“Na Iehova hoi te aroraa”

I 1999, ua titau te hau Farani i te amaa ia aufau i te tute i nia i te mau ô tei fanaˈohia e ratou mai 1993 tae roa 1996. Ua tuu matou i teie ohipa i mua i te mau tiripuna i Farani, aita râ i manuïa. Ua horo faahou matou i teie ohipa, aita atoa i manuïa. Ua haru ïa te hau Farani hau atu i te 540 mirioni moni farane a te mau Ite no Iehova. Te hororaa hopea, i mua ïa i te Tiripuna Europa o te tiaraa o te taata. O ta matou ïa i rave. Na mua râ, ua ani mai teie Tiripuna Europa ia farerei matou e te mau paruru a te hau Farani e te hoê tia no te Tiripuna Europa ia faaafaro matou i teie fifi.

E papai parau a te haava te tia o te Tiripuna Europa. Ua manaˈo matou e faahepo taua vahine ra ia matou ia aufau i te tahi tino moni i te hau Farani. Teie râ, ua taa maitai ia matou e ia aufau matou hoê noa ˈˈe moni farane, e ofati ïa matou i te mau aratairaa Bibilia. No te mea na te mau taeae e tuahine tera rahiraa ô no te turu i te Faatereraa arii a te Atua. E ere ïa ta ratou mau ô na te hau fenua. (Mat. 22:21) Noa ˈtu râ, ua farii matou i te aniraa a te Tiripuna Europa no to matou faatura ia ratou.

Ua farerei matou i roto i te hoê piha haavaraa nehenehe mau. I te haamataraa iho â, ua parau roa te papai parau ia aufau iho â te mau Ite no Iehova i tera rahiraa tute. I reira ïa to matou uiraa ia ˈna: “Ua ite anei oe e ua haru ê na te hau Farani hau atu i te 540 mirioni moni farane?”

Ua oti roa o ˈna. Ua haapapu mai iho â te mau paruru a te hau fenua e tera iho â tei tupu. Taui roa ihora te manaˈo o teie vahine. Tamaˈi atura o ˈna ia ratou, e i ǒ noa mau atura ta matou aparauraa. Taa ihora ia ˈu e na Iehova i rave e ia upootia matou i roto i teie ohipa. Ua oaoa roa matou, ua maere roa atoa râ no tei tupu.

I te 30 no Tiunu 2011, rave atura te Tiripuna Europa i te faaotiraa e turu i te mau Ite no Iehova. Inaha, aita roa ˈtu i tano tera faaaufauraa i te tute. Faahepohia ˈtura te hau Farani ia faahoˈi i te moni ta ratou i haru e te tahi atu tino moni. Maoti teie faaotiraa mana i paruruhia ˈi te haamoriraa mau i Farani tae roa mai i teie mahana. E nehenehe e faaau i te uiraa ta matou i ui i te papai parau i te ofai o tei haapohe ia Golia. E ua manuïa matou i roto i teie hororaa. Maoti ïa o vai? Mai ta Davida i parau ia Golia “na Iehova hoi te aroraa.”—Sam. 1, 17:45-47.

E ere a tahi ra matou a upootia ˈi. Noa ˈtu te patoiraa a te hau fenua e a te mau haapaoraa, ua upootia matou i roto 1 225 hororaa i te mau tiripuna teitei roa ˈˈe i e 70 fenua e i te mau tiripuna nunaa rau. Maoti teie mau upootiaraa i paturuhia ˈi to tatou mau tiaraa faufaa, mai te tiaraa e haamori ia Iehova, e apiti i te pororaa, eiaha e apiti i te mau oroa here aiˈa, e patoi atoa i te toto.

Mea nahea hoi au i te ôraa i roto i tera hororaa i te Tiripuna Europa, inaha te tavini ra vau i te pu rahi a te mau Ite no Iehova i New York i Marite?

TE ITOITO RAHI O TO ˈU NA METUA

Ua haere to ˈu na metua o George raua Lucille i te 12raa o te piha Haapiiraa no Gileada. Te tavini ra raua ei mitionare i Etiopia i to ˈu fanauraahia mai i 1956. Ua topa raua ia ˈu i te iˈoa Philip, no roto mai tera iˈoa i te Bibilia. (Ohi. 21:8) I 1957, ua opani te hau faatere i ta tatou haamoriraa. Ua tamau noa râ matou i te haamori ia Iehova ma te haapao maitai ia ore ia itehia mai. Ua au roa vau i tera raveraa i to ˈu nainairaa! Tera noa râ, ua faahepo te hau faatere ia matou ia faarue i te fenua Etiopia i 1960.

Ua reva matou i Wichita, i Kansas i Marite. Aita te itoito rahi o to ˈu na metua i iti mai no te pororaa. Inaha, ua haapii mai raua ia ˈu, ia Judy to ˈu tuahine paari aˈe e ia Lesly to ˈu taeae apî aˈe tei fanau-atoa-hia i Etiopia, ia here e ia tavini ia Iehova ma to matou aau atoa. Ua bapetizohia vau i te 13raa o to ˈu matahiti. E toru matahiti i muri mai, ua reva matou i Arequipa i Peru no te mea te hinaarohia ra te tauturu i reira.

I 1974, 18 noa matahiti to ˈu, ua tono te amaa no Peru ia ˈu e e maha taeae e tavini ei pionie taa ê. Ta matou tuhaa fenua, aita ïa i porohia aˈenei, to nia roa hoi i te mau anairaa mouˈa. Ua poro atoa matou i te mau taata o te paraparau ra i te reo Quechua e te reo Aymara. Mea na nia matou i te hoê pereoo nohoraa ta matou i pii Te araka, no te mea e afata te hohoˈa o tera nohoraa. Mea au roa na ˈu ia haamanaˈo i tera mau mahana a faaohipa ˈi matou i te Bibilia no te faaite i te taata fatata Iehova i te faaore roa i te veve, te maˈi e te pohe. (Apo. 21:3, 4) E mea rahi tei riro mai ei tavini na Iehova.

TE TAVINIRAA I TE PU RAHI

I 1977, ua tere mai o Albert Schroeder, mero o te Tino aratai a te mau Ite no Iehova, i Peru. Ua faaitoito mai o ˈna ia ˈu ia faaî i te tahi parau aniraa no te tavini i te pu rahi. O ta ˈu ïa i rave. I te 17 no Tiunu 1977 to ˈu haamataraa i te tavini i te Betela no Brooklyn. E maha matahiti to ˈu ohiparaa i te Tuhaa haapao i te tamâraa e te atuaturaa.

I Tiunu 1978, ua farerei au ia Elizabeth Avallone i te hoê tairururaa nunaa rau i Nouvelle-Orléans i Louisiane. Te tavini atoa ra to ˈna na metua ia Iehova. E pionie tamau o ˈna a maha ˈtura matahiti, e mea au roa na ˈna ta ˈna taviniraa taime taatoa. Haamatau atura mâua, e here roa ˈtura mâua te tahi i te tahi. Faaipoipo atura mâua i te 20 no Atopa 1979. O mâua atura ïa te taviniraa i te Betela.

Mea here roa te mau taeae e tuahine o ta mâua amuiraa matamua, oia hoi Brooklyn Paniora, ia mâua. Oia atoa na amuiraa e toru i muri mai i reira mâua i te tonoraahia. Ua faaitoito mai ratou ia mâua ia tamau noa i ta mâua taviniraa i te Betela. Te mauruuru roa nei mâua no te reira, e no te turu a te mau hoa e a te fetii o tei aupuru i to mâua na metua ruhiruhia.

TA ˈU OHIPA I TE TUHAA HAAPAO I TE PAE O TE TURE

I Tenuare 1982, ua tavini au i te Tuhaa haapao i te pae o te ture. E toru matahiti i muri mai, ua haere au i te haapiiraa tuatoru no te riro mai ei paruru, mai tei anihia mai. I reira to ˈu iteraa e auaˈe te mau upootiaraa a te mau Ite no Iehova i roto i ta ratou mau hororaa i te haavaraa, i fanaˈo ai to Marite e to te tahi atu mau fenua i te tiamâraa i roto e rave rahi tuhaa. Ua tuatapapa matou i tera mau hororaa i ta ˈu haapiiraa.

I 1986, e 30 ïa matahiti to ˈu, ua faatoroahia vau ei tiaau o te Tuhaa haapao i te pae o te ture. Ua oaoa roa vau i te tiaturi rahi o te Betela ia ˈu noa ˈtu to ˈu apî. Ua taiâ atoa râ vau no te mea aita vau i ite pauroa e e ere atoa i te ohipa nainai.

Ua riro mai au ei paruru i 1988. Aita râ vau i ite oioi e te fifihia ra to ˈu auhoaraa e o Iehova. E nehenehe hoi te haapiiraa teitei e turai i te hoê taata ia faatietie ia ˈna, a manaˈo atu ai e mea faahiahia aˈe o ˈna i te feia aita i haere i te haapiiraa teitei. Auaˈe Elizabeth i tauturu mai ia ˈu ia rave faahou i ta ˈu i matau i te rave na mua ˈˈe no te haapuai i to ˈu auhoaraa e o Iehova. Ua papu roa ia ˈu e te mea faufaa roa ˈˈe i roto i te oraraa, e ere te ite rahi. O te auhoaraa piri roa râ e o Iehova e te here rahi ia ˈna e i to ˈna nunaa.

TE PATURURAA E TE HAAPAPURAA I TE PARAU APÎ OAOA I MUA I TE TURE

I muri mai i ta ˈu haapiiraa ture, tauturu maitai atura ïa vau i te Tuhaa haapao i te pae o te ture i te Betela, a paturu atoa ˈi i te faanahonahoraa a Iehova e to tatou tiaraa e poro i te parau apî oaoa. Mea au roa na ˈu ta ˈu ohipa. E ere râ mea ohie i te tahi taime, ia tupu iho â râ te tahi mau tauiraa. Ei hiˈoraa, i matau noa na tatou i te faaaufau i ta tatou mau papai. Teie râ, mai 1991 mai, ua faaotihia eiaha e na reira faahou. Ua anihia ïa i te Tuhaa haapao i te pae o te ture ia horoa i te mau aratairaa ia faaohipahia tera tauiraa. E nehenehe ïa te mau Ite no Iehova e pûpû i ta ratou mau papai ma te tamoni ore. Ua faaohie teie tauiraa i te ohipa i te Betela e i roto i te pororaa. Eita atoa ïa tatou e faaaufauhia i te tute. Teie râ, ua manaˈo vetahi e iti roa mai ta tatou moni. Eita ïa e navai faahou te papai e pûpû na te taata, eita ïa te taata e ite o vai o Iehova. Tera râ, e ere te reira tei tupu. I 1990, ua rahi roa mai te taata e tavini ra ia Iehova. E i teie mahana, e nehenehe te taata e fanaˈo i te maa pae varua ma te tamoni ore. Ua ite mata roa vau e maoti te aha i manuïa maitai ai teie mau tauiraa i te pae faanahonahoraa. Oia ïa te tauturu e te aratairaa ta Iehova e horoa ra na roto i te tavini haapao maitai e te paari.—Exo. 15:2; Mat. 24:45.

E ere no te mea noa e paruru aravihi ta tatou e manuïa ˈi ta tatou mau hororaa i te haavaraa. Pinepine na te haerea maitai o te mau tavini a Iehova e turai i te mau haava e te mau tia mana ia turu ia tatou. Ua ite au i te hoê tupuraa i 1998, i te haereraa e toru mero o te Tino aratai e ta ratou vahine faaipoipo i te tahi tairururaa taa ê i Cuba. Ua faaite ratou pauroa i te haerea hamani maitai e te faatura. Ua haapapu maitai te reira i te mau tia mana e aita iho â tatou e apiti nei i te mau ohipa poritita.

I te tahi râ taime, te ravea hoê roa no te faaafaro i te hoê ohipa tano ore, o “te patururaa [ïa] e te haapapuraa i te parau apî oaoa i mua i te ture.” (Phil. 1:7) Ei hiˈoraa, e rave rahi matahiti to te mau hau faatere na Europa e i Korea apatoa patoiraa i to tatou tiaraa eiaha e rave i te tau faehau. No reira ïa 18 000 taeae i Europa e hau i te 19 000 taeae i Korea apatoa tei tuuhia i roto i te fare tapearaa, no te mea aita ratou i hinaaro e rave i ta ratou tau faehau.

I te pae hopea, i te 7 no Tiurai 2011 i roto i te haavaraa Bayatyan e Arménie, ua rave te Tiripuna Europa o te tiaraa o te taata i te hoê faaotiraa faufaa roa. Ua faahepo tera tiripuna i te mau hau fenua na Europa taatoa ia ore te hoê taata e rave i ta ˈna tau faehau, a faarave ïa ia ˈna i te tahi ohipa no te maitai o te huiraatira. Tera atoa te faaotiraa tei ravehia i te Tiripuna pǎpǎ ture no Korea apatoa i te 28 no Tiunu 2018. Ahani te tahi mau taeae apî i fati, eita roa ïa e ravehia teie mau faaotiraa faufaa mau.

Te rohi nei te Tuhaa haapao i te pae o te ture i te pu rahi e i te mau amaa atoa na te ao nei i te paturu i to tatou tiaraa e haamori ia Iehova, e poro atoa i te Faatereraa arii. Te oaoa roa nei matou i te turu i to tatou mau taeae e tuahine o te faaruru nei i te patoiraa a te hau fenua. E noa ˈtu eita matou e upootia i roto i te hoê hororaa, ua poro râ matou i te mau tavana, te mau arii e te feia o te mau nunaa ěê. (Mat. 10:18) Inaha, e irava Bibilia to roto i ta matou mau api parau atoa i faaineine e ta matou atoa i faahiti i te tiripuna. Papu roa ïa e hiˈopoahia te reira e te mau haava, te mau tia a te hau faatere, a te mau ravea haaparareraa parau e te huiraatira atoa. Mea na reira ïa te mau taata aau haavare ore e ite ai o vai mau â te mau Ite no Iehova e ua niuhia ta ratou mau tiaturiraa i nia i te Bibilia. E ua riro mai vetahi o ratou ei tavini na Iehova.

MAURUURU IA OE E IEHOVA!

I te roaraa e 40 matahiti, ua nehenehe au e tauturu i te mau amaa na te ao nei i roto i ta ratou mau hororaa i te haavaraa, no te tia ˈtu i mua i te mau tiripuna teitei e e rave rahi atoa mau tia mana. Mea here roa na ˈu i to ˈu mau hoa ohipa o te Tuhaa haapao i te pae o te ture i te pu rahi e i te mau amaa na te ao nei. Mea rahi te mau haamaitairaa ta ˈu i fanaˈo i te roaraa o to ˈu oraraa.

Ua turu noa mai Elizabeth ia ˈu ma te here i te roaraa o na 45 matahiti i mairi i te mau taime atoa. Faahiahia roa vau ia ˈna no to ˈna itoito rahi noa ˈtu to ˈna maˈi o te haaparuparu ia ˈna.

Ua ite mata roa mâua, e ere te puai e te upootiaraa no ǒ mai i to tatou iho aravihi. Mai ta Davida hoi i parau “e puai o Iehova no to ˈna nunaa.” (Sal. 28:8) E tera iho â, “na Iehova hoi te aroraa.”