E toru mahana haumǎrû i te pae varua
1. Eaha ta tatou e fanaˈo i teie tairururaa mataeinaa?
1 I roto i teie fenua mǎrô i te pae varua, te ao hoi a Satani, te faaitoito noa ra Iehova i ta ˈna mau tavini. (Isa. 58:11) O te tairururaa mataeinaa tamatahiti te tahi ravea. A piri mai ai te tairururaa o teie matahiti, e nafea tatou e faaineine ai ia fanaˈo e ia horoa i te mau faaitoitoraa pae varua?—Mas. 21:5.
2. Eaha te mau faaineineraa hopea e rave?
2 Mai te peu e aitâ outou i na reira, a rave i te taime i teie nei no te faanaho i ta outou porotarama e ta outou ohipa no te tae atu i na mahana tairururaa e toru atoa. Ua taio anei outou i te taime titauhia no te tere atu i te tairururaa ia nehenehe outou e tae oioi e e imi i te parahiraa? Eita iho â tatou e hinaaro e ere i te tahi noa ˈˈe maa pae varua faaitoito ta Iehova i faaineine no tatou! (Isa. 65:13, 14) Ua oti anei outou i te faanaho i te faurao e te nohoraa?
3. E nafea tatou e to tatou utuafare e faufaahia ˈi i te tairururaa?
3 Eaha te tauturu ia outou ia horoa i te tariˈa faaroo? Ia nehenehe, a taoto maitai i te po. I te tairururaa, a hiˈo i te taeae orero. A taio i te mau irava atoa i roto i ta outou Bibilia. A rave i te mau tapaopaoraa. Mea maitai ia parahi amui te mau utuafare ia tauturu te mau metua i ta ratou tamarii ia horoa i te tariˈa faaroo. (Mas. 29:15) Peneiaˈe e nehenehe outou ei utuafare e tauaparau i te mau manaˈo faufaa o te tairururaa a hoˈi ai i te fare. Ia itoito noâ to outou utuafare i muri aˈe i te tairururaa, a rave i te taime i ta outou arui haamoriraa utuafare no te hiˈopoa i te mau manaˈo faufaa taa maitai e faaohipa.
4. O vai ta tatou e haamanaˈo?
4 Ia itoito-atoa-hia vetahi ê: E hinaaro tatou ia itoito-atoa-hia vetahi ê i te tairururaa. E feia poro matahiti rahi anei to ta outou amuiraa aore ra o te hinaaro i te tauturu no te tae atu i te tairururaa? E nehenehe anei outou e tauturu ia ratou? (Ioa. 1, 3:17, 18) Ia papu i te mau matahiapo, te mau tiaau pǔpǔ iho â râ, e ua tauturuhia taua mau taata poro ra.
5. E nafea ia opere i te mau titau-manihini-raa i te tairururaa? (A hiˈo i te tumu parau tarenihia i nia nei.)
5 Mai tei matauhia, e toru hebedoma hou te tairururaa, e titau manihini tatou i te taata ia tae mai. Ia opere te mau amuiraa i ta ratou mau titau-manihini-raa atoa e ia itea ia ratou te rahiraa o te taata o ta ratou tuhaa fenua. Ia toe râ ta outou ia oti te opereraa, a afai atu ïa i te tairururaa ia poro outou ma te faanaho-ore-hia. E haamaramaramaraa hau te horoahia ˈtu i te Mahana pae. Ia ore to outou utuafare e manaˈo e na reira i te oire o te tairururaa, ia horoahia te mau titau-manihini-raa tei toe mai i te taeae farii a tomo ai outou i roto i te vahi tairururaa. A tapea noa hoê na oe, e hinaaro paha oe i te reira i te oreroraa parau hopea o te Tapati.
6. A faahiti i te tahi mau peu maitai.
6 Ei peu maitai ta tatou: I te hoê tau mea “miimii” e mea tâuˈa ore te taata e rave rahi, mea haumǎrû mau ia parahi i rotopu i te mau hoa Kerisetiano o te tutava i te faaite i te peu maitai! (Tim. 2, 3:2) Ei peu maitai ta tatou ia iritihia te opani i te hora 8. E tomo tatou i roto i te piha tairururaa ma te hau e te naho e e tapao i te parahiraa no te feia noa e ora ra i ǒ tatou aore ra o ta tatou e faauta aore ra no ta tatou mau piahi Bibilia. E pee tatou i te faaueraa a te peretiteni ia haere e parahi no te faaroo i te upaupa o te omua i te rururaa taitahi. Eiaha ta outou vini aore ra te tahi atu taihaa ia haapeapea ia vetahi atu i te roaraa o te porotarama. Eiaha atoa tatou e paraparau, e papai i te poroi vini, e tamaa e e hahaere faufaa ore noa.
7. E nafea e ‘mahora ˈi’?
7 Te auhoaraa mahanahana: I te tairururaa, e fanaˈo tatou i te auhoêraa e te autaeaeraa Kerisetiano mahanahana. (Sal. 133:1-3) No te aha e ore ai e “mahora” ia outou ma te haere e farerei i te mau taeae e tuahine o te tahi atu amuiraa? (Kor. 2, 6:13) A haamau ei fa e haamatau hoê aˈe taata aore ra utuafare i te mahana taitahi. Mea maitai te taime faafaaearaa o te avatea no te na reira. Mea maitai aˈe ïa ia rave i te tahi farii maa iti e ia faaea noa i reira no te tamaa e no te paraparau e vetahi atu i te haere atu i te fare toa aore ra i te fare tamaaraa. E fanaˈo ïa outou i te auhoaraa apî vai tamau.
8. No te aha e e nafea e horoa ˈi i te rima tauturu?
8 Auê te haumǎrû ia ohipa e to tatou mau hoa haamori i roto i te taviniraa moˈa! E tia anei ia outou ia turu i te hoê tuhaa ohipa o te tairururaa aore ra ia tauturu i ta outou amuiraa na ˈna anaˈe te tamâraa? (Sal. 110:3) Mai te peu e aitâ outou i na reira, a tapao atu i to outou iˈoa i te tuhaa e haapao i te mau rima tauturu o te tairururaa. E vitiviti e e oaoa ïa te ohipa ia rahi te rima tauturu.
9. No te aha e haapao maitai ai i to tatou haerea e faaneheneheraa i na mahana tairururaa e toru atoa?
9 E maere te taata no rapae i to tatou haerea: E tia tatou o te tairururaa i na mahana e toru atoa eiaha noa i te vahi tairururaa. Ia ite te taata o te oire tairururaa i te taa-ê-raa faahiahia i rotopu ia tatou e te feia e ere i te Ite. (Pet. 1, 2:12) I te tairururaa, i to tatou vahi faaearaa e i te fare tamaaraa, ia faahanahana to tatou faaneheneheraa ia Iehova. (Tim. 1, 2:9, 10) Ia pine tatou i ta tatou tareta iˈoa e ite te taata e e Ite no Iehova tatou. E ravea te reira no te paraparau ia ratou no nia i te tairururaa e no te poro atu â.
10. E nafea ia papu e e maitai te manaˈo o te mau rave ohipa o te hotera e fare tamaaraa i ta tatou tairururaa?
10 E nafea ia faaohie i te ohipa a te mau rave ohipa o te hotera e fare tamaaraa? Eiaha e tarahu i te piha hotera hau i ta tatou i hinaaro. Eita ïa te tahi atu tia tairururaa e fifihia ia ite i te hoê piha e te hotera ia imi i te apî. Ia î te hotera ia tae aore ra ia faarue atu tatou, e faaite anaˈe i te faaoromai e te mǎrû e tia ˈi. (Kol. 4:6) Eiaha ia haamoe i te horoa i te tahi moni haamauruururaa na te tuati e te mau rave ohipa o te hotera e haapao ra i ta tatou mau teihaa, i ta tatou piha, e te vai ra ˈtu â.
11. Na te aha e faaite ra e e faaiteraa maitai te itehia ei haerea Kerisetiano anaˈe to tatou?
11 Eaha to vetahi ê manaˈo i to tatou haerea i te roaraa o te tairururaa? Ia au i te hoê vea, teie ta te taata haapao i te tahi vahi e tupu ai te tairururaa i parau: “E peu maitai mau ta teie mau taata. Ua oaoa matou i te farii ia ratou i te mau matahiti atoa.” I te matahiti i mahemo, ua moe te pute moni a te hoê taata e ere i te Ite i roto i te hoê hotera î i te tia tairururaa. Ua faahoˈihia te pute moni, aita i hauti-noa ˈˈe-hia, i te taata haapao i te hotera. Ua parau oia i te taata na ˈna te pute moni: “Auaa te mau Ite no Iehova e haere i ta ratou tairururaa i pihai iho noa mai e ua î te hotera ia ratou. Ahani, aita faahou paha ta oe pute moni.”
12. A piri roa mai ai te tairururaa, eaha ta tatou fa, e no te aha?
12 Te piri roa maira te tairururaa o teie matahiti. Ua titauhia te taime e te tutavaraa rahi ia riro te tairururaa e te porotarama ei faaitoitoraa. A haamau ei fa ia tae mai i na mahana e toru atoa, e ia ineine no ta Iehova e ta ˈna faanahonahoraa i faaineine no outou. A faaoti e faaoaoa ia vetahi ê maoti ta outou mau peu maitai, to outou auhoaraa oaoa, e to outou haerea maitai. Hoê â ïa to outou e to vetahi atu manaˈo i teie tuahine i te tairururaa mataeinaa i mairi i papai, “Aita vau e haamanaˈo ra i te hoê tupuraa faahiahia aˈe i teie!”
[Parau iti faaôhia i te api 4]
Mai tei matauhia, e toru hebedoma hou te tairururaa, e titau manihini tatou i te taata ia tae mai
[Parau iti faaôhia i te api 6]
I te tairururaa, i to tatou vahi faaearaa e i te fare tamaaraa, ia faahanahana to tatou faaneheneheraa ia Iehova
[Parau iti faaôhia i te api 7]
A faaoti e faaoaoa ia vetahi ê maoti ta outou mau peu maitai, to outou auhoaraa oaoa, e to outou haerea maitai
[Tumu parau tarenihia i te mau api 4-7]
Haamanaˈoraa no te tairururaa mataeinaa 2011
◼ Hora: E haamata te porotarama i na mahana atoa e toru i te hora 9:20. E matara te opani i te hora 8. A taˈi ai te upaupa, ia haere paatoa tatou e parahi ia nehenehe te porotarama e haamata ma te tura. E hope te porotarama i te hora 4:55 i te Mahana pae e te Mahana maa e i te hora 3:40 i te Tapati.
◼ Vairaa pereoo: I te mau vahi tairururaa atoa i reira te pereoo e tiaihia ˈi, e nehenehe e tomo atu ma te tamoni ore e e faanahohia na mua te mau pereoo e tae matamua mai. O te mau pereoo anaˈe e fanaˈo nei i te parau faatia a te ture aore ra a te tomite tairururaa te nehenehe e tapea i te mau vahi faataahia no te mau huma mero. I te mea e mea taotiahia te vairaa pereoo, mea maitai ia rave hoê noa pereoo.
◼ Parahiraa: E tapaohia te mau parahiraa no te feia anaˈe e noho ra i ǒ oe aore ra e na muri mai ia oe aore ra no ta oe mau piahi Bibilia.—Kor. 1, 13:5.
◼ Tamaaraa i te avatea: A hopoi mai i ta outou maa. Eiaha e faarue i te vahi tairururaa i te taime faafaaearaa i te avatea no te haere e hoo mai i te maa. E nehenehe outou e rave i te hoê farii faatoetoeraa maa nainai a tuu atu ai i raro aˈe i to outou parahiraa. Mea opanihia te mau farii faatoetoeraa maa rahi e te mau farii hiˈo i te vahi tairururaa.
◼ Ô: E nehenehe tatou e faaite i to tatou mauruuru no te mau faanahoraa no te tairururaa ma te horoa noa i te mau ô no te ohipa na te ao nei i te tairururaa. Ia papaihia i nia i te parau moni atoa: “Association Les Témoins de Jéhovah.”
◼ Ati e rapaauraa ru: Eita te pu rapaauraa ru e taniuniuhia no te mau fifi iti haihai. No te hoê rapaauraa ru i te vahi tairururaa, a faaite atu i te hoê taeae e haapao ra i te fariiraa e na ˈna e faaara oioi atu i te piha utuuturaa matamua. I reira, na te hoê pǔpǔ tauturu rapaauraa e hiˈo e mea atâta anei te tupuraa e e rave i tei titauhia. Ia hinaarohia, e niuniu ratou i te 18.
◼ Raau: Ia rave outou i te raau, a afai atoa ˈtu ïa, no te mea aita e raau i te vahi tairururaa.
◼ Tiaa: I te mau matahiti atoa mea rahi roa te pepe nei no te mau tiaa. E mea au aˈe ia oomo mai i te mau tiaa au maitai e te tano no te haere i nia i te mau taahiraa, te mau niuniu e te vai ra ˈtu â.
◼ Feia eita e faaroo maitai: E haapurorohia te porotarama i nia i te ratio i te vahi tairururaa. E rave ïa te feia e hinaaro i ta ratou taoˈa nainai o te haru i te ratio e te taoˈa faaroo tamauhia i roto i te tariˈa.
◼ Pereoo turairai tamarii e parahiraa tufetu: E opanihia te mau pereoo turairai tamarii e te mau parahiraa tufetu i te vahi tairururaa. E faatiahia râ te mau parahiraa aiû o te nehenehe e tamauhia i nia i te hoê parahiraa i pihai iho i te mau metua.
◼ Faanoˈanoˈa: I te mea e e faatupuhia ta tatou mau tairururaa i te hoê vahi e tapirihia te opani, e tapao o te hamani maitai eiaha e pîpî faarahi i te monoˈi e te faanoˈanoˈa hauˈa puai o te nehenehe e haafifi i te feia e maˈi hutiraa aho to ratou aore ra te tahi atu.—Kor. 1, 10:24.
◼ Veuillez suivre l’intérêt (S-43): E faaohipahia te api parau Veuillez suivre l’intérêt no te horoa i te mau haamaramaramaraa no nia i te taata atoa tei anaanatae i te pororaa faanaho-ore-hia i te roaraa o te tairururaa. E manaˈo ïa te mau taata poro i te afai mai hoê aore ra e piti o taua api parau ra. E nehenehe te mau api parau i faaîhia e horoahia i te tuhaa haapao buka aore ra i te papai parau o ta outou amuiraa ia hoˈi atu outou.—A hiˈo i te km 11/09 (api 4).
◼ Fare tamaaraa: A faahanahana i te iˈoa o Iehova ma to outou haerea maitai i te fare tamaaraa. I vetahi mau fenua, ua matauhia i te vaiiho i te tahi moni haamauruuru na te tuati.
◼ Hotera:
(1) Eiaha e tarahu i te mau piha hau aˈe i te hinaaro-mau-hia, e a faatura i te rahiraa taata fariihia no te hoê piha.
(2) Mai te peu e mea titauhia ia faaore i ta oe tarahuraa, a faaara oioi atu i te hotera.—Mat. 5:37.
(3) A rave noa i te hoê turairaa taihaa ua ineine anaˈe oe, e a faahoˈi oioi atu ia nehenehe te tahi atu e faaohipa i te reira.
(4) Eiaha e tunu i te maa i roto i te mau piha mai te peu e eita e faatiahia.
(5) I vetahi mau fenua, e mea tano ia vaiiho i te tahi moni haamauruuru na te vahine tamâ piha.
(6) E vai faito noa tatou ia rave tatou i te maa e pûpûhia na te mau hoani o te hotera (maa, taofe aore ra pape paari).
(7) A faaite i te hotu a te varua i nia i te mau rave ohipa o te hotera i te mau taime atoa. Te haapao ra ratou e rave rahi hoani e e oaoa ratou ia faaite tatou i te mǎrû, te faaoromai, e te haerea e au.
(8) Ia aufau oe maoti te hoê tareta moni, e tapea mai te hotera i te tino moni no ta oe piha e te tahi atu tino moni ia tuino noa ˈtu oe i te tahi ohipa. Mai te peu e aita e peapea e rave noa ratou i te tino moni no ta oe piha tau mahana noa i muri aˈe i to oe faarueraa i te hotera.
◼ Rima tauturu: E oaoa rahi atoa tatou i te taeraa ˈtu i te tairururaa ia tauturu tatou no te rave i te ohipa. (Ohi. 20:35) Ia hinaaro noa ˈtu te tahi, a tapao ïa i te iˈoa i te mau taeae e haapao ra i tera tuhaa i te tairururaa. E nehenehe atoa te mau tamarii i raro aˈe i te 16 matahiti e tauturu ma te haa e to ˈna metua aore ra te taata e haapao ra ia ˈna aore ra te tahi atu taata paari ta raua i faatia.
[Tumu parau tarenihia i te api 5]
E nafea ia faaite i te titau-manihini-raa?
Ia ite tatou i te rahiraa o te taata o ta tatou tuhaa fenua, eiaha tatou e haamarirau. E parau paha tatou: “Iaorana. Te tutava nei matou na te ao nei i te opere i teie titau-manihini-raa. Teie ta oe. E ite oe i te mau haamaramaramaraa hau i nia iho.” E faaara te muaraa o te titau-manihini-raa i te anaanatae o te taata. Ia ite ïa te taata i te reira a horoa ˈi oe i ta ˈna. Ia oraora oe. Ia opere tatou i te reira i te hopea hebedoma, a pûpû atoa i te mau vea ia nehenehe.