Ua tauturu Iehova ia mâua ‘ia oaoa noa i te vahi tei reira mâua’

Ua apiti Mats raua ta ˈna vahine i te Haapiiraa no Gileada i 1979. E i te roaraa o te mau matahiti, ua tavini raua i Birmanie, Irania, Maurice, Ouganda, Tanzanie, e i Zaïre. I Gileada raua i te faarooraa i te taeae haapii ra o Jack Redford i te horoaraa i tera aˈoraa “a oaoa i te vahi tei reira oe.” E na teie faaitoitoraa i tauturu ia raua i te roaraa o ta raua taviniraa. Na raua ïa e faataa mai.

Mats, a faataa na mea nafea orua i te iteraa i te parau mau.

Mats: Ua ora to ˈu papa i Poronia i te roaraa o te piti o te Tamaˈi rahi. E ua ite o ˈna i te haavarevare o te haapaoraa Katolika. Noa ˈtu râ, pinepine o ˈna i te parau: “Papu ia ˈu te vai ra te parau mau.” E tera iho â. I muri iho, ua hoo mai au e rave rahi buka. Hoê o te reira, o te buka ïa Te parau mau e aratai i te ora mure ore ra. Haru maitai to ˈu mata i nia i tera upoo parau, e ua taio vau i te taatoaraa o tera buka hoê noa po. Poipoi aˈe, ua taa ia ˈu e tera te parau mau.

Mai Eperera 1972, e rave rahi papai a te mau Ite no Iehova ta ˈu i taio. E ua ite au i te pahonoraa o ta ˈu mau uiraa. E au ra e o vau te taata hoohoo ta Iesu i faahiti i roto i ta ˈna faahohoˈaraa. I to ˈna iteraa i te hoê poe moni rahi, ua hoo o ˈna pauroa ta ˈna faufaa no te hoo mai i taua poe ra. Ta ˈu ïa i rave. Ua faaoti au e tavini ia Iehova eiaha râ e haere i te haapiiraa tuatoru no te riro mai ei taote. (Mat. 13:45, 46) Ua bapetizohia vau i te 10 no Titema 1972.

Aita i matahiti, ua farii atoa to ˈu na metua e to ˈu taeae i te parau mau, e ua bapetizohia ratou. I Tiurai 1973, ua rave au i te taviniraa taime taatoa. I rotopu i te mau pionie o ta matou amuiraa, te vai ra te hoê tuahine haviti mau e mea itoito i te pae varua, o Ann-Catrin ïa. Haamatau ihora mâua e faaipoipo atura mâua i 1975. E ua tavini mâua ei pionie e maha matahiti i te oire no Strömsund, i Tuete, hoê tuhaa fenua mea anaanatae roa te taata i te poroi o te Bibilia.

Ann-Catrin: Ua ite to ˈu papa i te parau mau i te hoperaa ta ˈna haapiiraa tuatoru i Stockholm. I tera taime, e toru noa avaˈe to ˈu. I afai na o ˈna ia ˈu i te mau putuputuraa e i roto i te pororaa. Aita râ to ˈu mama i au. Ua tamata o ˈna i te faaite mea hape te mau haapiiraa a te mau Ite no Iehova. Aita râ i haere ia ˈna, e ua bapetizohia ˈtura o ˈna. Ua bapetizohia vau i te 13raa o to ˈu matahiti, e toru matahiti i muri aˈe, ua riro mai au ei pionie tamau. Ua tavini au i Umeå, e vahi teie e hinaarohia te feia poro. I muri iho, ua riro mai au ei pionie taa ê.

I muri mai i to ˈu faaipoiporaa ia Mats, ua oaoa roa mâua i te tautururaa e rave rahi taata ia ite i te parau mau. I rotopu ia ratou, te vai ra o Maivor, hoê potii tei faaea i te apiti i te ohipa tuaro no te riro mai ei pionie. O raua ïa to ˈu tuahine i roto i te taviniraa taime taatoa. Ua apiti raua i te Haapiiraa no Gileada i 1984, e te tavini nei raua ei mitionare i Équateur.

I roto i ta orua taviniraa mitionare, mea nafea to orua faaohiparaa i te aˈoraa “a oaoa i te vahi tei reira oe”?

Mats: Ua tauiui noa te vahi i tonohia ˈi mâua. Noa ˈtu râ, ua tutava mâua i te pee i te hiˈoraa o Iesu, to ˈna haehaa iho â râ. (Kol. 2:6, 7) Ei hiˈoraa, eita mâua e tiai na te mau taeae e tuahine i tera e tera vahi e faafatata mai ia mâua. Na mâua râ e tapiri atu no te taa i to ratou huru. Ua hinaaro mâua e taa i to ratou huru feruriraa e to ratou taˈere. No reira, rahi atu â mâua i te pee i te hiˈoraa o Iesu, rahi atu â mâua i te oaoa i roto i ta mâua taviniraa, mai te huru ra ua “tanuhia [mâua] i pihai iho i te anavai.”—Sal. 1:2, 3.

Ann-Catrin: Ia tupu maitai te hoê tumu raau no tanu-noa-hia ˈtura, mea faufaa te mahana. O Iehova tei riro ei “mahana” no mâua. (Sal. 84:11) Ua horoa mai o ˈna i te hoê utuafare pae varua î i te here. Ei hiˈoraa, i roto i ta mâua amuiraa i Téhéran, i Irania, mea farii maitai e mea horoa roa te mau taeae e tuahine. Ua haamanaˈo mai te reira i te mau hiˈoraa faahitihia i roto i te Bibilia. Ua hinaaro mâua e faaea noa i Irania. Tera râ, i Tiurai 1980, ua opanihia te mau ohipa a te mau Ite no Iehova, e ua faahepohia mâua ia faarue i tera fenua i roto noa e 48 hora. Tonohia ˈtura mâua i Zaïre (o Congo i teie nei) i Afirika.

Ia ˈu i faaroo e tonohia mâua i Afirika, ua taˈi au. Ua riaria hoi au, inaha e ophi to ǒ e te maˈi pee. Tera râ, ua faaitoito mai e piti hoa tei tavini na i ǒ. Parau maira raua: “Eiaha orua e haapeapea! Aita orua i haere aˈenei i Afirika. Ua papu râ ia mâua e au roa orua i tera fenua.” E ua tano iho â raua. Mea here roa te mau taeae e tuahine i ǒ. I muri aˈe e ono matahiti taviniraa i Zaïre, opanihia ˈtura te mau ohipa a te mau Ite no Iehova. Ua titauhia ïa ia faarue mâua i tera fenua. E ua taparu vau ia Iehova: “Ee Iehova, hinaaro mâua e faaea mai i ǒ nei.”

Eaha te mau haamaitairaa ta orua i ite?

Mats: Ua riro mai e rave rahi mitionare no tera e tera fenua ei hoa no mâua. Ua fanaˈo atoa mâua i te oaoa e faatere e rave rahi haapiiraa Bibilia. I te tahi taime, e 20 haapiiraa ta ˈu e 20 ta Ann-Catrin. Eita atoa e moˈehia ia ˈu te here rahi e te farii maitai o te mau taeae e tuahine no Afirika. Ia mâua i tere atu na te mau amuiraa i Tanzanie, e taoto mâua i roto i to mâua pereoo. Ua aupuru noa mai râ te mau taeae ia mâua noa ˈtu to ratou veve, mai ta te Korinetia 2, 8:3 e parau ra: “Ua horoa ratou i te mea e vai ra ia ratou, e hau atu â.” Hoê mea faufaa roa no mâua, pauroa te ahiahi ua topa anaˈe te mahana, e parahi mâua a faatia ˈi eaha tei tupu e a haamauruuru ai ia Iehova no ta ˈna tauturu.

Ann-Catrin: No ˈu, te oaoa ïa ia faahoa i te mau taeae e tuahine no te mau fenua atoa. Ua haapii mâua i te reo apî, mai te reo Farsi, Farani, Luganda e Swahili. Ua haapii au i te taˈere e rave rau. Ua tauturu mâua i te taata ia riro ei pǐpǐ, ua fanaˈo i te hoa mau, e ua tavini mâua ia Iehova e o ratou “ma te tahoê.”—Zeph. 3:9.

Ua faahiahia atoa mâua i te nehenehe o te mau mea ta Iehova i poiete. I te mau vahi atoa i tonohia ˈi mâua, ua farii noa mâua mai te huru ra tei pihai iho noa Iehova ia mâua i roto i to mâua mau tere atoa. Maoti o ˈna, ua fanaˈo mâua i te mau haamaitairaa aita mâua i manaˈo noa ˈˈe e fanaˈo.

Eaha te mau fifi ta orua i farerei, e eaha tei tauturu ia orua?

Mats: Ua roohia mâua mau huru maˈi, mai te paludisme. Ua tâpû-atoa-hia Ann-Catrin. Ua haapeapea atoa mâua no to mâua na metua. Auaˈe to pihai iho noa to mâua fetii no te aupuru ia ratou ma te faaoromai, te oaoa e te here. (Tim. 1, 5:4) I te tahi râ taime, ua puta mai te manaˈo faahapa no te mea ua hinaaro mâua e rave hau atu â no ratou, eita râ e haere ia mâua.

Ann-Catrin: I 1983, a tavini ai mâua i Zaïre, ua roohia vau i te maˈi choléra. Ua parau te taote ia Mats: “A faareva oioi i ta oe vahine.” Ananahi aˈe, tei roto ïa mâua i te hoê manureva faautaraa taihaa, tera anaˈe te ravea e tae ai mâua i Tuete.

Mats: Ua manaˈo mâua eita ta mâua e nehenehe faahou e tavini ei mitionare. Ua taˈi roa mâua. Tera râ, taa ê atu i ta te taote i parau mai, ua maitai mai Ann-Catrin. E hoê matahiti i muri mai, ua hoˈi mâua i Zaïre, i roto i te hoê amuiraa nainai reo Swahili i Lubumbashi.

Ann-Catrin: Ia mâua i faaea i Lubumbashi, ua marua ta ˈu pêpe. Noa ˈtu aita mâua i opua e fanau i te tamarii, ua hepohepo roa mâua i te poheraa ta mâua pêpe. I roto râ i tera ati, ua horoa mai Iehova i te hoê ô. Inaha, ua rahi atu â ta mâua haapiiraa Bibilia. Aita i matahiti, ua tataipiti te numera o te feia poro. Na mua ˈˈe, e 35 e i muri mai e 70 ïa. Ua maraa roa atoa te numera o te feia tei haere mai i te mau putuputuraa. Na mua ˈˈe, e 40 e i muri mai e 220 ïa. Mea rahi ta mâua ohipa i roto i te pororaa, e ua haamaitai rahi mai Iehova i ta mâua mau tutavaraa. Ua riro te reira ei tamahanahanaraa no ˈu. Noa ˈtu râ, pinepine mâua i te manaˈo i ta mâua pêpe e i te aparau no ˈna. Te tiai ru nei mâua i te taime e faaore roa ˈi Iehova i tera oto rahi i roto i te paradaiso.

Mats: I te hoê taime, ua paruparu e ua rohirohi roa ta ˈu vahine. Ua roohia vau i te mariri ai aau rahi e ua tâpûhia vau. I teie râ mahana, mea maitai ïa vau, e te rave nei ta ˈu vahine i tei maraa ia ˈna.

Ua taa ia mâua e ere o mâua anaˈe te faaruru nei i te ati. I muri mai i te haapoheraa taata i 1994 i Rwanda, ua haere mâua e farerei e rave rahi hoa i te mau puhaparaa no te feia horo ê. Ia mâua i ite i to ratou faaroo puai, faaoromai tamau e farii maitai, ua taa ia mâua e tauturu Iehova i to ˈna nunaa noa ˈtu eaha to ratou fifi.—Sal. 55:22.

Ann-Catrin: Ua faaruru mâua i te tahi atu ati i to mâua haereraa i te avariraa o te amaa i Ouganda i 2007. I te otiraa te putuputuraa, ua na muri mâua e 25 mitionare e mero o te Betela no te haere i Nairobi, i Kenya. Taeraa i te hoê taime, ua faaûhia matou e te hoê pereoo rahi. Ua pohe te taata faahoro, e pae hoa, e i muri mai te hoê tuahine i te fare maˈi. Te tiai ru nei mâua i te farerei faahou ia ratou.—Ioba 14:13-15.

Ua ora mai to ˈu mau pepe. Tera râ, no teie ati purumu, ua roohia mâua Mats i te ahoaho rahi. I te po iho â râ e puta mai ai tei tupu, e ara roa vau a tupaipai noa ˈi to ˈu mafatu. Mea riaria roa. I taparu noa na mâua ia Iehova ia tamǎrû mai. I taio atoa na mâua i te mau irava Bibilia mea au roa na mâua. Ua haere atoa mâua e hiˈo i te taote. I teie mahana, ua iti mai te ahoaho, e te ani nei mâua ia Iehova ia tauturu ia mâua ia tamahanahana i te feia e faaruru ra i te hoê â tupuraa.

Ia orua i faatia mai i te mau fifi ta orua i faaruru, ua parau atoa orua mai te huru ra ua amo Iehova ia orua “mai te huero moa.” Eaha ïa te auraa?

Mats: E parau te taata na roto i te reo Swahili: “Tumebebwa kama mayai mabichi,” aore ra “ua amohia matou mai te huero moa.” Mai te hoê taata o te haapao maitai ia amo o ˈna i te huero moa ia ore ia parari, ua tauturu noa mai Iehova ia mâua ma te here i roto i ta mâua taviniraa. Ua aupuru noa mai o ˈna ia mâua, e ua horoa atoa mai hau aˈe i ta mâua i manaˈo na e fanaˈo. Hoê ravea ta Iehova i faaohipa no te faaite mai i to ˈna here e ta ˈna tauturu, na roto ïa i te maitai o te Tino aratai.

Ann-Catrin: E hinaaro vau e faatia ˈtu i te hoê tupuraa o to Iehova here rahi. I te hoê mahana, ua niuniuhia mai au ua mau to ˈu papa i te fare maˈi. No ora noa maira hoi te maˈi o Mats, e aita ta mâua e moni no te reva i Tuete. Faaoti atura mâua e hoo i to mâua pereoo. Niuniu maira ïa te tahi na hoa faaipoipo no te parau mai e hinaaro raua e aufau hoê titeti manureva. I muri iho, niuniu maira te hoê tuahine ruhiruhia. Ua haaputu hoi o ˈna i ta ˈna moni i roto i te hoê afata, ua papaihia na ˈna i nia iho “No te hoê taata e hinaaro i te tauturu.” Aita i maoro to Iehova tautururaa mai ia mâua ia pee ta mâua titeti.—Heb. 13:6.

Ia haamanaˈo orua i na 50 matahiti i roto i te taviniraa taime taatoa, eaha ta orua i tapea mai?

Ann-Catrin: Ua taa ia ˈu eaha te auraa o te Isaia 30:15 e na ô ra: “Tei te vai-hau-noa-raa e te tiaturiraa to outou puai.” Ia tiaturi tatou ia Iehova, na ˈna e aro no tatou. (Par. 2, 20:15, 17) Ia mâua i tavini noa ia ˈna i te vahi atoa i tonohia ˈi mâua, ua fanaˈo mâua e rave rahi haamaitairaa.

Mats: Te haapiiraa ta ˈu e tapea mai, o te faufaaraa ïa ia turui noa i nia ia Iehova i roto i te mau tupuraa atoa, e ia hiˈo e nafea o ˈna e tauturu mai ai. (Sal. 37:5) Ua fafau hoi o ˈna i te tauturu mai ia ˈu. Ta ˈna iho â ïa i rave e tae roa mai i teie nei te tavini ra mâua i te Betela i Birmanie.

Te pure nei mâua ia fanaˈo e rave rahi taata apî, o te hinaaro ra e tavini ia Iehova ma te taime taatoa, i to Iehova here taiva ore mai ia mâua. Ua papu ia mâua e fanaˈo iho â ratou i te reira ia ineine ratou i te tavini ia Iehova noa ˈtu eaha te vahi e tonohia ˈi ratou.