Haamanaˈoraa no te tairururaa
Hora: E matara te mau opani i te vahi tairururaa i te hora 8. Ia taˈi te upaupa na mahana e toru i te hora 9:20, e haere paatoa anaˈe e parahi. E nehenehe ïa te porotarama e haamata ma te tura. I te Mahana pae e te Mahana maa, e hope te porotarama fatata i te hora 5. I te Tapati râ, fatata ïa i te hora 4.
‘E haamaitai ia Iehova i te himene’: I arue na to te Atua nunaa i tahito ra ia Iehova ma te himene e e tuhaa faufaa noâ te upaupa i roto i te haamoriraa mau i teie mahana. (Sal. 28:7) E haamata te rururaa taitahi e te hoê upaupa tei faaineinehia ia haapii tatou o vai Iehova e ia haamori tatou ia ˈna. No reira, ia faaite mai te peretiteni e e haamata te upaupa, a haere e parahi e a faaroo i te reira ma te mauruuru. Mea au aˈe te reira i te tauaparau. Te haafaufaa nei ïa tatou i te mau tutavaraa a te mau melo faataˈi upaupa a te Watchtower. E piti taime i te matahiti, e haere teie mau taeae e tuahine i Patterson, New York, no te haruharu i te upaupa nehenehe mau ia oaoa tatou. Na ratou e aufau i to ratou tere. I muri iho i te faaroo-maitai-raa i te upaupa, mea faufaa ia arue amui tatou ia Iehova ma te himene i ta tatou mau himene o te Basileia.
Vairaa pereoo: I te mau vahi tairururaa atoa i reira te pereoo e tiaihia ˈi, e nehenehe e tomo atu ma te tamoni ore. O te mau pereoo e tae matamua mai te faanahohia na mua. Mea taotiahia te vairaa pereoo, a rave noa ïa hoê pereoo. Mai te peu e e parau faatia a te ture aore ra a te tomite tairururaa, e nehenehe e tapea i te vahi faataahia no te huma mero.
Parahiraa: Ia matara mai te mau opani i te mau poipoi atoa, eiaha e ru no te tapao i te mau parahiraa. E ere i te hoê tatauraa. E tauturu mai te feruriraa haapae ia haapao i to vetahi ê maitai. E haapapu te reira e e Kerisetiano mau tatou. E hinaaro ïa te feia e hiˈo maira e arue i te Atua. (Ioa. 13:34, 35; Kor. 1, 13:5; Pet. 1, 2:12) A tapao noa i te mau parahiraa no te feia anaˈe e noho ra i ǒ oe, tei na muri mai ia oe e no ta oe mau piahi Bibilia. Eiaha e tuu i te mau taihaa i nia i te mau parahiraa ta oe e ore e hinaaro. E ite oioi ïa te mau taata e e nehenehe ratou e faaohipa i te reira. Ua faataahia te tahi vahi taa ê no te feia ruhiruhia e te taata maˈimaˈi. No te iti râ o te mau parahiraa no ratou, eita te utuafare atoa e nehenehe e parahi atu i pihai iho. E faatiahia râ hoê aore ra e piti taata haapao.
Huru faaahuraa au maitai: E mea faufaa ia tano to tatou ahu. Eiaha e pee i te mau huru faanehenehe au ore o teie nei ao. (Tim. 1, 2:9) Eita tatou e hinaaro e oomo i te ahu haapaoraa ore ia haere mai aore ra ia faarue tatou i te hotera. Oia atoa i te taime faafaaearaa. E oaoa ïa tatou i te pine i te tareta tairururaa e eita tatou e haama i te poro ia nehenehe. E faahopearaa maitai ia faaite i te huru rapaeau e haerea maitai i te mau tairururaa i mua. E hinaaro ïa te feia aau haavare ore e faaroo i te poroi faaora o te Bibilia e e faaoaoa tatou ia Iehova.—Zeph. 3:17.
Haerea maitai a faaohipa ˈi i te mau matini afaifai: E faaite tatou i te haerea maitai i te roaraa o te porotarama ia faatano tatou i ta tatou mau matini afaifai ia ore te reira e haapeapea ia vetahi ê. Ia faaohipa tatou i te hoê pata hohoˈa, taviri hohoˈa, matini afaifai aore ra i te tahi atu mauhaa, e hinaaro iho â tatou e faatura ia vetahi ê ma te ore e haapeapea ia ratou. E faaite atoa tatou i te haerea maitai ma te ore e hapono noa i te poroi vini aore ra i te e-mail i te roaraa o te porotarama.
Tamaaraa i te avatea: Mea au aˈe ia hopoi mai i ta outou maa i te vahi tairururaa i te haere e hoo mai. E nehenehe e rave i te hoê farii faatoetoeraa maa nainai a tuu atu ai i raro aˈe i te parahiraa. Mea opanihia te farii faatoetoeraa maa rahi e te mau farii hiˈo.
Ô: E nehenehe tatou e horoa i te ô i te vahi tairururaa no te ohipa e ravehia na te ao nei. E faaite te reira i to tatou mauruuru no te mau faanahoraa o te tairururaa. Ia horoahia te parau moni, a papai i nia i te reira: “Association Les Témoins de Jéhovah.”
Raau: Mai te peu e e maˈi to oe, a hopoi mai i ta oe raau no te mea eita e horoahia i te vahi tairururaa. A faarue i te mau nira patia a te feia maˈi omaha tihota i roto i te farii no te pehu atâta, eiaha râ i te vahi tairururaa e te hotera.
Aˈoraa parururaa: A haapao maitai ia ore oe e topa aore ra e hee. I te mau matahiti atoa, e mea rahi te pepe nei no to ratou tiaa. Te tiaa poro teitei iho â râ. Mea au aˈe ia oomo mai i te tiaa au maitai e te tano no te haere i te mau vahi atoa.
Feia eita e faaroo maitai: E haapurorohia te porotarama i nia i te ratio i te vahi tairururaa. E rave ïa te feia e hinaaro i ta ratou taoˈa nainai o te haru i te ratio e te taoˈa faaroo tamauhia i roto i te tariˈa.
Pereoo turairai tamarii e parahiraa tufetu: E opanihia te mau pereoo turairai tamarii e parahiraa tufetu i te vahi tairururaa. E faatiahia râ ia tamau i te parahiraa aiû i pihai iho i na metua.
Faanoˈanoˈa: E faatupuhia anei te tairururaa i te hoê vahi e tapirihia te opani? Ia ore te feia maˈi aho pau aore ra te tahi atu e fifi, e mea au aˈe ia ore e faarahi i te monoˈi pîpî. Oia atoa i te faanoˈanoˈa hauˈa puai. Ma te na reira te hamani maitai atu ra ïa tatou ia vetahi ê.—Kor. 1, 10:24.
Te api parau Veuillez suivre l’intérêt (S-43): Ia poro tatou ma te faanaho-ore-hia i te taata tei faaite i te anaanatae, e faaî anaˈe i te api parau Veuillez suivre l’intérêt. E nehenehe e horoa ˈtu i tei haapao ra i te mau buka. Aita anaˈe, i te papai parau ïa o ta outou amuiraa.
Fare tamaaraa: I te fare tamaaraa, a faahanahana i te iˈoa o Iehova maoti to outou haerea maitai. Ei faaahuraa e au i te Kerisetiano to tatou e tia ˈi. I vetahi mau fenua, e vaiihohia na te tahi moni haamauruuru na te tuati.
Hotera:
Eiaha e tapao i te mau piha hau aˈe i te hinaaro-mau-hia e eiaha ia hau atu te rahiraa taata i roto i te piha i tei faatiahia e te hotera.
No te tahi tupuraa taa ê e faaore ai oe i te tapaoraa, a faaara oioi atu ïa i te hotera. E nehenehe ïa te tahi atu mau taata e faaohipa i te piha. (Mat. 5:37) Mai te peu e e faaore iho â oe no te tahi tumu, a ani i te hoê haapapuraa no nia i te reira. I te taime a faaore ai oe i te reira hou na 48 hora e mairi ai, eita te moni ta oe i vaiiho e faahoˈihia mai.
I te hotera, ia faaohipa oe i te tareta moni, a haamanaˈo e tapeahia te taatoaraa o te tino moni o te piha, e tapea-atoa-hia te tahi tino moni hau ia tuino noa ˈtu oe i te tahi taihaa. Tau mahana na mua ˈˈe râ a faarue ai oe i te hotera, e faahoˈihia mai ai te tino moni hau.
A rave i te hoê turairaa taihaa ia hinaaro iho â outou i te reira e a faahoˈi oioi atu ia nehenehe vetahi ê e faaohipa i te reira.
I vetahi fenua, e vaiihohia na te tahi moni haamauruuru na te taata amo taihaa e te vahine tamâ piha.
Eiaha e tunu i te maa i roto i te mau piha e mea opanihia te reira.
E rave ma te tano i te maa e faataahia na te hoani o te hotera (maa, taofe aore ra pape paari).
A faaite i te mau huru maitatai i nia i te mau rave ohipa o te hotera i te mau taime atoa. E rave rahi hoani ta ratou e haapao. E oaoa ïa ratou ia faaite tatou i te mǎrû, te faaoromai e te huru au noa.
I te hotera, ia haapao noa te mau metua i ta ratou tamarii i te mau taime atoa. I te vahi hopuraa pape anei, fariiraa taata, piha faaetaetaraa tino e te vai ra ˈtu â.
Rima tauturu: Ia hinaaro te tahi e tauturu, a farerei atu i te mau taeae e haapao ra i tera tuhaa i te tairururaa. E farii-atoa-hia te tamarii i raro aˈe i te 16 matahiti ia apiti oia i to ˈna metua, i te hoê taata haapao aore ra tei faatiahia e to ˈna metua.