa ˈtu ehia maororaa to oe taviniraa ia Iehova, te haafaufaa ore ra paha oe ia oe no to oe matahiti rahi. Ei hiˈoraa, e faaau paha oe i ta oe e rave nei i ta oe i rave na mua ˈˈe, a toaruaru roa ˈi oe. Eaha ïa te tauturu ia oe ia oaoa noa?

TA IEHOVA E ANI MAI RA

A ui ia oe iho: ‘Eaha ta Iehova e ani mai ra ia ˈu?’ E ite oe i te pahonoraa faaitoito mau i te Deuteronomi 6:5. Te na ôhia ra: “Ia here oe ia Iehova to oe Atua ma to oe aau atoa e to oe ora atoa e to oe puai atoa.”

Ia au i teie irava, te ani mai ra Iehova ia tavini ia ˈna ma to oe aau, ora e puai atoa. Te auraa ïa, eiaha e faaau ia oe ia vetahi ê, aore ra ta oe e rave nei e ta oe i rave na mua ˈˈe.

A feruri na: I to oe apîraa, ua horoa oe i te mea maitai roa ˈˈe na Iehova. I tera ra tau, tera te mea maitai roa ˈˈe ta oe i rave ia au i to oe tupuraa. Ua taui râ paha to oe tupuraa i teie nei. Eaha ïa ta oe e nehenehe e horoa? Mea papu, te horoa noa ra oe i te mea maitai roa ˈˈe ia au i to oe tupuraa, oia hoi tei maraa ia oe i teie mahana. Ia tapea mai oe i tera manaˈo, mea ohie ïa no oe ia farii e te horoa noa ra oe i te mea maitai roa ˈˈe na Iehova mai na mua ˈˈe.

E TAUTURU TA OE I HAAPII MAI IA VETAHI Ê

Teie te tahi atu manaˈo tauturu: Eiaha e faaea noa i nia i ta oe e ore e nehenehe e rave. A feruri râ e nafea oe ia tauturu ia vetahi ê. I teie nei ua paari roa oe, e nehenehe oe e rave i te tahi mau mea aita oe i nehenehe e rave i to oe apîraa ra. Mai te aha? Mai teie ïa:

A faaite i ta oe i haapii mai ia vetahi ê. A feruri na i teie na irava:

Te arii Davida: “I vai apî na vau e ua ruhiruhia i teie nei, aita râ vau i ite i te taata parau-tia i te faarueraahia e ta ˈna mau tamarii i te imiraa i te faraoa.”—Sal. 37:25.

Iosua: “Inaha, fatata roa vau i te pohe, e ua ite maitai outou ma to outou aau atoa e ma to outou ora atoa e aita hoê parau no roto mai i te mau parau fafau maitai atoa ta Iehova to outou Atua i parau tei ore i tupu. Ua tupu pauroa te reira no outou. Aita hoê o tera mau parau i ore i tupu.”—Ios. 23:14.

Peneiaˈe i to oe apîraa tera atoa ta oe i parau no te faaitoito ia vetahi ê. No Davida raua Iosua, na tavini taiva ore a Iehova, mea faufaa ˈtu â ta ratou mau parau. Inaha, tera iho â ta raua i ite i te roaraa o to raua oraraa. Ua faatia noa ïa raua i ta raua i ite e i faaroo i tera roaraa.

Mai te peu mea maoro oe i te taviniraa ia Iehova, e nehenehe atoa oe e faatia mai i te mau haamaitairaa ta oe i fanaˈo. Te haamanaˈo ra anei oe i te hoê tupuraa i haamaitai ai Iehova i to ˈna nunaa? Mai te peu e, eiaha e haamarirau i te faatia. Ua faaitoito hoi te reira ia oe. No reira, ia faaroo mai vetahi i ta oe i haapii mai i roto i te taviniraa, e itoitohia ratou.—Roma 1:11, 12.

E faaitoito atoa oe ia vetahi ê ma te haere tino roa ˈtu i te mau putuputuraa, mai te peu e nehenehe ta oe. Inaha, e itoitohia oe e to oe mau taeae e tuahine. Teie ta Connie tei faahitihia na mua ˈtu i parau: “Ia haere roa ˈtu vau i te mau putuputuraa, eita ïa vau e toaruaru. Eita iho â, inaha i ǒ vau e fanaˈo ai i te here o te mau taeae e tuahine. E horoa ïa vau maa ô na ratou no te faaite i to ˈu mauruuru. E faaitoito iho â vau i te amuimui noa i to ˈu mau taeae e tuahine i roto i te mau ohipa pae varua.”

MEA FAUFAA NO IEHOVA TA OE TAVINIRAA TAIVA ORE

Ua faahiti te Bibilia e rave rahi tavini tei taotiahia no to ratou tupuraa, noa ˈtu râ mea here na Iehova ia ratou. Teie te hiˈoraa o Simeona, te hoê ati Iseraela paari i ora a fanauhia ˈi Iesu. I to ˈna haereraa i te hiero, ua ite o ˈna i te mau tane apî e rave ra i te mau ohipa faufaa i reira. E o Simeona ïa? Peneiaˈe ua manaˈo o ˈna mea faufaa ore o ˈna no Iehova, inaha mea paari o ˈna. E ere râ tera te manaˈo o Iehova. No Iehova, “e taata parau-tia oia e te mǎtaˈu i te Atua.” E ua haamaitai Iehova ia ˈna ma faaite atu i te aiû ra o Iesu. Ua faaohipa atoa Iehova ia ˈna no te faaite i te hoê parau tohu no nia i te Mesia. (Luka 2:25-35) Mea papu, aita Iehova i hiˈo ia ˈna mai te hoê taata paruparu, mai te hoê râ taata faaroo puai “tei nia iho atoa ia ˈna te varua moˈa.”

O oe atoa, mea faufaa roa no Iehova ta oe taviniraa noa ˈtu to oe matahiti rahi. Inaha ta te hoê taata e horoa, “e fariihia ïa ia au i te mea e vai ra ia ˈna, eiaha râ i te mea aita e vai ra ia ˈna.”—Kor. 2, 8:12.

A tiatonu ïa i ta oe e nehenehe e rave. Ei hiˈoraa, i roto i teihea huru taviniraa e nehenehe oe e apiti noa ˈtu no te hoê taime poto noa? E nehenehe anei oe e tauturu ia vetahi ê ma te taniuniu aore ra papai ia ratou? E nehenehe teie mau ohipa rii î i te here e haapuai i to oe mau hoa Kerisetiano, mai te peu iho â râ no ǒ i te hoê tavini a Iehova mea maoro i roto i te parau mau, mai ia oe.

Te vai ra ua teimaha roa. A hiˈo na i te faatiaraa no Afirika hitia o te râ i roto i te tumu parau tarenihia “Ua faaora te hoê irava ia ˈna.”

A haamanaˈo, e nehenehe to oe faaroo e taiva ore e faaitoito ia vetahi ê. E hiˈoraa maitai to oe faaoromai tamau. No reira, ia papu ia oe “e ere hoi te Atua i te Atua parau-tia ore a moˈe ai ia ˈna ta [oe] ohipa e to [oe] hinaaro rahi i to ˈna iˈoa ma te tavini e ma te tamau i te tavini i te feia moˈa.”—Heb. 6:10.

A RAVE NOA I TEI MARAA IA OE

Te faataa ra te tahi mau maimiraa e ia tauturu te feia paari ia vetahi ê, mea maitai aˈe to ratou ea, to ratou feruriraa e e ora maoro atu â ratou.

Parau mau, eita te raveraa i te mau ohipa maitatai e faaore i te mau faahopearaa o te ruauraa. O te Faatereraa arii a te Atua anaˈe te nehenehe e faaore roa i te ruauraa e te pohe, oia hoi to tatou huru taata hara.—Roma 5:12.

A tiai noa râ, ia rave oe i ta Iehova e ani mai ra, oia atoa te tautururaa ia vetahi ê ia ite o vai o ˈna, e puai atu â to oe tiaturiraa e e maitaihia to oe ea. Feia paari ma, a haamanaˈo mea faufaa roa ta outou e rave ra no Iehova e no te amuiraa.