TUMU PARAU HAAPIIRAA 28
HIMENE 88 Faaite mai i to mau eˈa
No te aha mea faufaa ia imi tatou i te aˈoraa?
“Tei te feia . . . e imi i te aˈoraa te paari.”—MAS. 13:10.
MANAˈO FAUFAA
E ite mai tatou i roto i teie tumu parau e nafea tatou e faufaahia ˈi i te mau aˈoraa a vetahi ê.
1. No te rave i te faaotiraa paari e ia manuïa ta tatou mau opuaraa, e nafea ïa tatou? (Maseli 13:10; 15:22)
O TATOU pauroa te titauhia ia rave i te faaotiraa paari. E hinaaro atoa tatou ia manuïa ta tatou mau opuaraa. No reira, te faaitoito mai ra te Bibilia ia ani i te aˈoraa.—A taio i te Maseli 13:10; 15:22.
2. Eaha ta Iehova i fafau?
2 O Iehova anaˈe te horoa mai i te aˈoraa maitai roa ˈˈe. Tei ia ˈna ra te paari mau e te aratairaa papu. E pure anaˈe ïa no te ani i ta ˈna tauturu. Ua fafau hoi o ˈna: “E aˈo atu vau ia oe, ei nia to ˈu mata ia oe.” (Sal. 32:8) Te faaite ra teie irava eita noa Iehova e horoa mai i te aˈoraa, te tâuˈa atoa ra o ˈna ia tatou tataitahi e te tauturu mai ra o ˈna ia faaohipa tatou i ta ˈna mau aˈoraa.
3. Eaha ta tatou e ite mai i roto i teie tumu parau?
3 I roto i teie tumu parau, e pahono tatou i na uiraa: (1) Eaha te mau huru maitatai e titauhia ia ˈu ia faatupu? (2) O vai ma te horoa mai i te aˈoraa maitai? (3) E nafea vau e faaite ai e te hinaaro ra iho â vau i te aˈoraa? (4) No te aha eiaha vau e ani ia vetahi ê ia rave i te faaotiraa no ˈu?
EAHA TE MAU HURU MAITATAI E TITAUHIA IA FAATUPU?
4. No te fanaˈo i te aˈoraa maitai, eaha te mau huru maitatai e titauhia ia faatupu?
4 Mea faufaa ia faatupu tatou i te haehaa e te aau faahaihai no te fanaˈo i te aˈoraa maitai. E titauhia ia farii tatou i te tauturu a vetahi ê no te rave i te faaotiraa paari, i roto iho â râ i te hoê tupuraa aita tatou i faaruru aˈenei. Oia atoa, ia farii aita tatou i ite i te mau mea atoa. Mai te peu e ere tatou i te mea haehaa, eita Iehova e tauturu ia tatou. Ia taio tatou i ta ˈna Parau, eita ïa tatou e ite i te faufaaraa ia faaohipa i te mau aˈoraa i roto. (Mika 6:8; Pet. 1, 5:5) Ia faaite râ tatou i te haehaa, oioi ïa tatou i te faaroo e i te faaohipa i te mau aˈoraa Bibilia.
5. Eaha te mau ohipa maitatai ta te arii Davida i rave e nehenehe ai o ˈna e faateitei ia ˈna?
5 E hiˈo mai tatou eaha te haapii mai i te hiˈoraa o te arii Davida. Noa ˈtu te mau ohipa maitatai ta ˈna i rave, aita o ˈna i faateitei ia ˈna. E rave rahi matahiti hou o ˈna a riro mai ai ei arii, ua matauhia o ˈna ei taata hauti kinura aravihi, i mua atoa i te arii. (Sam. 1, 16:18, 19) I muri aˈe, ua maiti Iehova ia Davida no te riro mai ei arii, e ua horoa ˈtu o ˈna i to ˈna varua moˈa. Ua riro Davida ei taata puai. (Sam. 1, 16:11-13) I muri iho, ua arue te nunaa ia Davida no to ˈna taparahiraa e rave rahi enemi, oia atoa ia Golia te Philiseti. (Sam. 1, 17:37, 50; 18:7) Ahani Davida i faateitei ia ˈna, e manaˈo ïa o ˈna aita e faufaa ia ani i te aˈoraa. Tera râ, e taata haehaa roa o Davida.
6. Mea nafea tatou i te iteraa mea au na Davida e faaroo i te mau aˈoraa? (A hiˈo atoa i te hohoˈa.)
6 I to ˈna riroraa mai ei arii, ua maiti Davida i te mau hoa o te horoa mai i te aˈoraa. (Par. 1, 27:32-34) E ere roa ˈtu i te mea maere, no te mea na mua ˈˈe, mea au iho â na Davida e faaroo ia vetahi ê ia horoa mai i te aˈoraa maitai. Ua faaroo o ˈna eiaha noa i te mau tane, oia atoa râ i te hoê vahine o Abigaila. Ua faaipoipo Abigaila ia Nabala, te hoê tane teoteo, mauruuru ore, e te faatura ore ia vetahi ê. Area Davida, mea haehaa roa ïa. Ua faaohipa o ˈna i te aˈoraa a Abigaila. Maoti te reira, aita ïa o ˈna i rave i te hoê hara rahi.—Sam. 1, 25:2, 3, 21-25, 32-34.
Mea haehaa roa te arii Davida, inaha ua farii e ua faaohipa o ˈna i te aˈoraa a Abigaila (A hiˈo i te paratarafa 6)
7. Eaha te haapii mai i te hiˈoraa o Davida? (Koheleta 4:13) (A hiˈo atoa i te hohoˈa.)
7 Eaha te haapii mai i te hiˈoraa o Davida? Mea aravihi paha tatou i roto i te hoê tuhaa, aore ra e mana to tatou i nia ia vetahi ê. Noa ˈtu râ, eiaha tatou ia manaˈo e ua ite tatou i te mau mea atoa, aore ra aita e faufaa ia ani i te aˈoraa. Mai ia Davida, ia ineine noa tatou i te faaroo i te mau aˈoraa maitai noa ˈtu o vai te horoa mai i te reira. (A taio i te Koheleta 4:13.) Ia na reira tatou, eita ïa tatou e rave i te mau ohipa o te haamauiui ia tatou e ia vetahi ê.
Ia ineine noa tatou i te faaroo i te mau aˈoraa maitai noa ˈtu o vai te horoa mai i te reira (A hiˈo i te paratarafa 7)c
O VAI MA TE HOROA MAI I TE AˈORAA MAITAI?
8. No te aha Ionatana i nehenehe ai e horoa i te aˈoraa maitai na Davida?
8 E hiˈo mai tatou i te tahi atu haapiiraa e huti mai i te hiˈoraa o Davida. Ua faaroo o ˈna i te mau aˈoraa no ǒ mai i te feia mea here na ratou ia Iehova e o tei taa maitai i to ˈna tupuraa. Ei hiˈoraa, i to ˈna hinaaroraa e faatupu i te hau e te arii Saula, ua faaroo Davida i te aˈoraa a Ionatana, te tamaiti a Saula. No te aha Ionatana i nehenehe ai e horoa i te aˈoraa maitai na Davida? No te mea e mea here roa na Ionatana ia Iehova, oia atoa râ ua matau maitai o ˈna i to ˈna papa. (Sam. 1, 20:9-13) Eaha ïa te haapiiraa no tatou?
9. Ia hinaaro tatou i te aˈoraa, o vai ta tatou e farerei? A horoa i te hoê hiˈoraa. (Maseli 13:20)
9 Ia hinaaro tatou i te aˈoraa, mea maitai aˈe ia farerei tatou i te hoê taata mea here roa na ˈna ia Iehova e o tei faaruru aˈena i te hoê â tupuraa e to tatou.a (A taio i te Maseli 13:20.) Ei hiˈoraa, ia hinaaro te hoê taeae apî e faaipoipo, o vai ïa ta ˈna e farerei? Ia paraparau o ˈna i te hoê hoa faaea taa noa, e nehenehe teie hoa e faaohipa i te Bibilia no te tauturu ia ˈna e no te horoa i te tahi aratairaa. Tera râ, e fanaˈo teie taeae apî i te aˈoraa maitai aˈe e te papu ia farerei o ˈna i te tahi na hoa faaipoipo paari i te pae varua, tei matau maitai ia ˈna e o te oaoa ra i roto i to raua faaipoiporaa.
10. Eaha ta tatou e hiˈopoa i teie nei?
10 Ua ite mai tatou e piti huru maitatai e titauhia ia faatupu, oia atoa o vai ma te horoa mai i te aˈoraa maitai. I teie nei, e hiˈopoa mai tatou no te aha mea faufaa ia faaite e te hinaaro ra iho â tatou i te aˈoraa, oia atoa no te aha eiaha tatou e ani ia vetahi ê ia rave i te faaotiraa no tatou.
E NAFEA VAU E FAAITE AI E TE HINAARO RA IHO Â VAU I TE AˈORAA?
11-12. (1) I te tahi taime, eaha ta tatou e rave? (2) Eaha ta te arii Rehoboama i rave i mua i te hoê faaotiraa rahi?
11 I te tahi taime, e ani te hoê taata i te aˈoraa, tera râ, ua rave ê na o ˈna i ta ˈna faaotiraa. Ta ˈna noa e hinaaro, ia tuati to vetahi ê manaˈo i ta ˈna i faaoti. Mai te peu e tera iho â, aita ïa o ˈna e hinaaro ra i te aˈoraa. E huti mai ïa tatou i te haapiiraa i tei tupu no te arii Rehoboama.
12 Ua riro mai Rehoboama ei arii no Iseraela i te poheraa to ˈna papa o Solomona. I to ˈna riroraa mai ei arii, mea fanaˈo te nunaa e rave rahi maitai. Tera râ, ua manaˈo ratou mea teimaha te ohipa ta Solomona i faahepo ia ratou. No reira, ua taparu te nunaa ia Rehoboama ia haamâmâ mai i teie zugo teimaha. Ani maira Rehoboama ia ratou tau mahana no te feruri i ta ˈna faaotiraa. I te omuaraa, ua ani o ˈna i te aˈoraa a te mau tane paari. Na ratou atoa hoi i tauturu ia Solomona. (Arii 1, 12:2-7) Aita râ o ˈna i farii i ta ratou mau aˈoraa. No te aha? Peneiaˈe ua rave ê na o ˈna i te hoê faaotiraa e ua hinaaro noa o ˈna ia afaro mai teie mau tane i ta ˈna i faaoti. No reira o ˈna i farerei ai i to ˈna mau hoa apî aˈe. I te mea ua tuati to ratou manaˈo, ua au roa ïa o ˈna i ta ratou i parau mai. (Arii 1, 12:8-14) I muri aˈe, pahono atura Rehoboama i te nunaa mai ta to ˈna mau hoa i parau ia ˈna. Ei faahopearaa, e rave rahi tei orure hau ia ˈna e tei maiti i te tahi atu arii no ratou. E rave rahi fifi ta Rehoboama i faaruru, mai reira mai.—Arii 1, 12:16-19.
13. E nafea tatou e ite ai e te hinaaro mau ra tatou i te aˈoraa a vetahi ê?
13 Eaha te haapii mai i te aamu o Rehoboama? Ia ani tatou i te aˈoraa a vetahi ê, te auraa aita ïa tatou i rave ê na i te hoê faaotiraa. Ia ineine ïa tatou i te faaroo i ta ratou e parau mai. No reira, e ui anaˈe ia tatou iho, ‘E ani anei au i te aˈoraa a ore atu ai e haapao, no te mea e ere tera ta ˈu e hinaaro e faaroo?’ E rave anaˈe i te hoê hiˈoraa.
14. Ia hinaaro tatou i te aˈoraa, eaha ta tatou e haamanaˈo? A horoa i te hoê hiˈoraa. (A hiˈo atoa i te hohoˈa.)
14 A feruri na e ua pûpûhia mai te tahi ohipa aufau-maitai-hia na te hoê taeae. Hou o ˈna a farii ai, e ani o ˈna i te aˈoraa a te hoê matahiapo. E faaite atu teie taeae e no teie ohipa, e reva o ˈna tau hebedoma aore ra avaˈe. E atea ê ïa o ˈna i to ˈna utuafare. E haamanaˈo teie matahiapo i teie taeae i te aratairaa Bibilia, oia hoi na ˈna te hopoia e aupuru i to ˈna utuafare i te pae varua. (Eph. 6:4; Tim. 1, 5:8) Tera râ, mai te peu aita teie taeae e afaro ra i ta te matahiapo e parau ia ˈna, e farerei ïa o ˈna i te tahi atu mau taeae haapao roa e parauhia mai o ˈna ia farii i teie ohipa. Te faaite ra anei teie taeae e te hinaaro mau ra o ˈna i te aˈoraa? Aore ra ua rave ê na o ˈna i ta ˈna faaotiraa, e te mea noa ta ˈna e hinaaro, ia afaro mai hoê taata i to ˈna manaˈo. E haamanaˈo anaˈe e mea haavarevare roa to tatou aau. (Ier. 17:9) I te tahi taime, te aˈoraa ta tatou e ore e au, tera te aˈoraa e tano maitai no tatou.
O te aˈoraa maitai anei ta tatou e imi ra, aore ra te tahi taata o te afaro mai i ta tatou i faaoti ê na? (A hiˈo i te paratarafa 14)
MEA TANO ANEI IA ANI AU IA VETAHI Ê IA RAVE I TE FAAOTIRAA NO ˈU?
15. Ia ara tatou i te aha, e no te aha?
15 Te hinaaro ra Iehova ia rave tatou tataitahi i te faaotiraa no tatou iho. (Gal. 6:4, 5) Mai ta tatou i ite mai nei, te hoê taata feruriraa paari, hou o ˈna a rave ai i te hoê faaotiraa, e imi o ˈna na mua i te aˈoraa i roto i te Parau a te Atua. E ani atoa o ˈna i te manaˈo o te tahi mau Kerisetiano paari i te pae varua. Tera râ, eiaha roa ˈtu tatou e ani ia vetahi ê ia rave i te faaotiraa no tatou. E na ô paha vetahi, “O oe aˈe tera, eaha ta oe e faaoti?” Area te tahi atu, e pee noa ïa i ta vetahi ê mau faaotiraa ma te ore e feruri i to ratou tupuraa.
16. Eaha tei tupu i roto i te amuiraa no Korinetia, e na vai e faaoti e amu i te inaˈi aore ra eita? (Korinetia 1, 8:7; 10:25, 26)
16 A feruri na i te faaotiraa ta te mau Kerisetiano no Korinetia i rave no nia i te inaˈi tei pûpûhia i te mau idolo. Ua parau Paulo ia ratou: “Ua ite tatou e aita roa to te idolo e faufaa i roto i teie nei ao. Ua ite atoa râ tatou e hoê anaˈe Atua e aita ˈtu.” (Kor. 1, 8:4) No ta Paulo i parau, ua faaoti vetahi o te amuiraa e nehenehe ta ratou e amu i te inaˈi ta ratou i hoo mai i te matete, noa ˈtu ua pûpûhia te reira i te mau idolo. Tera râ, ua manaˈo te tahi atu mau mero eita ta ratou e nehenehe e amu i taua maa ra, no te mea e hauti to ratou manaˈo haava. (A taio i te Korinetia 1, 8:7; 10:25, 26.) I roto i tera tupuraa, na te taata tataitahi e faaoti no ˈna iho. Aita roa ˈtu Paulo i faaitoito i te mau Kerisetiano no Korinetia ia faaoti no vetahi ê aore ra ia pee noa ia vera ma. Inaha ‘e haava te Atua ia ratou tataitahi ia au i ta ratou mau ohipa.’—Roma 14:10-12.
17. Eaha te tupu ia pee noa tatou i ta vetahi ê mau faaotiraa? A horoa i te hoê hiˈoraa. (A hiˈo atoa i te hohoˈa.)
17 E itehia anei i te hoê â tupuraa i teie mahana? E feruri anaˈe i te mau tuhaa rii o te toto. Na te Kerisetiano tataitahi e faaoti no ˈna iho e farii anei i teie mau tuhaa rii o te toto aore ra eita.b E ere paha i te mea ohie no tatou ia taa maitai i teie tuhaa. Noa ˈtu râ, e titauhia ia rave tatou i ta tatou mau faaotiraa. (Roma 14:4) Mai te peu e pee noa tatou i te mau faaotiraa a vetahi ê, eita tatou e riro mai ei taata feruriraa paari. No reira, e titauhia ia rave tatou i ta tatou iho mau faaotiraa niuhia i nia i te Bibilia. (Heb. 5:14) Afea ïa tatou e ani ai i te manaˈo o te hoê Kerisetiano feruriraa paari? E rave tatou na mua i ta tatou iho mau maimiraa. E ia hinaaro tatou i te tauturu no te faaohipa i teie mau aratairaa Bibilia, i reira ïa tatou e ani ai i te aˈoraa.
Ia ani tatou i te aˈoraa i muri aˈe noa i te raveraa i ta tatou iho mau maimiraa (A hiˈo i te paratarafa 17)
A TAMAU I TE IMI I TE AˈORAA
18. Eaha ta Iehova i rave no tatou?
18 Te tiaturi ra Iehova ia tatou ma te vaiiho e na tatou e rave i ta tatou iho mau faaotiraa. Ua horoa mai o ˈna i ta ˈna Parau te Bibilia e te mau hoa feruriraa paari o te tauturu mai ia feruri i te mau aratairaa Bibilia. Oia mau, ua faaite Iehova e mea aupuru roa o ˈna ia tatou mai te hoê metua î i te here. (Mas. 3:21-23) E nafea ïa tatou e faaite ai i to tatou mauruuru ia ˈna?
19. E nafea tatou e tamau noa ˈi i te faaoaoa ia Iehova?
19 A feruri na i teie tupuraa: Mea here roa na te mau metua i ta ratou mau tamarii. Te oaoa ra ratou i te ite i ta ratou mau tamarii ia paari mai e ia riro mai ei tavini na Iehova, o te tauturu atoa ia vetahi ê. Hoê â huru no Iehova. Te oaoa ra o ˈna i te ite ia tatou ia nuu noa i mua i te pae varua, e ia imi i te mau aˈoraa no te rave i te mau faaotiraa o te faaoaoa ia ˈna.
HIMENE 127 Teihea huru taata e titauhia ˈi ia riro vau?
a I te tahi taime, e farerei tatou i te feia aita e tavini ra ia Iehova no nia anei i te parau o te moni, te rapaauraa, e te vai ra ˈtu â.
b No te ite atu â, a hiˈo i te haapiiraa 39 numera 5 e te tuhaa “Hiˈopoa” o te buka Ia ora oe e a muri noa ˈtu!
c FAATAARAA O TE HOHOˈA: Te aˈo ra te hoê matahiapo i te tahi atu matahiapo no nia i ta ˈna huru paraparau i ta ratou putuputuraa matahiapo.