“Ei haerea maitai to outou i rotopu i te mau nunaa”

1. No te aha e mea faufaa ˈi no tatou ia faaite i te haerea maitai i te mau tairururaa i mua?

¹ I te mau matahiti atoa, ia tupu te mau tairururaa, e hiˈo te mau taata ia tatou. No reira e mea faufaa ia itehia i nia i to tatou haerea o vai te Atua ta tatou e haamori ra. (Lev. 20:26) E haapapu ta tatou peu maitai e to tatou faaneheneheraa e e pǐpǐ mau tatou a te Mesia. I te tairururaa mataeinaa i mua aore ra tairururaa nunaa rau, e nafea ia faaite i te ‘haerea maitai i rotopu i te mau nunaa?’ E nafea atoa ia faahanahana i to tatou Metua i te raˈi?—Pet. 1, 2:12.

2. Nafea ia faaite i te mau huru maitatai Kerisetiano i te tairururaa i mua?

² A faaite i te mau huru maitatai Kerisetiano: Eita tatou e pee ra i te huru feruriraa o teie nei ao. E mea taa ê te here ta tatou e faaite ra te tahi i te tahi e to tatou haerea i nia i “to rapae au ra.” (Kol. 3:10; 4:5; Tim. 2, 3:1-5) E mea faufaa ia faaite tatou i te hamani maitai e te faaoromai i nia i te mau rave ohipa o te hotera e te fare tamaaraa. A na reira atoa ia tupu te tahi fifi. E peu matauhia anei te horoaraa i te tahi moni haamauruururaa? Na ta tatou peu maitai ïa e turai ia tatou ia horoa i te reira.

3. Ia aha te mau metua, e no te aha?

³ E mea faufaa ia haapao maitai te mau metua i ta ratou mau tamarii i te vahi e tupu ai te tairururaa, i te mau fare tamaaraa e i te hotera. (Mas. 29:15) Ua parau hoê vahine haapao i te fare tamaaraa o te hoê hotera i na hoa faaipoipo: “Ua here matou ia outou. E mea ite roa to outou mau utuafare e tamarii i te peu. E hinaaro matou pauroa ia haere mai outou i te mau hebedoma atoa.”

4. I te vahi e tupu ai te tairururaa, mai te aha to tatou huru rapaeau e tia ˈi?

⁴ Te huru faaahuraa au maitai: E mea faufaa ia tano to tatou ahu. Eiaha e pee i te mau huru faanehenehe au ore o teie nei ao. (Tim. 1, 2:9) Aita tatou e hinaaro e oomo i te ahu haapaoraa ore ia haere mai aore ra ia faarue tatou i te hotera. Oia atoa i te taime faafaaearaa. E oaoa ïa tatou i te pine i te tareta tairururaa e eita tatou e haama i te poro ia nehenehe. E faahopearaa maitai ia faaite i te huru rapaeau e haerea maitai i te mau tairururaa i mua. E hinaaro ïa te feia aau haavare e faaroo i te poroi faaora o te Bibilia e e faaoaoa tatou ia Iehova.—Zeph. 3:17.

Haamanaˈoraa no te tairururaa 2014

◼ Hora: E matara te mau opani i te hora 8. Ia taˈi te upaupa na mahana e toru i te hora 9:20, e haere paatoa anaˈe e parahi. E nehenehe ïa te porotarama e haamata ma te tura. I te Mahana pae e te Mahana maa, e hope te rururaa i te hora 4:55. I te Tapati râ, tei te hora 3:50.

◼ Vairaa pereoo: I te mau vahi tairururaa atoa i reira te pereoo e tiaihia ˈi, e nehenehe e tomo atu ma te tamoni ore. O te mau pereoo e tae matamua mai te faanahohia na mua. Mea taotiahia te vairaa pereoo, a rave noa ïa hoê pereoo. Mai te peu e e parau faatia a te ture aore ra a te tomite tairururaa, e nehenehe e tapea i te vahi faataahia no te huma mero.

◼ Parahiraa: Ia matara mai te mau opani i te mau poipoi atoa, eiaha e ru no te tapao i te mau parahiraa. E ere i te hoê tatauraa. E tauturu mai te feruriraa haapae ia haapao i to vetahi ê maitai. E haapapu te reira e e Kerisetiano mau tatou. E hinaaro ïa te feia e hiˈo maira e arue i te Atua. (Ioa. 13:34, 35; Kor. 1, 13:4, 5; Pet. 1, 2:12) A tapao noa i te mau parahiraa no te feia anaˈe e noho ra i ǒ oe, tei na muri mai ia oe e no ta oe mau piahi Bibilia. No te iti o te mau parahiraa no te ruhiruhia e taata maˈimaˈi, eita te utuafare atoa e nehenehe e parahi atu i pihai iho. E faatiahia râ te taata haapao.

◼ Tamaaraa i te avatea: Mea au aˈe ia hopoi mai i ta outou maa i te vahi tairururaa i te haere e hoo mai. E nehenehe e rave i te hoê farii faatoetoeraa maa nainai a tuu atu ai i raro aˈe i te parahiraa. Mea opanihia te farii faatoetoeraa maa rahi e te mau farii hiˈo.

◼ Ô: E nehenehe tatou e horoa i te ô no te ohipa na te ao nei. E faaite te reira i to tatou mauruuru no te mau faanahoraa o te tairururaa. Ia horoahia te parau moni, a papai i nia i te reira: “Association Les Témoins de Jéhovah.”

◼ Raau: Mai te peu e e maˈi to oe, a hopoi mai i ta oe raau no te mea eita e horoahia i te vahi tairururaa. A faarue i te mau nira patia a te feia maˈi omaha tihota i roto i te farii no te pehu atâta, eiaha râ i te vahi tairururaa e te hotera.

◼ Aˈoraa parururaa: A haapao maitai ia ore oe e topa aore ra e hee. I te mau matahiti atoa, e mea rahi te pepe nei no to ratou tiaa. Te tiaa poro teitei iho â râ. Mea au aˈe ia oomo mai i te tiaa au maitai e te tano no te haere i te mau vahi atoa.

◼ Feia eita e faaroo maitai: E haapurorohia te porotarama i nia i te ratio i te vahi tairururaa. E rave ïa te feia e hinaaro i ta ratou taoˈa nainai o te haru i te ratio e te taoˈa faaroo tamauhia i roto i te tariˈa.

◼ Pereoo turairai tamarii e parahiraa tufetu: E opanihia te mau pereoo turairai tamarii e parahiraa tufetu i te vahi tairururaa. E faatiahia râ ia tamau i te parahiraa aiû i pihai iho na metua.

◼ Faanoˈanoˈa: E faatupuhia anei te tairururaa i te hoê vahi e tapirihia te opani? Ia ore te feia maˈi aho pau aore ra te tahi atu e fifi, e mea au aˈe ia ore e pîpî faarahi i te monoˈi. Oia atoa i te faanoˈanoˈa hauˈa puai. Ma te na reira te hamani maitai atu ra ïa tatou.—Kor. 1, 10:24.

◼ Veuillez suivre l’intérêt (S-43): Ia poro tatou ma te faanaho-ore-hia i te taata i anaanatae mai, e faaî anaˈe i te api parau Veuillez suivre l’intérêt. E nehenehe e horoa ˈtu i tei haapao ra i te mau buka. Aita anaˈe, i te papai parau ïa o ta outou amuiraa.

◼ Fare tamaaraa: I te fare tamaaraa, a faahanahana i te iˈoa o Iehova ma to outou haerea maitai. Ei faaahuraa e au i te Kerisetiano to tatou e tia ˈi. I vetahi mau fenua, e vaiihohia te tahi moni haamauruuru na te tuati.

◼ Hotera:

Eiaha e tarahu i te mau piha hau aˈe i te hinaaro-mau-hia e a faatura i te rahiraa taata fariihia no te hoê piha.
No te tahi tupuraa taa ê e faaore paha oe i te tarahuraa, a faaara oioi atu i te hotera. E nehenehe ïa te tahi atu mau taata e faaohipa i te piha.—Mat. 5:37.
I te hotera, ia faaohipa oe i te tareta moni, e tapeahia te tahi tino moni ia tuino noa ˈtu oe i te taihaa. I muri aˈe noa to oe faarueraa i te hotera e aufau-taatoa-hia ˈi te piha tarahu.
A rave i te hoê turairaa taihaa ia hinaaro iho â outou i te reira e a faahoˈi oioi atu ia nehenehe vetahi ê e faaohipa.
I vetahi fenua, e mea tano ia vaiiho i te tahi moni haamauruuru na te taata amo taihaa e te vahine tamâ piha.
Eiaha e tunu i te maa i roto i te mau piha mai te peu e eita e faatiahia.
E vai faito noa a rave ai i te maa e pûpûhia na te hoani o te hotera (maa, taofe aore ra pape paari).
A faaite i te hotu a te varua i nia i te mau rave ohipa o te hotera i te mau taime atoa. E rave rahi hoani ta ratou e haapao. E oaoa ïa ratou ia faaite tatou i te mǎrû, te faaoromai e te haerea e au.
I te hotera, ia haapao noa te metua i ta ratou tamarii i te mau vahi atoa. I te vahi hopuraa pape anei, fariiraa taata, piha faaetaetaraa tino e te vai ra ˈtu â.

◼ Rima tauturu: Ia hinaaro te tahi e tauturu, a farerei atu i te mau taeae e haapao ra i tera tuhaa i te tairururaa. E farii-atoa-hia te tamarii i raro aˈe i te 16 matahiti ia haa oia e to ˈna metua, taata haapao aore ra tei faatiahia.