Ua faatupu o ˈna i te hinaaro o to ˈna mafatu

O TE hinaaro anei o to outou mafatu te iteraa i te Basileia mesia ia faatere mai i te fenua taatoa nei? Mai te peu e e, te hinaaro rahi ra ïa outou e te pure nei outou no te mau haamaitairaa i tǎpǔhia mai no te fenua nei e tupu i raro aˈe i taua Basileia i te raˈi ra. A faaohipa ïa i te faaoromai, inaha “ia tupu râ te mea hinaarohia ra, e au ïa te aa a te feia parau-tia ra i te raau ora.”—Maseli 13:12; Iakobo 5:7, 8.

Hau atu i te 2 000 matahiti i teie nei, ua ora na te taata “parau-tia e te haapao maitai” ra o Simeona i Ierusalema. Ua tiaturi oia i te mau parau tohu a te Mesia, e te “tiai ra i te haamahanahana no Iseraela.”—Luka 2:25.

E faatupu te mau parau tohu a te Mesia i te tiaturiraa

O Iehova te tumu o te parau tohu matamua a te Mesia—oia tei horoa mai i te tiaturiraa no te huitaata tei roohia i te hara e te pohe. Ua faaite atea mai te Atua i te haerea mai te Huaai a ta ˈna “vahine,” aore ra faanahonahoraa rahi.—Genese 3:15.

Ua itehia oia mai te huaai a Aberahama, e ua faaite mai hoi o Iakoba i to ˈna haerea mai. (Genese 22:17, 18; 49:10) Ua faaitehia te mau hanahana no nia i te Basileia mesia i roto i te mau salamo. (Salamo 72:1-20) Ua faaite atea mai o Isaia e na te hoê paretenia e fanau mai i te Huaai, e ua tohu mai o Mika e e tupu taua fanauraa ra i Betelehema. (Isaia 7:14; Mika 5:2) O teie noa te tahi o te mau parau tohu i roto i te mau parau tohu e rave rahi no nia i te Mesia.

Aitâ e Mesia!

E teie nei, a feruri na e tei te tau tahito tatou, e te fatata maira te senekele matamua o to tatou nei tau. E 4 000 matahiti atura ïa teie nei to te parau tohu matamua a te Atua. Ua ite mai te mau ati Iuda i te haamouraahia te hiero o Iehova, te vai-ano-raa to ratou fenua, e 70 matahiti faatîtîraa i Babulonia, e e 500 matahiti i raro aˈe i te faatereraa a te mau faatere o te mau nunaa. E aitâ te Mesia i tae mai!

Mai te aha te huru tiairaa a te mau ati Iuda mǎtaˈu i te Atua i te haerea mai te Mesia! Maoti hoi oia e itea ˈi i nia ia ratou e i nia i te mau nunaa atoa te mau haamaitairaa e rave rahi.

E taata haapao maitai

I roto i te mau ati Iuda haapao maitai e tiai ra e e pure atoa ra no te haerea mai te Mesia, te vai ra ïa o Simeona, te hoê tavini paari haapao maitai a Iehova e ora na i roto i te oire pu no Iudea. Ua tupu te hoê ohipa taa ê i nia ia Simeona.

Ua tuu mai te Atua i to ˈna varua moˈa i nia ia Simeona e ua haamaitai maira ia ˈna na roto i te hoê orama. Eita o Simeona e pohe hou aˈe oia e ite ai i tei haapaohia ei Mesia. Tau mahana râ hoi e tau avaˈe tei mairi. Ua paari roa o Simeona e mea fifi roa ia tiaturi e e ora maoro atu â oia. E tupu anei te parau tǎpǔ a te Atua i nia ia ˈna?

I te hoê mahana (i te matahiti 2 hou to tatou nei tau), ua haere maira te tahi na taata faaipoipo e te hoê aiû i te hiero mai Bete-lehema mai. Ua faaite mai te varua moˈa ia Simeona e teie taua mahana i tiai-maoro-hia ra. Ua haere atura oia i te hiero, i reira oia e ite mata atu ai i tei faaitehia mai e te mau peropheta. Ma te haavitiviti i te haere, ia au iho â i te vitiviti e tano i to ˈna tino paari, ua ite atura oia ia Iosepha, Maria e te aiû.

Auê te oaoa o Simeona ia ˈna i rave mai te aiû i roto i to ˈna rima e! Teie hoi te aiû e riro mai ei Mesia i tǎpǔhia maira—“te Mesia a Iehova.” E no to ˈna matahiti paari, eita ta Simeona e nehenehe e tiaturi e ite atu oia ia Iesu ia faatupu i ta ˈna ohipa i te fenua nei. Inaha, mea faahiahia mau ia ite ia ˈna ei aiû. Te haamata ra te mau parau tohu no nia i te Mesia i te tupu. Auê hoi o Simeona i te oaoa e! I teie nei e oaoa roa oia i te taoto i roto i te pohe e tae noa ˈtu i te mahana e faatiahia ˈi te feia pohe.—Luka 2:25-28.

Te mau parau tohu a Simeona

Ia faateitei o Simeona i to ˈna reo no te arue ia Iehova, e faaroo tatou ia ˈna ia parau e: “E te Fatu, e tuu oe i to tavini i teie nei ma te hau, ua au hoi i ta oe parau: ua ite aˈenei hoi tau mata i te Ora na oe, i haapaohia e oe i mua i te mata o te taata atoa nei; e tiarama ei haamaramarama i te Etene, e ei hanahana no to oe ra taata no Iseraela.” Te tamau noa râ te metua tane faaamu o Iesu, oia hoi o Iosepha, e to ˈna metua vahine o Maria i te aniani i te auraa mau o teie mau parau.—Luka 2:29-33.

Ua anaana roa te hohoˈa mata o Simeona a haamaitai noa ˈi oia ia Iosepha raua o Maria, ma te parau atu ia raua e ia haamaitai mai Iehova ia raua no ta raua hopoia i nia i te tamarii. E i muri iho, ua haamata aˈera hoi te hohoˈa mata o taua taata paari ra i te huru teiaha. E ma te aratai i ta ˈna mau parau i nia ia Maria anaˈe ra, te na ô faahou ra oia e: “Inaha ua haapaohia teie nei tamaiti ia hiˈa to Iseraela e rave rahi e ia tia faahou mai to Iseraela e rave rahi; ei tapao e mârôhia; (e e putapǔpû atoa to oe iho aau mai te puta hoto ra,) ia itea te manaˈo te aau taata e rave rahi.”—Luka 2:34, 35.

Te parau a Simeona ia Maria

A feruri na i te manaˈo o Maria. Eaha hoi ta Simeona e hinaaro ra e parau? E farii vetahi pae i te Mesia e e faatiahia mai ratou i to ratou huru paruparu. Tera râ, eita vetahi pae e farii ia ˈna, e turori hoi ratou no ˈna e e hiˈa roa ˈtu. Mai tei faaite-atea-hia mai, ua haapapu mau o Iesu e e ofai turoriraa o ˈna no te mau ati Iuda e rave rahi. (Isaia 8:14; 28:16) E ere te auraa o te mau parau a Simeona e e topa na mua te mau ati Iseraela tataitahi i roto i te tiaturi ore e e tia faahou mai i roto i te tiaturi, na roto i te faariiraa ratou ia Iesu. E ere roa ˈtu, mea taa ê râ te huru fariiraa a tera aore ra tera taata ia ˈna, e itea ˈtu te manaˈo o te aau taata e rave rahi e e aratai atu ai i te haavaraa a te Atua ia ratou no te ohipa maitai aore ra ino ta ratou i rave. No te feia e ore e tiaturi, e riro oia mai te hoê tapao, aore ra mai te hoê taoˈa mataitairaa. Ia tuu ratou i to ratou tiaturiraa i nia ia ˈna, vetahi pae e faatiahia mai ai mai roto mai i te pohe o ta ratou mau hapa e mau hara, no te fanaˈo i te hoê tiaraa parau-tia i mua i te aro o te Atua. E faaite mai te mau ohipa a te taata i nia i te Mesia eaha mau na to roto i to ratou mau mafatu.

Eaha ˈtura ïa no te parau a Simeona e na ô ra e: “E e putapǔpû atoa to oe iho aau mai te puta hoto ra”? Aita e haapapuraa ta te mau Papai e e ua putapǔpû roa te hoto [ˈoˈe] i roto ia Maria. Inaha, e riro hoi te oreraa te rahiraa e farii ia Iesu i te haapeapea ia ˈna. E auê ïa te peapea o Maria ia ite oia ia Iesu ia patitihia i nia i te hoê pou! Mai te huru ra ïa e ˈoˈe te putapǔpû ra i roto ia ˈna.

Te faaohipa ra o Simeona i te mau parau tohu a te Mesia

Ua turai te varua o te Atua ia Simeona ia faaohipa i te mau parau tohu no nia i te Mesia i nia ia Iesu. E nehenehe atura hoi o Simeona e pohe ma te hau, ‘no te mea ua ite to ˈna mata i te Ora a te Atua ra, i haapaohia e ana i mua i te mata o te taata atoa nei; e tiarama ei haamaramarama i te Etene, e ei hanahana no to ˈna ra taata no Iseraela.’ (Luka 2:30-32) Ua tano maitai te reira i te mau parau tohu a Isaia!

Ua tohu mai taua peropheta ra e: “E faaitehia mai te hanahana o Iehova, e ite paatoa te taata i te ora a te Atua.” “E horoa hoi au [Iehova] ia oe [te Mesia] ei faufaa na te mau taata, e ei tiarama ei haamaramarama i te mau fenua.” (Isaia 40:5; 42:6; 49:6; 52:10) Ua haapapu ê na te mau Papai heleni kerisetiano e e tae noa ˈtu te tahi mau ohipa i tupu, e taua Mesia ra o Iesu Mesia ïa, te maramarama mau o te mau nunaa, o te tatara i te puroˈu o te pouri pae varua e o te faaora i te taata.

Aita ˈtu parau ta te Parau a te Atua no nia i te taata paari ra o Simeona. Papu maitai, ua pohe oia na mua ˈˈe te Mesia e iriti ai i te uputa no te oraraa i nia i te raˈi. Na mua roa ˈˈe râ, e faatiahia mai ïa o Simeona no te ora i nia i te fenua nei. Auê ïa oaoa ta ˈna—e ta outou—e nehenehe e fanaˈo i roto i te ao apî i raro aˈe i te Basileia mesia a te Atua e!