A tiai i to manaˈo haava

1. Eaha te manaˈo tumu o te mahana tairururaa taa ê o te matahiti taviniraa 2013, e e tauturu mai te porotarama ia aha?

¹ I te mau mahana atoa, te vai ra te mau tupuraa o te nehenehe e haaviivii i to tatou manaˈo haava. No reira i maitihia ˈi te manaˈo tumu “A tiai i to manaˈo haava” no te mahana tairururaa taa ê o te matahiti taviniraa 2013, o te haamata i te 1 no Tetepa 2012. (Tim. 1, 1:19) E tauturu teie porotarama ia tatou taitahi ia haapao maite e nafea ia faaohipa i teie ô faahiahia no ǒ mai i to tatou Atua Poiete ra.

2. Eaha te mau uiraa faufaa e pahonohia i te roaraa o te porotarama?

² A imi i teie mau manaˈo: E pahono te porotarama i teie na uiraa faufaa e hitu no nia i te manaˈo haava:

• Eaha te mea atâta no te manaˈo haava?

• E nafea ia haapii i to tatou manaˈo haava?

• E nafea tatou e ore ai e viivii i te toto o te taata atoa?

• E faaite to tatou manaˈo e te faaohiparaa tatou i te mau faaueraa tumu Bibilia i te aha no nia ia tatou?

• E nafea tatou e tâuˈa ˈi i te manaˈo haava o vetahi ê?

• E te feia apî, e nafea outou e mau papu ai i mua i te faaheporaa?

• Eaha te mau haamaitairaa ia arataihia to tatou manaˈo haava e te varua moˈa?

3. E nafea tatou e faufaahia ˈi i te porotarama?

³ Maoti Iehova e nehenehe ai tatou e patoi i te mau tutavaraa a Satani i te haaviivii i to tatou manaˈo haava. Na roto i te Bibilia e te faanahonahoraa a te Atua, te na ô maira to tatou Metua î i te here i te raˈi: “Teie te eˈa: e na reira i te haere.” (Isa. 30:21) Maoti teie tairururaa e horoa mai ai Iehova i taua aratairaa ra. A faanaho ïa i teie nei no te tae atu. A faaroo maitai i te porotarama taatoa e a feruri e nafea oe e faaohipa ˈi i te haapiiraa. A tauaparau e te utuafare no nia i te porotarama. Ma te faaohipa i te haapiiraa e horoahia e itoito ai tatou i te tapea i te hoê “aau hapa ore,” aore ra manaˈo haava maitai, a ore atu ai e hema i te mau mea navenave o te ao a Satani.—Pet. 1, 3:16.