E nafea ia horoa i te mau aˈoraa?

1. O vai te titauhia ia horoa i te aˈoraa? A faataa na.

MEA au anei na oe e horoa i te aˈoraa? Mea ohie no vetahi ia na reira. Area no te tahi atu, e mǎtaˈu ïa aore ra e huru ê ratou. I te tahi râ taime, e titauhia ia horoa tatou pauroa i te aˈoraa. No te aha? No te mea ua parau Iesu e itehia o vai ta ˈna mau pǐpǐ i to ratou here te tahi i te tahi. (Ioa. 13:35) Te tahi ravea no te faaite i to tatou here, o te horoaraa ïa i te aˈoraa i to tatou mau taeae e tuahine. Te parau ra te Bibilia e ia na reira tatou “ma te haavarevare ore,” e piri atu â tatou te tahi i te tahi.—Mas. 27:9.

2. Eaha te titauhia i te mau matahiapo, e no te aha? (A hiˈo atoa i te tumu parau tarenihia “Aˈoraa i te putuputuraa o te hebedoma.”)

² E titauhia i te mau matahiapo ia ite e nafea ia horoa i te aˈoraa maitai. Ua maiti Iehova e o Iesu i teie mau taeae no te aupuru i te mau amuiraa. (Pet. 1, 5:2, 3) Hoê o te mau ravea e na reira ˈi ratou, o te horoaraa ïa i te mau aˈoraa niuhia i nia i te Bibilia ia vauvau ratou i te mau oreroraa parau. E titauhia atoa ia horoa ratou i te aˈoraa i te mau Kerisetiano tataitahi, tae noa ˈtu i tei atea ê i te amuiraa. E nafea te mau matahiapo, e o tatou pauroa, e horoa ˈi i te aˈoraa maitai?

3. (1) E nafea tatou e haapii ai i te horoa i te aˈoraa maitai? (Isaia 9:6; a hiˈo atoa i te tumu parau tarenihia “A horoa i te aˈoraa mai ia Iesu.”) (2) Eaha ta tatou e hiˈo mai i roto i teie tumu parau?

³ E nehenehe tatou e haapii i te horoa i te aˈoraa maitai ma te hiˈopoa i te tahi mau hiˈoraa i roto i te Bibilia. O Iesu iho â ïa te hiˈoraa maitai roa ˈˈe. Ua topahia to ˈna iˈoa o “Aˈo faahiahia.” (A taio i te Isaia 9:6.) I roto i teie tumu parau, e hiˈo mai tatou eaha te rave ia anihia mai te aˈoraa, e eaha te rave mai te peu e titauhia ia horoa tatou i te aˈoraa noa ˈtu aita i anihia mai. E hiˈo atoa mai tatou i te faufaaraa ia horoa i te aˈoraa i te taime tano e ma te tano.

IA ANIHIA MAI TE AˈORAA

4-5. Ia anihia mai te aˈoraa, eaha te titauhia ia rave tatou na mua roa? A horoa i te hoê hiˈoraa.

⁴ Ia ani mai te tahi hoa i te aˈoraa, eaha to tatou huru? E oaoa paha tatou, a hinaaro atu ai e tauturu oioi ia ˈna. Na mua roa râ, mea maitai ia ui tatou, ‘Mea tano anei e na ˈu e horoa ˈtu i te aˈoraa?’ I te tahi taime, te ravea maitai roa ˈˈe, o te tautururaa ïa i to tatou hoa ia ani i te tahi taata o tei ite maitai i to ˈna tupuraa.

⁵ Teie te tahi hiˈoraa. A feruri na e ua maˈi-roa-hia to oe hoa. E parau o ˈna ia oe e ua imi o ˈna i te tahi mau ravea rapaauraa. E ani mai ïa o ˈna i to oe manaˈo. Mea au paha na oe te tahi ravea rapaauraa, e ere râ oe i te taote. Aita ïa to oe e aravihi no te rapaau i te maˈi o to oe hoa. I roto i teie tupuraa, mea maitai aˈe ia tauturu i to oe hoa ia imi i te tahi taote o tei ite e nafea ia rapaau i to ˈna maˈi.

6. No te aha mea maitai ia tiai rii hou a horoa ˈi i te aˈoraa?

⁶ I te tahi taime, e manaˈo tatou e nehenehe tatou e horoa i te aˈoraa i to tatou hoa. Tera râ, mea maitai aˈe ia tiai rii. Te parau ra te Maseli 15:28 ‘e feruriruri te aau o te taata parau-tia hou a pahono ai.’ E nafea ïa tatou, noa ˈtu ua ite tatou eaha te parau? Na mua roa, e rave tatou i te mau maimiraa, e pure e e feruri maitai tatou eaha te aˈoraa e horoa. Ma te na reira, e tuati ta tatou mau aˈoraa i te hinaaro o Iehova. A tapao na i te hiˈoraa o te peropheta Natana.

7. Eaha te haapii mai i te hiˈoraa o te peropheta Natana?

⁷ Ua parau te arii Davida ia Natana e hinaaro o ˈna e patu i te hoê hiero no Iehova. Ua pahono oioi Natana ia Davida ia rave i tera opuaraa maitai. Teie râ, e ere tera to Iehova hinaaro. Ahani Natana i ani na mua ia Iehova eaha to ˈna manaˈo, eita ïa o ˈna e ru noa i te horoa i te aˈoraa. (Par. 1, 17:1-4) Te haapiiraa no tatou, ia anihia mai te tahi aˈoraa, “eiaha e ru i te paraparau.”—Iak. 1:19.

8. Eaha te tahi atu tumu e haapao maitai ai tatou ia horoa tatou i te aˈoraa?

⁸ Teie te tahi atu tumu e haapao maitai ai tatou ia horoa tatou i te aˈoraa i te tahi taata. Mai te peu mea tano ore tera aˈoraa, e nehenehe o ˈna e fifihia. No tatou atoa ïa te hape. No reira, mea faufaa roa ia feruri maitai tatou hou a horoa ˈi i te aˈoraa.

IA HOROA TATOU I TE AˈORAA NOA ˈTU AITA I ANIHIA MAI

9. Hou a horoa ˈi i te aˈoraa, eaha ta te mau matahiapo e hiˈopoa? (Galatia 6:1)

⁹ E titauhia ia aˈo te mau matahiapo i te hoê taeae aore ra tuahine o te haere ra na te eˈa “e hapa ˈi oia.” (A taio i te Galatia 6:1.) Te rave ra paha o ˈna i te tahi mau faaotiraa tano ore, o te nehenehe e turai ia ˈna ia rave i te hara. Te fa a te mau matahiapo, e tauturu ïa ia ˈna ia tamau i te tavini ia Iehova, a fanaˈo atu ai i te ora mure ore. (Iak. 5:19, 20) Na mua roa râ, e titauhia ia hiˈopoa ratou ua hapa iho â anei tera taeae aore ra tuahine. Te vaiiho nei hoi Iehova ia tatou pauroa ia rave i te tahi mau faaotiraa ia au i to tatou iho manaˈo haava. (Roma 14:1-4) Teie râ, ia ite te mau matahiapo e ua rave tera taeae aore ra tuahine i te tahi mea o te haafifi i to ˈna auhoaraa e o Iehova, i reira ïa ratou e horoa ˈi i te aˈoraa. E nafea ïa?

10-12. Eaha te titauhia i te mau matahiapo ia horoa ratou i te aˈoraa noa ˈtu aita i anihia mai? A horoa i te hoê hiˈoraa. (A hiˈo atoa i te hohoˈa.)

¹⁰ E ere i te mea ohie no te mau matahiapo ia horoa i te aˈoraa noa ˈtu aita i anihia mai. No te aha? Ua parau te aposetolo Paulo aita paha te tahi taata e ite ra e te haere ra o ˈna na te eˈa e hapa ˈi oia. No reira, te vai ra te tahi mau mea ta te mau matahiapo e nehenehe e rave ia farii taua taata ra i ta ratou mau aˈoraa.

¹¹ Teie te tahi hiˈoraa. E tamata te hoê taata faaapu i te tanu i te maa i roto i te repo paari. Hou a tanu ai i te maa, e utaru o ˈna na mua ia mǎrû mai te repo. I reira ïa o ˈna e nehenehe ai e patia i te maa i roto i te repo. E pîpî atoa o ˈna i ta ˈna i tanu. E tupu maitai ïa te maa. Hoê â huru no te hoê matahiapo o te horoa i te aˈoraa noa ˈtu aita i anihia mai. Na mua, e utaru o ˈna ia mǎrû mai te repo ei auraa parau. E tiai te matahiapo i te taime tano no te paraparau i to ˈna taeae no te faaite e te haapeapea ra oia no ˈna. Ia horoa o ˈna i te aˈoraa ma te here e te hamani maitai, mea ohie aˈe ïa no tera taeae ia farii i ta ˈna mau aˈoraa.

¹² A paraparau ai raua, e tamau te matahiapo i te “utaru,” ma te haamanaˈo i to ˈna taeae e o tatou pauroa te hapa. E titauhia ïa ia aˈohia tatou. (Roma 3:23) Ma te mǎrû e te faatura, e faaite te matahiapo maoti te Bibilia eaha ta ˈna i rave. Ia farii te taeae e ua hapa oia, i reira ïa te matahiapo e “tanu ai i te maa,” ma te faataa ia ˈna eaha te mau tauiraa e rave. Ia oti, e “pîpî” te matahiapo i ta ˈna i tanu, ma te haapopou i to ˈna taeae no ta ˈna mau ohipa maitai e ma te pure e o ˈna.—Iak. 5:15.

13. E nafea te mau matahiapo e ite ai e ua taa maitai i te taeae te aˈoraa?

¹³ I te tahi taime, eita e taa maitai i te hoê taata te aˈoraa e horoahia ra. E nafea ïa te mau matahiapo? Ma te hamani maitai, e nehenehe ratou e ui i te tahi mau uiraa i te taeae. E ite ïa ratou e ua taa anei ia ˈna te aˈoraa e eaha te titauhia ia taui o ˈna.—Koh. 12:11.

IA HOROA TATOU I TE AˈORAA I TE TAIME TANO E MA TE TANO

14. No te aha eiaha e horoa i te aˈoraa na roto i te riri? A faataa na.

¹⁴ E taata tia ore tatou pauroa. No reira tatou e parau ai aore ra e rave ai i te tahi mea e huru ê vetahi ê. (Kol. 3:13) Te parau ra hoi te Bibilia e nehenehe te hoê taata e parau aore ra e rave i te tahi mea e riri tatou. (Eph. 4:26) Tera râ, eiaha tatou e horoa i te aˈoraa na roto i te riri. No te aha? “Eita hoi te riri o te taata e faatupu i te parau-tia a te Atua.” (Iak. 1:20) Ia horoa tatou i te aˈoraa na roto i te riri, e ino roa ˈtu ïa. E ere te auraa eiaha tatou e faaite i to tatou manaˈo aore ra huru aau i te taata ta tatou e riri ra. Mea maitai aˈe râ ia tiai ia mǎrû mai tatou. E rave mai tatou i te hiˈoraa o Elihu, tei horoa i te aˈoraa maitai ia Ioba.

15. Eaha te haapii mai i te hiˈoraa o Elihu? (A hiˈo atoa i te hohoˈa.)

¹⁵ E rave rahi mahana, ua tamata Ioba i te faatitiaifaro i te mau mea hape ta to ˈna mau hoa i parau no nia ia ˈna. Ua faaroo noa ˈtu Elihu ia Ioba e ua aroha ia ˈna. Tera râ, i to Ioba faahaparaa ia Iehova, ua riri roa Elihu. Aita râ o ˈna i paraparau oioi ia Ioba. Ua tiai o ˈna i te taime tano no te aˈo ia ˈna na roto i te mǎrû e te faatura. (Ioba 32:2; 33:1-7) Te haapiiraa e huti mai: E horoa tatou i te aˈoraa i te taime tano e ma te tano, oia hoi ma te faatura e te here.—Koh. 3:1, 7.

A TAMAU I TE HOROA E I TE FARII I TE AˈORAA

16. Eaha te haapii mai i te Salamo 32:8?

¹⁶ Te parau ra Iehova: “E aˈo atu vau ia oe, ei nia to ˈu mata ia oe.” (A taio i te Salamo 32:8.) Te auraa, e tauturu noa Iehova ia tatou. Te fafau ra o ˈna i te horoa mai i te aˈoraa e i te tauturu ia tatou ia faaohipa i te reira. E hiˈoraa maitai roa ïa teie. Ia horoa tatou i te aˈoraa ia vetahi ê, e tamau atoa tatou i te faaitoito ia ratou e i te tauturu atu ia rave i te mau faaotiraa paari.

17. Ua faaauhia te mau matahiapo o te horoa i te aˈoraa Bibilia i te aha? A faataa na. (Isaia 32:1, 2)

¹⁷ Mea faufaa roa ia horoa e ia farii tatou i te mau aˈoraa maitai. (Tim. 2, 3:1) Ua faaauhia te mau matahiapo o te horoa i te mau aˈoraa no roto mai i te Bibilia i “te taheraa pape i te fenua pape ore.” (A taio i te Isaia 32:1, 2.) E mauruuru atoa tatou i te mau hoa aita e taiâ nei i te horoa mai i te aˈoraa ia titauhia. E au hoi ta ratou mau parau i “te apara auro i roto i te ario nanaˈohia.” (Mas. 25:11) No reira, e tamau tatou pauroa i te haapii e nafea ia horoa e ia farii i te mau aˈoraa maitai.