Pororaa manuïa na te mau aroâ
1. E nafea e pee ai i te hiˈoraa o Iesu?
1 A tavini ai Iesu i te fenua, ua paraparau oia i te taata atoa ta ˈna i farerei i nia i te purumu e i te vahi taata. (Luka 9:57-61; Ioa. 4:7) Ua hinaaro oia e faaite i ta ˈna poroi faufaa i te taata rahi roa. I teie mahana, e ravea maitai roa te pororaa na te mau aroâ no te tauturu i te taata ia noaa te paari no ǒ mai i te Atua. (Mas. 1:20) E manuïa roa ˈtu â tatou na tatou anaˈe e tapiri atu i te taata ma te faaohipa i te haroaroaraa.
2. E nafea ia tapiri atu i te taata?
2 A tapiri atu i te taata: Mea maitai aˈe ia tapiri atu i te taata i te faaea-noa-raa i te hoê vahi e na te taata e tapiri mai. A hiˈo i te tahi taata ma te mata ataata e ma te auhoa. Mai te peu e mea rahi outou, mea maitai aˈe eiaha e haere amui i nia i te hoê taata. E atuatu atoa i te anaanatae o te taata ta oe i farerei. Ia tano, a ani ma te mǎrû e nafea oe e nehenehe ai e farerei faahou ia ˈna. E poro tamau vetahi feia poro i te hoê â vahi, e nehenehe ïa ratou e paraparau i te hoê â taata e e atuatu i to ratou anaanatae.
3. E nafea ia faaohipa i te haroaroaraa a poro ai na te mau aroâ?
3 A faaohipa i te haroaroaraa: A maiti maitai i te vahi i reira oe e tia ˈi e o vai te tapiri atu. Aita e titauhia ia poro i te taata atoa. A hiˈo. Mai te peu e te ru ra te taata, mea maitai aˈe ia vaiiho ia ˈna ia haere. I mua i te hoê hoohooraa, a ara ia ore te paoti ia amuamu. Mea maitai aˈe ia poro i te taata e haere maira i rapae i te hoê vahi hoohooraa i tei tomo atu ra. A tapiri atu i te taata ma te ore e faariaria aore ra e faahitimahuta ia ratou. A haroaroa atoa ia pûpû oe i te papai. Ia ore te taata e anaanatae roa, mea maitai aˈe ia pûpû atu i te hoê api parau i te tahi vea.
4. No te aha e tuhaa oaoa e te manuïa te pororaa na te mau aroâ?
4 Mea rahi te huero o te parau mau ta tatou e nehenehe e ueue i te hoê taime poto maoti te pororaa na te mau aroâ. (Koh. 11:6) E farerei paha tatou i te taata te ore e farereihia a poro ai tatou i tera e tera fare. No te aha e ore ai e faanaho ia oe no te poro na te mau aroâ? E tuhaa oaoa e te manuïa hoi te reira o te taviniraa.