E mea maitai te Parau a te Atua ei haapiiraa
1. Eaha te manaˈo tumu o te tairururaa haaati no te matahiti taviniraa 2014 e teihea uiraa te pahonohia?
1 Ei Orometua Rahi roa ˈˈe i te ao nui, o Iehova te haapii maitai aˈe ia tatou. (Isa. 2:3) E nafea oia e na reira ˈi? Ua horoa mai i te tahi buka tei hau ê i te tahi atu, ta ˈna Parau faaurua, te Bibilia. E nafea tatou e faufaahia ˈi i ta te Atua haapiiraa i te pae tino, feruriraa, huru aau e te pae varua? E pahonohia te reira i te tairururaa haaati no te matahiti taviniraa 2014. Teie te manaˈo tumu, “E mea maitai te Parau a te Atua ei haapiiraa,” no roto mai i te Timoteo 2, 3:16.
2. Eaha te mau uiraa e faaite maira i te mau manaˈo faufaa o te tairururaa?
2 A feruri i teie mau manaˈo faufaa o te tairururaa: Na to muri nei mau uiraa e faaite atu i te reira:
• Ia haapaohia ta te Atua haapiiraa, mai te aha to tatou oraraa? (Isa. 48:17, 18)
• A taui ai i te oraraa no te tavini ia Iehova ma te taime taatoa, ia papu ia tatou i te aha? (Mal. 3:10)
• Eaha to tatou huru i mua i te parau ěê e tia ˈi? (Heb. 13:9)
• E nafea ia haapii ia vetahi ê mai ia Iesu? (Mat. 7:28, 29)
• No tei horoa ra i te haapiiraa i te amuiraa, no te aha e mea tia ˈi ia haapii ratou ia ratou iho? (Roma 2:21)
• E mea maitai te Parau a te Atua ei aha? (Tim. 2, 3:16)
• Eaha te huru o te taata a “faaaueue” ai te Atua i to te mau fenua atoa? (Hag. 2:6, 7)
• Mai te aha te tiaturi o Iehova ia tatou? (Eph. 5:1)
• No te aha e mea tia ˈi ia tutava no te haapao i ta Iehova haapiiraa? (Luka 13:24)
3. No te aha e mea faufaa ˈi ia tae i te tairururaa a faaroo atu ai i te porotarama faaineinehia i te taime au?
3 Hou a papai ai i te mau parau o te manaˈo tumu o te tairururaa, ua faaite Paulo mai te aha te huru i te tau hopea i roto i te Timoteo 2, pene 3. Ua na ô oia: “E te mau taata iino e te feia haavare ra, e tupu â to ratou ino e e rahi atu, i te haavare-noa-raa ˈtu, e te haavareraahia mai.” (Tim. 2, 3:13) Ia ore tatou e haavarehia, e mea faufaa ia faaroo e ia haapao i ta te Atua haapiiraa. E faaoti anaˈe i te tae i te tairururaa a faaroo atu ai i tera porotarama faaineinehia i te taime au.