Uiraa a te feia taio

Ua parau te taata papai i te Maseli 30:18, 19 e aita o ˈna e maramarama ra i “te eˈa o te tane i ǒ te vahine apî.” Eaha ïa te auraa?

E rave rahi tei uiui no nia i te auraa o teie parau, tae noa ˈtu te tahi mau aivanaa mea ite i te Bibilia. Te na ô ra te taatoaraa o te irava i roto i te Huriraa o te ao apî: “E toru ohipa aita vau e maramarama ra [aore ra “mea faahiahia roa ino no ˈu,” nota], e maha aita e taa ra ia ˈu: Te eˈa o te aeto na roto i te reva, te eˈa o te ophi i nia iho i te mato, te eˈa o te pahi na tua, e te eˈa o te tane i ǒ te vahine apî.”—Mas. 30:18, 19.

I tiaturi na matou na mua ˈˈe e auraa tano ore to te parau “te eˈa o te tane i ǒ te vahine apî.” No te aha? No te mea ia hiˈohia te tahi atu mau irava o teie pene, ua faahitihia te tahi mau ohipa tano ore “o te ore roa ˈtu e parau: ‘Atira!’ ” (Mas. 30:15, 16) Hau atu, i te irava 20 te faahitihia ra “te [hoê] vahine faaturi” o te parau nei: “Aita vau i rave i te ohipa ino.” No reira, ua manaˈo matou e mai te hoê aeto e rere ra na roto i te reva, te hoê ophi i nia iho i te mato, aore ra te pahi e tere ra na tua, e nehenehe te hoê taata e rave huna i te tahi ohipa tano ore ia ore o ˈna ia noaahia mai. Manaˈo atura ïa matou e auraa tano ore to te parau “te eˈa o te tane i ǒ te vahine apî.” Mai te huru ra ïa te faahinaaro ra te hoê tane apî i te hoê vahine apî, aita râ teie potii i ite e te tamata ra teie tane i te faahema ia ˈna no te taoto ia ˈna.

Tera râ, e tumu papu ia hiˈopoa-⁠faa⁠hou-hia teie irava inaha aita te taata papai i huru ê ia ˈna i faahiti i teie mau mea, ua faahiahia roa râ o ˈna.

Te haapapu atoa ra te mau papai tahito reo Hebera i te reira. Ia au i te hoê papai, ia parauhia i roto i te Maseli 30:18 “e toru ohipa aita vau e maramarama ra,” te faaite nei te reira e ua faahiahia roa te hoê taata i te tahi ohipa, e eita e haere ia ˈna ia faataa.

Ua haapapu atoa te orometua haapii ra o Crawford Toy no te fare haapiiraa tuatoru no Harvard i Marite, aita teie irava Bibilia e faahiti ra i te tahi mea tano ore. Ua parau hoi o ˈna: “I ǒ nei, te faataa ra te taata papai i te huru faahiahia o teie mau ohipa.”

No reira, mea tano aˈe ia parau e te faataa ra te Maseli 30:18, 19 i te mau ohipa faahiahia mau, aita hoi tatou e maramarama ra. Mai te taata papai Bibilia, e faahiahia roa tatou a ite ai e nafea te hoê aeto ia maurere, e nafea te hoê ophi aita to ˈna e avae e faahee ai na nia i te hoê mato, e nafea te hoê pahi era aˈe te rahi e tere ai na nia i te miti, e e nafea te hoê tane apî e te hoê vahine apî e here ai te tahi i te tahi a oaoa ˈtu ai i roto i to raua oraraa.