A tauturu i “te taata aau farii” i te parau mau

1. Eaha te huru o te taata a faaroo ai i te parau apî oaoa? (Ohipa 13:47, 48; 16:14, 15)

I TE senekele matamua, mea rahi tei farii oioi i te parau mau. (A taio i te Ohipa 13:47, 48; 16:14, 15.) Hoê â huru i teie mahana. E rave rahi tei farii i te parau mau i te taime matamua a faaroo ai ratou i te parau apî oaoa. Te tahi râ, no muri iho roa ïa to ratou fariiraa i te poroi o te Bibilia. Eaha ïa ta tatou e rave ia farerei tatou i “te taata aau farii” i te parau mau?

2. No te aha e nehenehe ai e faaau i te ohipa pororaa i ta te hoê taata faaapu?

² E nehenehe e faaau i te ohipa pororaa i ta te hoê taata faaapu. Ia para anaˈe te maa ta ˈna i tanu, e pofai mai ïa o ˈna. Area râ te toea aita â i para ˈtura, e tamau noa ïa o ˈna i te pîpî i te pape. Hoê â huru no te pororaa. Ia farerei tatou i te hoê taata e anaanatae ra i te Bibilia, e tauturu tatou ia ˈna ia riro mai ei pǐpǐ na Iesu. Te feia râ aita â i anaanatae atura, e tamau tatou i te farerei atu haapao roa e farii mai ratou i te parau mau. (Ioa. 4:35, 36) Na te haroˈaroˈa e faaite mai eaha te ravea tano roa ˈˈe no te tauturu ia ratou. E ite tatou eaha te rave i te taime matamua tatou e poro ai ia ratou e e nafea ia tauturu ia ratou ia nuu i mua i te pae varua.

IA ANAANATAE MAI TE TAATA I TA TATOU POROI

3. Eaha te rave ia farerei tatou i te taata e anaanatae mai? (Korinetia 1, 9:26)

³ Ia farerei tatou i te taata e anaanatae mai, e hinaaro tatou e tauturu ia ratou ia haere na nia i te ea e tae roa ˈtu i te ora mure ore. Eiaha ïa tatou e taiâ i te pûpû i te haapiiraa Bibilia e i te titau ia ratou i te putuputuraa i te farereiraa matamua.—A taio i te Korinetia 1, 9:26.

4. A faatia mai i te tupuraa o te hoê vahine tei farii oioi i te haapiiraa Bibilia.

⁴ A pûpû i te haapiiraa Bibilia. Te vai ra o te farii oioi i te hoê haapiiraa Bibilia. Teie te tahi hiˈoraa. I te hoê Mahana maha, ua rave mai te hoê vahine no Kanada i te buka rairai Ia ora oe e a muri noa ˈtu! i nia i te vairaa papai afaifai. Ua faataa te tuahine e faaterehia te haapiiraa Bibilia i nia i teie buka rairai e mea tamoni ore. Ua farii teie vahine, e horoa ˈtura o ˈna i ta ˈna numera niuniu e ua na reira atoa tuahine. I tena noa mahana, ua hapono teie vahine i te poroi ia tuahine no te ani afea e faahaerehia ta ˈna haapiiraa. Pahono atura to tatou tuahine i teie hopea hebedoma raua e farerei ai. Ani maira teie vahine: “E vata vau ananahi, nehenehe anei ta oe?” Faatere atura tuahine i ta ˈna haapiiraa ananahi aˈe. Ua tae mai teie vahine i te putuputuraa o tera noa â hopea hebedoma, e ua nuu oioi o ˈna i mua i te pae varua.

5. Eaha te tauturu mai ia ite eaha te taime tano no te pûpû i te haapiiraa Bibilia? (A hiˈo atoa i te hohoˈa.)

⁵ E ere iho â ïa pauroa te farii oioi e haapii i te Bibilia mai teie vahine. E tiai rii â vetahi. No reira, e maiti tatou i te tumu parau e anaanatae mai te taata. E tapea noa tatou i te feruriraa maitai e e tauturu tatou ia ratou haapao roa e farii ai ratou i te hoê haapiiraa Bibilia. E nafea ïa tatou ia pûpû i te haapiiraa Bibilia? Tera tei uihia i te tahi mau taeae e tuahine aravihi no te haamata i te mau haapiiraa Bibilia.

6. E nafea oe ia faaineine i to muri nei farereiraa?

⁶ Ua faataa mai te mau pionie e taata poro tei uihia e i te tahi mau fenua mea maitai aˈe eiaha e faahiti i te tahi mau parau. No te faataa i te tereraa o te haapiiraa eiaha paha e parau “haapiiraa,” “haapiiraa Bibilia,” aore ra “mea haere mai au e haapii ia oe.” Mea au aˈe ia faahiti i te mau taˈo mai te “aparauraa,” “tauaparauraa,” aore ra “no te ite eaha ta te Bibilia e parau ra.” No te farerei-faahou-raa e nehenehe oe e parau: “Ua ite anei oe e pahono te Bibilia i te mau uiraa faufaa roa ˈˈe o te oraraa?” aore ra “E nehenehe te Bibilia e tauturu ia oe ia oaoa i roto i to oe oraraa.” E nehenehe oe e parau atoa ˈtu: “Eita e maoro. Tau minuti noa te titauhia ia haapii oe i te tahi mea faahiahia.” Mea tano atoa eiaha e parau “e farerei tâua pauroa te hebedoma” ia ore o ˈna ia manaˈo e te faahepohia ra o ˈna ia tiai mai ia tatou.

7. I teihea taime vetahi i te fariiraa i te parau mau? (Korinetia 1, 14:23-25)

⁷ A titau manihini ia ratou i te putuputuraa. E au ra i te tau o te aposetolo Paulo, ua farii te taata i te parau mau ia ratou i tae mai i te putuputuraa no te taime matamua. (A taio i te Korinetia 1, 14:23-25.) Hoê â huru i teie mahana. Pinepine te mau piahi i te nuu oioi i mua i te pae varua ia haere mai ratou i te mau putuputuraa. Eaha ïa te taime tano no te titau manihini ia ratou? I roto i te haapiiraa 10 o te buka Ia ora oe e a muri noa ˈtu! e faaitoitohia te piahi ia haere mai i te mau putuputuraa. Eiaha râ e tiai roa ia tapae orua i tera haapiiraa no te titau manihini ia ˈna. I te farereiraa matamua iho â, e nehenehe oe e titau i te taata i te putuputuraa o te hopea hebedoma. E nehenehe ïa oe e faaite i te tumu parau o te oreroraa parau aore ra i te tahi manaˈo o te haapiiraa o Te Pare Tiairaa.

8. Eaha te parau i te taata ta tatou e titau manihini i te putuputuraa? (Isaia 54:13)

⁸ Ia titau manihini oe i te taata e anaanatae ra, a faataa atu e mea taa ê roa ta tatou mau putuputuraa i ta ˈna i ite i te pureraa. Ei hiˈoraa, i to te hoê piahi iteraa i te tereraa o te haapiiraa o Te Pare Tiairaa ua parau o ˈna i te tuahine e faatere ra i ta ˈna haapiiraa: “Iae, ua mau maitai ia ˈna te mau iˈoa o te taatoaraa.” Faataa ˈtura to tatou tuahine e te tutava nei tatou paatoa i te haamatau te tahi i te tahi mai te hoê utuafare. Parau atura te piahi e mea taa ê roa i ta ˈna i matau noa na i roto i ta ˈna haapaoraa. Hoê â manaˈo to te tahi atu a tahi ra a haere mai ai i te putuputuraa. (A taio i te Isaia 54:13.) Ei Ite no Iehova, e putuputu tatou no te haamori ia Iehova, no te haapii atu â no nia ia ˈna e no te faaitoito te tahi i te tahi. (Heb. 2:12; 10:24, 25) No reira, e mea naho maitai te mau putuputuraa. (Kor. 1, 14:40) Inaha mea haere mai tatou no te fanaˈo i te haapiiraa, mea maramarama maitai ïa te mau Piha a te Basileia. No to tatou tiaraa amui ore, eita tatou e paraparau no nia i te poritita, aita atoa e aimârôraa e e tatamaˈiraa. No reira, mea maitai ia faaite tatou i te video Eaha te ravehia i te hoê Piha a te Basileia? i te piahi, ia taa ia ˈna eaha te ravehia i te putuputuraa.

9-10. Eaha ta tatou e faataa ia ore te taata e taiâ i te haere mai i te putuputuraa? (A hiˈo atoa i te hohoˈa.)

⁹ E taiâ rii vetahi ia haere mai i te putuputuraa no te mea te manaˈo ra ratou e faahepohia ratou ia riro mai ei Ite no Iehova. E faataa tatou ia ratou e nehenehe ratou e haere noa mai e faaroo. E farii-maitai-hia te mau utuafare, e ta ratou mau tamarii. Hoê â haapiiraa ta ratou pauroa e fanaˈo. E parahi te mau tamarii i pihai iho i to ratou mau metua. E ite ïa te mau metua te aha mai ra ta ratou mau tamarii, eita ïa ratou e haapeapea. (Deut. 31:12) Aita e titauraa moni, eita atoa e faahaerehia te tôtô. Te pee nei tatou i te faaueraa a Iesu: “Mea horoa-noa-hia mai ta outou, a horoa noa atoa ïa.” (Mat. 10:8) E nehenehe atoa tatou e faataa i te parau o te faaahuraa. Aita e titauhia ia oomo mai i te ahu era aˈe te unauna, aore ra te ahu moni rahi. Te aau o te taata hoi ta te Atua e hiˈo, eiaha râ te rapaeauraa.—Sam. 1, 16:7.

¹⁰ Ia tae mai te taata i te putuputuraa a farii maitai ia ˈna. A faaite atu i te mau taeae e tuahine, oia atoa te mau matahiapo o vai o ˈna. Ia ite teie taata e te farii-maitai-hia ra o ˈna e te amuiraa, e anaanatae ïa o ˈna i te hoˈi faahou mai. A haaparahi ia ˈna i pihai iho ia oe, aita anaˈe ta ˈna e Bibilia, na oe ïa e faaite i te mau irava i roto i ta oe Bibilia. A faataa atoa ia ˈna te mau manaˈo e vauvauhia na mua mai.

IA FARII TE TAATA I TE HAAPIIRAA BIBILIA

11. Eaha ta tatou e haamanaˈo ia faatere tatou i te haapiiraa Bibilia?

¹¹ Eaha ta tatou e haamanaˈo ia faatere tatou i te haapiiraa Bibilia? Eiaha e moˈehia ia tatou e ohipa atoa ta teie taata, eita o ˈna e vata hanoa. Ua faaoti anaˈe tatou tera mahana e tera hora tatou e farerei ai ia ˈna, e tapea anaˈe i ta tatou parau noa ˈtu e ere te taata mea haapao roa i tera tuhaa. Mea maitai atoa eiaha ia roa roa te haapiiraa matamua noa ˈtu e hinaaro tera taata e paraparau faahou. Tera hoi ta te tahi mau taata poro aravihi i ite a faatere ai i te mau haapiiraa Bibilia. Eiaha atoa e paraparau rahi roa. A vaiiho râ ia ˈna ia faaite mai i to ˈna manaˈo.—Mas. 10:19.

12. Eaha ta tatou fa ia haamata tatou i te hoê haapiiraa Bibilia?

¹² Ta tatou fa i te omuaraa iho â o te haapiiraa, o te tautururaa ïa i teie taata ia ite o vai Iehova e Iesu a here roa ˈtu ai ia raua. No reira e faaite noa oe i ta te Bibilia e parau ra, eiaha râ to oe manaˈo. (Ohi. 10:25, 26) Ta te aposetolo Paulo ïa i rave. O Iesu noa ta ˈna i haafaufaa no te mea o Iesu ta Iehova i tono mai no te haapii o vai te Atua e ia here tatou ia ˈna. (Kor. 1, 2:1, 2) Ua faataa atoa Paulo no te aha mea faufaa ia tauturu i te mau piahi ia faatupu i te mau huru maitatai tei faaauhia i te ario, te auro e te tahi atu mau ofai moni rahi. (Kor. 1, 3:11-15) Te vai ra te faaroo, te paari, te haroˈaroˈa e te mǎtaˈu ia Iehova. (Sal. 19:9, 10; Mas. 3:13-15; Pet. 1, 1:7) No reira, a pee i ta Paulo huru raveraa. A tauturu i ta oe piahi ia faatupu i te faaroo puai e te hoê auhoaraa piri e Iehova.—Kor. 2, 1:24.

13. E nafea ia faatupu i te faaoromai e te feruriraa au noa? (Korinetia 2, 10:4, 5) (A hiˈo atoa i te hohoˈa.)

¹³ Mai ia Iesu, a faatupu i te faaoromai e te feruriraa au noa. Eiaha e titorotoro i te oraraa o te piahi. Ia ore ia taa ia ˈna i te tahi tumu parau, a nuu i mua no te mea e nehenehe orua e hoˈi mai i nia iho i muri mai. Eiaha ïa e faahepo ia ˈna ia farii i te hoê haapiiraa aita o ˈna e taa ra, no te mea eita iho â te parau mau e aˈa oioi i roto i to ˈna aau. (Ioa. 16:12; Kol. 2:6, 7) Te parau ra hoi te Bibilia e au te mau haapiiraa hape i te hoê “pare,” e e titauhia ia “huri i raro” i teie pare. (A taio i te Korinetia 2, 10:4, 5.) E ere ïa i te mea ohie no te piahi ia haapae i te hoê haapiiraa ta ˈna i tiaturi noa na ehia maororaa. Ta tatou tuhaa, e tauturu ia ˈna ia faariro ia Iehova ei haapuraa na ˈna.—Sal. 91:9.

IA HAERE MAI TE TAATA I TE PUTUPUTURAA

14. Eaha to tatou huru i nia i te feia e haere mai i te putuputuraa?

¹⁴ Te faaue mai ra Iehova eiaha e maitiiti i te taata. Eiaha ïa tatou ia hiˈo i to ˈna taere, to ˈna tiaraa, mea veve anei o ˈna aore ra mea rahi ta ˈna moni. (Iak. 2:1-4, 9) E nafea ïa tatou ia faaite i te here i te mau taata atoa e tae mai i te putuputuraa?

15-16. E nafea tatou ia farii maitai i te taata tei tae mai i te putuputuraa?

¹⁵ Te vai ra vetahi mea haere noa mai e hiˈo aore ra mea titau-manihini-hia na te hoê Ite no Iehova. Ia tae mai te tahi taata, a haere e paraparau ia ˈna. A haapao maitai râ eiaha o ˈna ia huru ê. A ani atu ia parahi mai i pihai iho ia oe. E nehenehe oe e horoa ˈtu i te hoê Bibilia e te mau papai e hiˈopoahia i te putuputuraa aore ra e pee noa ïa o ˈna i nia i ta oe. Mea faufaa atoa ia tâuˈa oe i to ˈna huru. Ei hiˈoraa, i te haereraa mai te hoê tane i te putuputuraa, ua parau o ˈna i te taeae tei farii ia ˈna e ua haama roa o ˈna no to ˈna ahu. Parau atura teie taeae: “Aita e fifi, mai ia oe atoa matou.” Ua putapû roa teie tane, ua bapetizohia o ˈna i muri mai e ua mau roa ia ˈna ta te taeae i parau. Hoê râ ohipa ta tatou e vai ara: Ia paraparau tatou i te taata na mua ˈˈe e i muri iho i te putuputuraa, eiaha roa ˈtu e faaô i roto i to ratou oraraa.—Pet. 1, 4:15.

¹⁶ Teie atoa te tahi ravea no te farii maitai i te taata. Ei hiˈoraa, e faaite tatou i te faatura i roto i ta tatou mau aparauraa, pahonoraa, aore ra ia vauvau tatou i te hoê tumu parau no nia i te feia e ere i te Ite no Iehova. Eiaha tatou e faahiti i te mau parau e huru ê roa ratou, a ore atu ai e hoˈi faahou mai i te putuputuraa. (Tito 2:8; 3:2) Eiaha roa ˈtu tatou e faaino i ta ratou mau tiaturiraa. (Kor. 2, 6:3) O te mau taeae iho â râ e horoa ra i te mau oreroraa parau te vai ara. E haamanaˈo ratou ua tae atoa mai te taata e ere i te Ite no Iehova. E faataa ïa ratou i te auraa o te tahi mau parau ia taa i teie mau manihini eaha te parauhia ra.

17. Eaha ta tatou fa ia farerei tatou i “te taata aau farii” i roto i te pororaa?

¹⁷ Mea ru te ohipa pororaa. E tamau ïa tatou i te imi i “te taata aau farii i te ora mure ore.” (Ohi. 13:48) No reira, eiaha tatou e taiâ i te pûpû atu i te haapiiraa Bibilia e i te titau manihini i te taata i te putuputuraa. Ma te na reira, te tauturu ra tatou ia ratou ia haere na “te eˈa e tae atu ai i te ora.”—Mat. 7:14.