Te parururaa i te parau apî maitai i mua i te ture

I TE roaraa o to te taata paturaa i te mau oire, ua hamani atoa oia i te mau patu. I tahito iho â râ, i riro na teie mau pa etaeta ei paruru. Mai nia mai i teie mau pa, e nehenehe te feia paruru e aro no te paruru i te mau patu eiaha ia ôhia aore ra ia tuinohia e te feia e aro maira. E ere noa te feia e noho ra i roto i te oire te paruruhia, mea pinepine atoa râ te feia e faaea ra i roto i te mau oire rii e haaati ra i te fanaˈo i te haapuraa i roto mai i te mau patu.—Samuela 2, 11:20-24; Isaia 25:12.

Oia atoa, ua faatia te mau Ite no Iehova i te hoê patu parururaa—te hoê patu i au i te ture. Aita teie patu i faatiahia no te faataa ê i te mau Ite i te toea o te totaiete taata, no te mea ua matauhia te mau Ite no Iehova no to ratou huru e au i te taata, e te faahoa haere noa. Aita, ua haapapu te reira i te mau tiamâraa tumu no te mau taata atoa. I taua atoa taime ra, e paruru te reira i te mau tiaraa e au i te ture a te mau Ite ia nehenehe ratou ia haapao noa i ta ratou haamoriraa. (A faaau e te Mataio 5:14-16.) E paruru teie patu i ta ratou huru haamoriraa e to ratou tiaraa no te poro i te parau apî maitai o te Basileia o te Atua. Eaha teie patu, e nafea to ˈna faatiaraahia?

Te faatiaraa i te hoê patu parururaa e au i te ture

Noa ˈtu e te fanaˈo nei te mau Ite no Iehova i te tiamâraa pae faaroo i roto i te rahiraa o te mau fenua, i roto i te tahi mau fenua, ua arohia ratou ma te tia ore. Ia haafifihia to ratou tiamâraa no te haamori na roto i te putuputuraa ratou ratou iho aore ra na roto i te pororaa i tera e tera fare, ua tuu ratou i te reira mau tumu parau i mua i te ture. E rave rahi tausani mau haavaraa o te mau Ite te tumu na te ao atoa nei.a Aita te taatoaraa i manuïa. Ia faaoti râ te mau tiribuna nainai aˈe i te mau haavaraa o te ore e au ia ratou, mea pinepine ratou i te horo faahou i mua i te mau tiribuna teitei aˈe. Eaha te faahopearaa?

I te roaraa o te mau ahuru matahiti o te senekele 20, ua haamau te mau upootiaraa i mua i te ture i te mau hiˈoraa papu i te pae haavaraa ta te mau Ite no Iehova i faahiti i roto i te mau haavaraa e au i te reira. Mai te mau ofai o te hoê patu, e au teie mau faaotiraa maitai i te hoê patu parururaa e au i te ture. Mai nia mai i teie patu o te mau hiˈoraa i te pae haavaraa, ua tamau noa te mau Ite i te aro no te tiamâraa pae faaroo no te haapao i ta ratou haamoriraa.

E rave anaˈe ei hiˈoraa, i te haavaraa a Murdock e te Commonwealth of Pennsylvania, i faaotihia e te Tiribuna Teitei roa ˈˈe a te mau Hau Amui no Marite i te 3 no Me 1943. Teie te uiraa i faahitihia i reira: E tia anei ia noaa i te mau Ite no Iehova te hoê patana no te opere i ta ratou mau papai faaroo? Ua onoono te mau Ite no Iehova eiaha ratou ia titauhia ia na reira. E ere ta ratou ohipa pororaa—e mai mutaa mai â—i te tapihooraa. Ta ratou tapao, e ere ïa te imiraa i te moni, te pororaa râ i te parau apî maitai. (Mataio 10:8; Korinetia 2, 2:17) I roto i te faaotiraa a te haavaraa a Murdock, ua faatano te Tiribuna i te mau Ite, ma te parau e eita e au i te pǎpǎ ture te titauraa ia aufau i te hoê patana no te opere i te mau papai faaroo.b Ua haamau teie faaotiraa i te hoê hiˈoraa i te pae haavaraa faufaa mau, e mai reira mai, ua manuïa te mau Ite i te faahitiraa i te reira ei parau mana i roto i te mau haavaraa e rave rahi. Ua riro te faaotiraa a te haavaraa a Murdock ei ofai faufaa mau i nia i te patu parururaa e au i te ture.

Mea faahiahia roa teie mau haavaraa no te paruru i te tiamâraa pae faaroo o te taata atoa. No nia i tei ravehia e te mau Ite no Iehova no te paruru i te mau tiaraa tivila i te mau Hau Amui no Marite, ua parau te University of Cincinnati Law Review e: “Ua ohipa maite te mau Ite no Iehova i nia i te haereraa i mua o te pǎpǎ ture, na roto iho â râ i te faaaanoraa i te mau otia paruru i te pae o te faaiteraa manaˈo e te faaroo.”

Faaetaetaraa i te patu

I te mau upootiaraa atoa i mua i te ture, e etaeta roa ˈtu â te patu. A hiˈo na i te tahi o te mau faaotiraa i roto i te mau matahiti 1990 i fanaˈohia e te mau Ite no Iehova, e te tahi atoa ˈtu â feia na te ao nei mea au na ratou te tiamâraa.

Heleni. I te 25 no Me 1993, ua paturu te Tiribuna no Europa no te mau Tiaraa o te Taata, i te tiaraa o te hoê taata huiraatira Heleni e haapii i ta ˈna mau tiaturiraa faaroo ia vetahi ê. O Minos Kokkinakis, 84 matahiti to ˈna i taua taime ra, te taata i haavahia. Ei Ite no Iehova, ua haruhia Kokkinakis hau atu i te 60 taime mai te matahiti 1938 mai, e 18 taime to ˈna titauraahia i mua i te mau tiribuna Heleni, e hau atu i te ono matahiti to ˈna tapearaahia i te fare tapearaa. Ua faautuahia oia ia au i te hoê ture Heleni no te mau matahiti 1930 e opani ra i te haaparareraa i te faaroo—no taua ture ra i haruhia ˈi fatata e 20 000 mau Ite no Iehova mai te matahiti 1938 e tae atu i te matahiti 1992. Ua faaoti te Tiribuna no Europa e ua ofati te faatereraa Heleni i te tiamâraa pae faaroo o Kokkinakis e ua faautua ˈtura ia ˈna e aufau i te hoê tino moni 14 400 dala Marite. I roto i ta ˈna faaotiraa, ua haapapu te Tiribuna e e “haapaoraa matauhia” te mau Ite no Iehova.—A hiˈo i Te Pare Tiairaa o te 1 no Setepa 1993, mau api 27-31.

Mexico. I te 16 no Tiurai 1992, e taahiraa avae rahi tei ravehia i Mexico no te parururaa i te tiamâraa pae faaroo. I taua taio mahana ra, ua haamauhia te Ture o te mau Taatiraa Faaroo e te Haamoriraa Huiraatira. Maoti teie ture, e nehenehe te hoê pûpû faaroo e tiamâ i mua i te ture ei faanahoraa faaroo na roto i te tapaoraa i te iˈoa ia au i tei titauhia. Na mua ˈˈe, te vai noa ra te mau Ite no Iehova mai te reira, oia atoa te tahi atu mau haapaoraa i taua fenua ra, aita râ ratou e tiamâ ra i mua i te ture. I te 13 no Eperera 1993, ua rave te mau Ite e tapao i to ratou iˈoa. Mea oaoa roa e i te 7 no Me 1993, ua tiamâ ratou i mua i te ture mai te La Torre del Vigía, A. R., e Los Testigos de Jehová en México, A. R., e mau taatiraa faaroo e piti atoa ra.—A hiˈo i te A ara mai na! o te 22 no Tiurai 1994, mau api 12-14 (Farani).

Beresilia. I te avaˈe Novema 1990, ua faaara te Pu o te Afata Turuutaa a te Hau no Beresilia (INSS) e e ere faahou te amaa a te Taiete Watch Tower o te faaohipa i te mau tavini rima tauturu i te Betela (te iˈoa o te fare o te amaa a te mau Ite no Iehova) i te mau tavini pae faaroo e no reira e riro ïa ratou i raro aˈe i te mau ture a te feia rave ohipa no Beresilia. Ua horo faahou te mau Ite no taua faaotiraa ra. I te 7 no Tiunu 1996, ua rave te Apooraa Haavaraa a te Piha ohipa a te Auvaha ture Rahi i Brasilia i te hoê faaotiraa o te paturu i te tiaraa o te mau tavini o te Betela ei melo no te hoê faanahoraa faaroo, eiaha ei mau rave ohipa no te ao.

Tapone. I te 8 no Mati 1996, ua rave te Tiribuna Teitei roa ˈˈe no Tapone i te hoê faaotiraa no nia i te haapiiraa e te tiamâraa pae faaroo—maitai ïa no te mau taata atoa i Tapone. Ua faaoti te taatoaraa o te tiribuna e ua ofati te fare haapiiraa tuatoru ra Kobe Municipal Industrial Technical College i te ture i to ˈna tiavaruraa ia Kunihito Kobayashi no to ˈna patoiraa e rave i te faaineineraa i te mau taputoraa Tapone. Na roto i teie ture, a tahi ra ïa te Tiribuna Teitei i rave ai i te hoê faaotiraa no nia i te tiamâraa pae faaroo i haapapuhia e te Pǎpǎ ture Tapone. Ma te pee i to ˈna haava manaˈo i haapiihia ia au i te Bibilia, ua manaˈo teie Ite apî e aita teie mau faaineineraa i au i te mau faaueraa tumu a te Bibilia e itehia ra i roto i te Isaia 2:4 e na ô ra e: “E tiapai ratou i ta ratou ˈoˈe ei auri arote, e ta ratou mau mahae ei tipi tope raau; e ore te hoê fenua e aa mai i te tahi fenua i te ˈoˈe, e ore hoi ratou e haapii faahou i te tamaˈi.” Ua haamau ïa te faaotiraa a te Tiribuna i te hoê hiˈoraa no to a muri aˈe mau haavaraa.—A hiˈo i Te Pare Tiairaa o te 1 no Novema 1996, mau api 19-21.

I te 9 no Febuare 1998, ua rave te Tiribuna Teitei no Tokyo i te tahi atu â faaotiraa rahi o tei paturu i te tiaraa o te hoê Ite o Misae Takeda te iˈoa e patoi i te rapaauraa aita e au ra i te faaueraa a te Bibilia ‘eiaha e amu i te toto.’ (Ohipa 15:28, 29) Ua tuuhia teie haavaraa i roto i te Tiribuna Teitei roa ˈˈe, e te toe ra i te hiˈo e e paturuhia anei te faaotiraa a te Tiribuna Teitei.

Philipino. I roto i te hoê faaotiraa i ravehia i te 1 no Mati 1993, ua faaoti te taatoaraa o te Tiribuna Teitei roa ˈˈe no Philipino no te maitai o te mau Ite no Iehova i roto i te haavaraa a te tahi mau Ite apî i tiavaruhia i to ratou fare haapiiraa no to ratou patoiraa e haamori i te reva.

E au te mau faaotiraa maitai atoa a te tiribuna i te mau ofai hau faaetaetaraa i te patu e au i te ture o te paruru i te mau tiaraa eiaha noa o te mau Ite no Iehova o te mau taata atoa râ.

Atuaturaa i te patu

Ua tapaohia te iˈoa o te mau Ite no Iehova i mua i te ture i roto i na fenua 153, e te fanaˈo nei ratou ma te tia i te mau tiamâraa e rave rahi, mai te tahi atu mau haapaoraa i fariihia. I muri aˈe i te mau ahuru matahiti hamani-ino-raa e opaniraa i Europa Hitia o te râ e i te mau Hau Amui no Rusia tahito, ua tiamâ te mau Ite no Iehova i teie nei i mua i te ture i roto i te mau fenua mai ia Albanie, Bélarus, Repubilita no Tekolovakia, Géorgie, Honederia, Kazakhstan, Kyrgyzstan, Rumania e Slovaquie. Teie râ, i roto i te tahi mau fenua i teie mahana, tae noa ˈtu i roto i te tahi no Europa Tooa o te râ mea maoro hoi te faanahoraa haavaraa i te haamauraahia, te haafifi-rahi-hia ra aore ra te patoihia ra te mau tiaraa o te mau Ite no Iehova. Te itoito rahi nei te feia patoi i te tamataraa i te “faatia i te hamani ino i te ture ra” i te mau Ite. (Salamo 94:20) Nafea ratou e pahono ai?c

E hinaaro te mau Ite no Iehova e auraro i te mau faatereraa, e hinaaro atoa râ ratou e fanaˈo i te tiamâraa no te haapao i ta ratou haamoriraa. E tiaturi papu ratou e aita e faufaa to te mau ture aore ra mau faaotiraa a te tiribuna atoa o te opani ia faaroo ratou i te mau faaueraa a te Atua—tae noa ˈtu i te faaueraa e poro i te parau apî maitai. (Mareko 13:10) Ia ore ia roaa te mau faatiaraa hau noa, e rave te mau Ite no Iehova i te aroraa i mua i te ture, ma te faaohipa i te mau ravea hororaa atoa e titauhia ia noaa mai te paruru e au i te ture no to ratou tiaraa i horoahia mai e te Atua e haapao i ta ratou haamoriraa. E tiaturi roa te mau Ite no Iehova i te tǎpǔ a te Atua: “Te mauhaa ra na oe i hamanihia ˈi ra e ore ïa e tupu.”—Isaia 54:17.

[Nota i raro i te api]

[Tumu parau tarenihia i te api 21]

Te parururaa i te mau tiaraa o te mau Ite no Iehova

No to ratou hamani-ino-raahia i titauhia ˈi ia haere te mau Ite no Iehova i mua i te mau haava e te feia toroa a te hau na te ao nei. (Luka 21:12, 13) Aita te mau Ite no Iehova i tapea ia ratou i te paruru i to ratou mau tiaraa i mua i te ture. Ua tauturu te mau upootiaraa i te pae haavaraa i roto i te mau fenua e rave rahi i te paruru i te tiamâraa o te mau Ite no Iehova i mua i te ture, tae noa ˈtu i to ratou tiaraa no:

◻ te poro i tera e tera fare ma te ore e taotiahia e te mau faatureraa faahepohia i te feia tapihoo—Murdock e Commonwealth of Pennsylvania, Tiribuna Teitei roa ˈˈe a te mau Hau Amui no Marite (1943); Kokkinakis e Heleni, Tiribuna no Europa no te mau Tiaraa o te Taata (1993).

◻ te putuputu no te haamoriraa ma te ore e haapeapeahia—Manoussakis e te tahi atu â e Heleni, Tiribuna no Europa no te mau Tiaraa o te Taata (1996).

◻ te faaoti nafea ratou e faaite ai i te faatura i te reva aore ra tapao taipe o te fenua ma te haapao maitai—Tomite no te Haapiiraa o te Hau no Virginie Tooa o te râ e Barnette, Tiribuna Teitei roa ˈˈe a te mau Hau Amui no Marite (1943); Tiribuna Teitei roa ˈˈe no Philipino (1993); Tiribuna Teitei roa ˈˈe no Inidia (1986).

◻ te patoi i te tau faehau o te faahuru ê i to ratou haava manaˈo Kerisetiano—Georgiadis e Heleni, Tiribuna no Europa no te mau Tiaraa o te Taata (1997).

◻ te maiti i te mau rapaauraa e te mau raau o te ore e faahuru ê i to ratou haava manaˈo—Malette e Shulman, Ontario, Kanada, Tiribuna Hororaa (1990); Watch Tower e E.L.A., Tiribuna Teitei, San Juan, Porto Rico (1995); Fosmire e Nicoleau, New York, Hau Amui no Marite, Tiribuna Hororaa (1990).

◻ te aratai i to ratou mau tamarii ia au i ta ratou mau tiaturiraa Bibilia noa ˈtu e e haafifihia teie mau tiaturiraa e te mau mârôraa na vai e haapao i te tamarii—St-Laurent e Soucy, Tiribuna Teitei roa ˈˈe no Kanada (1997); Hoffmann e Auteteria, Tiribuna no Europa no te mau Tiaraa o te Taata (1993).

◻ te fanaˈo i te mau taatiraa e au i te ture e te ohipa na roto i te reira, o te ore e tutehia mai te mau taatiraa e faaohipahia e te tahi atu mau haapaoraa fariihia—Te tahi feia e Haring, New York, Hau Amui no Marite, Tiribuna Hororaa (1960).

◻ te fanaˈo i te hoê â huru faatuteraa i te feia i nominohia no te tahi taviniraa taa ê ma te taime taatoa e te mau rave ohipa ma te taime taatoa a te tahi atu mau haapaoraa—Pu o te Afata Turuutaa a te Hau no Beresilia, Brasilia, (1996).

[Hohoˈa i te api 20]

Minos Kokkinakis e ta ˈna vahine

[Hohoˈa i te api 20]

Kunihito Kobayashi

[Faaiteraa i te fatu o te hohoˈa i te api 19]

The Complete Encyclopedia of Illustration/J. G. Heck