“A faaroo i te mau parau a te feia feruriraa paari”

1. No te aha e horoahia mai ai te aˈoraa e no te aha mea tano te reira no tatou?

I TE tahi taime, e hinaaro tatou pauroa i te aˈoraa. I roto i te tahi mau tupuraa, e ani paha tatou i te aˈoraa a te hoê taata ta tatou e faatura. I roto i te tahi atu mau tupuraa, na te hoê taeae paha e faaara mai ia tatou e te haere ra tatou “na te eˈa e hapa ˈi” tatou, te hoê ohipa o ta tatou e tatarahapa i muri iho. (Gal. 6:1) E ia rave tatou i te hoê hara, e aˈo-atoa-hia tatou. Noa ˈtu eaha te tumu i horoahia mai ai te aˈoraa, e titauhia ia tatou ia faaroo i te reira. Ei faahopearaa, e maitai e e ora tatou!​—Mas. 6:23.

2. Ia au i te Maseli 12:15, no te aha e titauhia ia faaroo tatou i te aˈoraa?

² Te faaitoito mai ra ta tatou irava tumu ia “faaroo i te mau parau a te feia feruriraa paari.” (Mas. 22:17) Aita hoê noa ˈˈe taata e ite i te mau mea atoa. Tera râ, mea aravihi aˈe paha vetahi ia tatou. (A taio i te Maseli 12:15.) No reira, ia faaroo tatou i te aˈoraa, tapao faaite ïa e mea haehaa tatou. E faaite atoa te reira e otia to tatou, e farii ïa tatou e te hinaaro ra tatou i te tauturu ia naea ta tatou mau fa. Ua haapapai Iehova i te arii Solomona: “E tupu [te mau opuaraa] mea rahi anaˈe te taata aˈo.”​—Mas. 15:22.

3. E nafea tatou e fanaˈo ai i te aˈoraa?

³ Te aˈoraa itehia mai ia tatou. E itehia mai paha ia tatou te aˈoraa i roto i te Bibilia aore ra i roto i ta tatou mau papai. E turai te reira ia tatou ia taui i to tatou huru feruriraa e haerea. (Heb. 4:12) Te aˈoraa horoahia mai. E nehenehe te hoê matahiapo aore ra te hoê Kerisetiano paari i te pae varua e haamahiti i te hoê tuhaa e titauhia ia tatou ia haamaitai. Ia horoa te hoê taata i te hoê aˈoraa Bibilia, tapao faaite ïa e te here ra o ˈna ia tatou. E titauhia ïa ia faaite i te mauruuru ma te faaroo e ma te tutava i te faaohipa i te aˈoraa.

4. Ia au i te Koheleta 7:9, eaha te huru e titauhia ia tatou ia ape ia horoahia mai te aˈoraa?

⁴ E ere paha i te mea ohie ia farii i te aˈoraa. I te tahi taime, e inoino atoa paha tatou. Noa ˈtu ua ite tatou e taata hara tatou, ia horoahia mai te aˈoraa no nia i te tahi hape ta tatou i rave, mea fifi ia farii i te reira. (A taio i te Koheleta 7:9.) E imi paha tatou i te mau otoheraa. E ui atoa paha tatou no te aha te taata e horoa mai ai i teie aˈoraa aore ra aita tatou i au i te huru i horoahia mai ai te aˈoraa. E amuamu paha tatou ma te manaˈo: ‘Eita e tano na ˈna e horoa mai i te aˈoraa! Aita hoi o ˈna e hiˈo ra ia ˈna!’ Aita anaˈe tatou e au i te aˈoraa, aita paha tatou e tâuˈa ˈtu aore ra e ani paha tatou i te tahi atu taata no te mea e hinaaro tatou ia parau mai o ˈna i te mea ta tatou e hinaaro.

5. Eaha ta tatou e hiˈopoa mai i roto i teie tumu parau haapiiraa?

⁵ I roto i teie tumu parau haapiiraa, e hiˈopoa mai tatou i te mau hiˈoraa Bibilia o te feia tei patoi i te aˈoraa e o te feia tei farii i te reira. E hiˈopoa atoa tatou eaha te tauturu mai ia farii i te aˈoraa e e nafea tatou e faufaahia ˈi i te reira.

UA PATOI RATOU I TE AˈORAA

6. Eaha ta tatou e haapii mai i te hiˈoraa o Rehoboama?

⁶ E hiˈopoa anaˈe i te hiˈoraa o Rehoboama. I to ˈna riroraa mai ei arii no Iseraela, ua haere to ˈna mau taata e farerei ia ˈna no te tuu i te hoê aniraa. Ua ani ratou ia ˈna ia haamâmâ i te zugo teimaha ta to ˈna metua tane, o Solomona, i tuu i nia ia ratou. Ua ui Rehoboama i te mau tane paari no Iseraela no te ite eaha ta ˈna e pahono i te nunaa. Ua parau taua mau tane ra ia ˈna, mai te peu e farii o ˈna i te aniraa a te nunaa, e tavini noa ratou ia ˈna. (Arii 1, 12:3-7) Aita Rehoboama i mauruuru i te aˈoraa ta te mau tane paari i horoa ˈtu e ui atura oia i te mau tane hoê â ratou i te paariraa mai. E 40 tiahapa matahiti to taua mau tane ra e ua ite ratou eaha te oraraa. (Par. 2, 12:13) Tera râ, i taua taime ra, aita roa ˈtu ratou i horoa i te aˈoraa maitai ia Rehoboama. Ua parau atu ratou ia faateimaha roa ˈtu â i te zugo a te nunaa. (Arii 1, 12:8-11) I mua i na aˈoraa e piti, ua nehenehe Rehoboama e pure ia Iehova no te ani i ta ˈna aratairaa. Aita roa ˈtu râ o ˈna i na reira. Ua faaoti o ˈna e faaroo i te aˈoraa ta ˈna i au roa ˈˈe e ua rave o ˈna mai ta te mau tane apî aˈe i parau. No ta ˈna faaotiraa, ua ino roa te tupuraa o Rehoboama, oia atoa to te nunaa Iseraela. Hoê â huru no tatou. Ia horoahia mai te aˈoraa, e ere paha tera ta tatou e hinaaro e faaroo. Mai te peu râ e aˈoraa Bibilia, e titauhia ia tatou ia farii i te reira.

7. Eaha te haapii mai i te hiˈoraa o te arii Uzia?

⁷ Ua patoi te arii Uzia i te aˈoraa. I roto i te hiero o Iehova, ua haere o ˈna i te hoê vahi o te mau tahuˈa anaˈe te nehenehe e tomo atu e ua pûpû o ˈna i te mea noˈanoˈa. Ua parau te mau tahuˈa a Iehova ia ˈna: “Uzia, aita e tiaraa to oe no te tutui i te mea noˈanoˈa na Iehova! O te mau tahuˈa anaˈe te tutui i te mea noˈanoˈa.” Eaha ïa to Uzia huru? Ahani ua farii o ˈna i te aˈoraa ma te haehaa a faarue oioi ai i te hiero, e faaore paha Iehova i ta ˈna hara. Aita râ Uzia i na reira e “riri roa ihora” o ˈna. No te aha o ˈna i patoi ai i te aˈoraa? Ua manaˈo o ˈna e ei arii, e tiaraa ïa to ˈna no te rave i ta ˈna e hinaaro. E ere roa ˈtu râ te manaˈo o Iehova. No to ˈna teoteo rahi, ua roohia Uzia i te lepera e “vai lepera noa ˈtura e pohe noa ˈtu oia.” (Par. 2, 26:16-21) Te faaite mai ra te hiˈoraa o Uzia e noa ˈtu eaha to tatou tiaraa, ia patoi tatou i te mau aˈoraa Bibilia, e ere tatou i te farii maitai a Iehova.

UA FARII RATOU I TE AˈORAA

8. Eaha to Ioba huru i mua i te aˈoraa?

⁸ Taa ê atu i te mau hiˈoraa ta tatou i hiˈopoa mai, te faahiti atoa ra te Bibilia i te mau hiˈoraa maitai o te feia tei haamaitaihia no te mea ua farii ratou i te aˈoraa. O Ioba te hoê o ratou. E taata mǎtaˈu o ˈna i te Atua e e ere o ˈna i te taata tia roa. A faaruru ai o ˈna i te tamataraa rahi, ua faahiti o ˈna i te tahi mau manaˈo tano ore. No reira Elihu e Iehova i horoa ˈi i te aˈoraa ia ˈna. Eaha ta Ioba i rave? Ma te haehaa, ua farii o ˈna i te aˈoraa a na ô ai: “Ua paraparau ïa vau, ma te taa ore râ . . . No reira vau e hoˈi mai ai i nia i ta ˈu i parau, e e tatarahapa vau i roto i te repo e te rehu.” Ua haamaitai Iehova ia Ioba no to ˈna haehaa.​—Ioba 42:3-6, 12-17.

9. Eaha te huru o Mose i mua i te aˈoraa e no te aha e hiˈoraa maitai o ˈna no tatou?

⁹ O Mose te tahi atu hiˈoraa no nia i te fariiraa i te aˈoraa i muri aˈe i to ˈna raveraa i te hara. I te hoê taime, ua riri roa o ˈna a ore atu ai e faahanahana ia Iehova. No reira Mose i ere ai i te fanaˈoraa taa ê e tomo i te fenua tǎpǔhia. (Num. 20:1-13) A taparuparu ai Mose ia Iehova no nia i tera faaotiraa, ua na ô Iehova: “Eiaha e parau faahou mai ia ˈu i tera parau.” (Deut. 3:23-27) Aita Mose i riri. Ua farii o ˈna i te faaotiraa a Iehova e ua tamau Iehova i te faaohipa ia ˈna no te aratai ia Iseraela. (Deut. 4:1) E hiˈoraa maitai Ioba raua Mose no tatou no te mea ua farii raua i te aˈoraa. Ua taui Ioba i to ˈna manaˈo, aita o ˈna i imi i te otoheraa. Ua faaite Mose e ua farii o ˈna i te aˈoraa a Iehova ma te vai taiva ore noa ˈtu ua ere o ˈna i te hoê haamaitairaa faufaa no ˈna.

10. (1) Eaha ta te Maseli 4:10-13 e haapii mai ra no nia i te faufaaraa ia farii i te aˈoraa? (2) Eaha te haerea maitai ta vetahi i faaite i mua i te aˈoraa?

¹⁰ E faufaahia tatou ia pee i te hiˈoraa o te mau tavini haapao maitai mai ia Ioba raua Mose. (A taio i te Maseli 4:10-13.) E rave rahi o to tatou mau taeae e tuahine tei pee i tera mau hiˈoraa. A tapao na eaha ta Emmanuel, te hoê taeae e ora ra i Congo, i parau a faaarahia ˈi o ˈna: “I te hoê taime, ua paruparuhia vau i te pae varua. Ua tapao râ te mau taeae paari i te pae varua o te amuiraa i te reira e ua tauturu ratou ia ˈu. Ua faaohipa vau i ta ratou mau aˈoraa e ua ape au e rave rahi fifi.”b Te parau ra Megan, te hoê pionie no Kanada no nia i te aˈoraa: “E ere paha tera ta ˈu e hinaaro e faaroo, o te mea râ te titauhia ia ˈu ia faaroo.” Te na ô atoa ra Marko, te hoê taeae no Croatie: “Ua tatarahia ta ˈu hopoia. A feruri ai râ i taua taime ra, ua tauturu mai te aˈoraa i horoahia mai ia puai faahou mai to ˈu auhoaraa e o Iehova.”

11. Eaha ta te taeae Karl Klein i parau no nia i te fariiraa i te aˈoraa?

¹¹ O taeae Karl Klein te tahi atu hiˈoraa no nia i te fariiraa i te aˈoraa. Ua tavini o ˈna ei mero o te Tino aratai. I roto i ta ˈna faatiaraa, ua faahiti taeae Klein i te hoê taime ua aˈo-maitai-hia o ˈna e te taeae Rutherford. E hoa piri raua. Ua farii taeae Klein, i te omuaraa, ua inoino o ˈna no te aˈoraa i horoahia. Ua na ô oia: “I to mâua farerei-faahou-raa, na ô mai nei te taeae Rutherford, ‘Ia ora na Karl!’ No te mea râ te vai noa ra te inoino, aita vau i aroha puai atu. Na ô faahou mai nei taeae Rutherford, ‘Haapao maitai Karl! Te tamata ra te Diabolo i te haru ia oe!’ Pahono atura vau, ‘Aita vau i riri ia oe taeae Rutherford.’ Na ô faahou mai nei taeae Rutherford, ‘E! Haapao maitai râ, te moemoe noa ra te Diabolo ia oe.’ Ua tano roa o ˈna! Ia tamau tatou i te inoino i te hoê taeae, mai te peu iho â râ ua faahiti o ˈna i te hoê parau e tiaraa to ˈna no te parau atu, . . . te tuu ra ïa tatou i mua i te Diabolo te tahi ravea no te faahema ia tatou.”c (Eph. 4:25-27) Ua farii taeae Klein i te aˈoraa a taeae Rutherford e ua maitai noa to raua auhoaraa.

EAHA TE TAUTURU MAI IA FARII I TE AˈORAA?

12. E nafea te haehaa e tauturu ai ia tatou ia farii i te aˈoraa? (Salamo 141:5)

¹² Eaha te tauturu mai ia farii i te aˈoraa? E titauhia te haehaa no te haamanaˈo e ei taata tia ore, te hape nei tatou e rave rahi taime. Mai ta tatou i ite na mua ˈtu, aita to Ioba manaˈo i tano. I muri aˈe râ, ua faatano o ˈna i to ˈna huru feruriraa e ua haamaitai Iehova ia ˈna. No te aha? No te mea e taata haehaa Ioba. Ua haapapu o ˈna i te reira ma te farii i te aˈoraa a Elihu, noa ˈtu mea apî aˈe Elihu ia ˈna. (Ioba 32:6, 7) E tauturu te haehaa ia tatou ia farii i te aˈoraa noa ˈtu no tatou, eita e tano no to tatou tupuraa aore ra no ǒ mai te reira i te hoê taata apî aˈe. Te na ô ra te hoê matahiapo i Kanada: “Mea fifi roa ia haere i mua aita anaˈe e taata no te horoa mai i te aˈoraa.” O tatou paatoa te titauhia ia faatupu i te mau huru maitatai e ia aravihi atu â no te poro e no te haapii atu i te parau apî oaoa.​—A taio i te Salamo 141:5.

13. Eaha ta tatou e haamanaˈo ia horoahia mai te aˈoraa?

¹³ Te aˈoraa, e tapao ïa o te here o te Atua no tatou. Te hinaaro ra Iehova i te mea maitai roa ˈˈe no tatou. (Mas. 4:20-22) Ia horoa mai o ˈna i te aˈoraa na roto i te Bibilia, ta tatou mau papai aore ra te hoê Kerisetiano paari i te pae varua, te faaite ra o ˈna i to ˈna here ia tatou. Mai ta te Hebera 12:9, 10 e parau ra, “te aˈo ra ïa [o ˈna] ia tatou no to tatou maitai.”

14. Eaha ta tatou e tapea mai ia horoahia mai te aˈoraa?

¹⁴ A tapea i te aˈoraa, eiaha râ te huru i horoahia mai ai te reira. I te tahi taime, aita paha tatou i afaro i te huru i horoahia mai ai te aˈoraa. E haapao maitai ïa te hoê taata ia horoa o ˈna i te aˈoraa.d (Gal. 6:1) Ia horoahia mai te aˈoraa, e titauhia ia tatou ia tapea i te reira noa ˈtu, i to tatou manaˈo, aita i horoa-maitai-hia. E nehenehe tatou e ui ia tatou iho: ‘Noa ˈtu aita vau i mauruuru i te huru i horoahia mai te aˈoraa, e ere anei teie aˈoraa i te mea tano no ˈu? E nehenehe anei au e tapea noa i te aˈoraa ma te ore e haapao atu i te mau hapa a te taata i horoa mai i te reira?’ E haerea paari ia farii i te mau aˈoraa atoa i horoahia mai.​—Mas. 15:31.

E FAUFAAHIA TATOU IA ANI I TE AˈORAA

15. No te aha e titauhia ia ani i te aˈoraa?

¹⁵ Te faaitoito ra te Bibilia ia tatou ia ani i te aˈoraa. Te na ô ra te Maseli 13:10: “Tei te feia râ e imi i te aˈoraa te paari.” Mea papu tera parau! Pinepine o te feia te ani ra i te aˈoraa te haere i mua i te pae varua no te mea aita ratou i tiai na te hoê taata e horoa ˈtu i te aˈoraa. Eiaha ïa e taiâ i te ani i te aˈoraa.

16. Eaha te tahi mau tupuraa e nehenehe ai tatou e ani i te aˈoraa?

¹⁶ Teie te tahi mau tupuraa e nehenehe ai tatou e ani i te aˈoraa i to tatou mau taeae e tuahine. (1) E ani te hoê tuahine i te tahi atu taata poro aravihi ia apiti mai ia ˈna no te hoê haapiiraa Bibilia e i muri aˈe, e ani o ˈna i te aˈoraa no te haamaitai i ta ˈna huru haapiiraa. (2) E ani te hoê tuahine faaea taa noa i te manaˈo o te hoê tuahine paari i te pae varua a maiti ai o ˈna i te tahi ahu. (3) E horoa te hoê taeae i ta ˈna oreroraa parau matamua. E ani o ˈna i te hoê taeae orero aravihi ia faaroo maite i ta ˈna oreroraa parau e ia tauturu ia ˈna no te haamaitai atu â i te reira. E nehenehe atoa te hoê taeae tei matau i te horoa i te oreroraa parau e ani i te tauturu a te tahi atu mau taeae orero aravihi a faaohipa ˈtu ai i te mau aˈoraa i horoahia.

17. E nafea tatou e faufaahia ˈi i te aˈoraa?

¹⁷ I te mau mahana i mua nei, e horoahia mai te aˈoraa. Ia tupu noa mai te reira, a haamanaˈo i te mau haapiiraa ta tatou i hiˈopoa mai. A faaite noa i te haehaa. A tapea i te aˈoraa, eiaha râ te huru i horoahia mai te reira. I muri iho, a faaohipa i te aˈoraa i horoahia mai. Aita tatou i fanauhia ei taata î i te paari. Ia faaroo râ tatou i te aˈoraa e ia farii tatou i te aˈo, te haapapu mai ra te Bibilia e “noaa mai ia [tatou] te paari.”​—Mas. 19:20.