‘Ia haapaohia to te Atua hinaaro’
1. Eaha te manaˈo tumu o ta tatou mahana tairururaa taa ê, e no te aha mea tano ai ia hiˈopoa i te reira?
1 No to Iehova hinaaro i poietehia ˈi tatou. (Apo. 4:11) Eita e raea ia tatou te fa i poietehia ˈi tatou aore anaˈe tatou e haapii e e rave i te hinaaro o te Atua. E ere i te mea ohie, e titauhia hoi ia aro i to tatou hinaaro ia rave “i ta te tino e ta te aau i hinaaro” aore ra i ta te ao. (Eph. 2:3; Pet. 1, 4:3; Pet. 2, 2:10) Aita anaˈe te tauturu a te Atua, e ‘riro tatou ei tîtî na te Diabolo’ a rave atu ai i to ˈna hinaaro. (Tim. 2, 2:26) E tauturu mai ta tatou mahana tairururaa taa ê no te matahiti taviniraa 2012, ia ohipa ia au i te toru o te aniraa o te pure a te Fatu, oia hoi “ia haapaohia to oe hinaaro.”—Mat. 6:9, 10.
2. E pahonohia teihea mau uiraa?
2 Uiraa te pahonohia: A faaroo ai oe i te porotarama, a imi i te pahonoraa o teie mau uiraa: Eaha ˈtu â mea faufaa te rave hau atu i te faarooraa i te Parau a te Atua? E nafea ia ite i to te Atua hinaaro no tatou? No te aha e mea tia ˈi ia poro i te mau huru taata atoa? E nafea ia ite i te hoê oraraa oaoa î maitai? E te feia apî, ia haapapu outou ia Iehova i te aha? Eaha te haamaitairaa ia rave i to te Atua hinaaro? No te aha mea faufaa ˈi ia faaitoito ia vetahi ê?
3. E nafea tatou e faufaa-roa-hia ˈi i teie tairururaa?
3 Ia tae iho â outou i te tairururaa. A horoa i te tariˈa faaroo. To reira te hoê tia o te Betela aore ra te hoê tiaau ratere ei taeae orero ratere. Na mua ˈˈe e i muri aˈe i te porotarama, eiaha e mǎtaˈu e haere e paraparau ia ˈna e i ta ˈna vahine. Ia hoˈi outou i te fare, eiaha e riro ei taata “e moina noa te parau.” Ei utuafare, a tauaparau no nia i te porotarama e i ta outou e nehenehe e rave no te haa hau atu â ia au i to te Atua hinaaro.—Iak. 1:25.
4. No te aha mea faufaa ˈi ia rave na mua i to te Atua hinaaro?
4 Fatata roa Iehova i te haamou i te feia e imi ra i to ratou iho hinaaro e i tei patoi i te auraro i to ˈNa hinaaro. (Ioa. 1, 2:17) Te mauruuru nei ïa tatou ia Iehova i te faaineineraa i teie mau haamaramaramaraa i te taime au no te tauturu ia tatou ia rave na mua i to ˈNa hinaaro!