Opereraa i te titau-manihini-raa mai te 2 no Eperera ˈtu

1. Afea te opereraa o te mau titau-manihini-raa o te Oroa haamanaˈoraa, e eaha to te reira faufaaraa?

¹ Mai te 2 e tae atu i te 17 no Eperera, e opere tatou i te mau titau-manihini-raa i te tupuraa faufaa roa ˈˈe o te matahiti: te Oroa haamanaˈoraa o te pohe o te Mesia. I te mau matahiti i mairi, mea rahi te taata anaanatae tei pahono maitai mai i teie opereraa. Ei hiˈoraa, i te mahana o te Oroa haamanaˈoraa, ua niuniu te hoê vahine i te Betela ma te parau: “No tae noa ˈtura vau i te fare, ite mai nei au i te hoê titau-manihini-raa i te pae opani. E hinaaro vau e haere, aita râ vau i papu i te hora.” Faataa ˈtura te taeae ihea te papairaahia te reira i nia i te titau-manihini-raa. Haapapu aˈera te vahine, “E haere au i ta outou oroa i teie po!”

2. Eaha te parau no te faaite i te titau-manihini-raa?

² E nafea tatou? E taime taotiahia ta tatou no te rave i te tuhaa fenua, eiaha ïa e haamarirau. E parau paha tatou: “Iaorana. Te titau manihini nei matou i to oe utuafare i te hoê oroa tamatahiti faufaa e tupu na te ao atoa nei i te Tapati 17 no Eperera, teie ta oe. [A horoa ˈtu i te titau-manihini-raa.] Taio mahana teie o to Iesu pohe. E faataa mai te hoê oreroraa parau Bibilia tamoni ore e nafea tatou e haamaitaihia ˈi maoti te hoo o te Mesia. Te faaite ra teie titau-manihini-raa i te vahi e te hora o teie oroa.”

3. E nafea ia titau manihini e rave rahi roa taata?

³ E tuhaa fenua rahi anaˈe ta te amuiraa, e parau mai paha te mau matahiapo ia vaiiho i te mau titau-manihini-raa i te fare aita e taata, i te hoê râ vahi o te fatu fare anaˈe te ite. Eiaha ia moe ia titau manihini i ta oe mau farerei-faahou-raa, to oe mau fetii, hoa ohipa, hoa haapiiraa e ta oe i matau. I te hopea hebedoma, a pûpû atoa i te mau vea ia nehenehe. E tia anei ia oe ia riro ei pionie tauturu i Eperera e ia apiti roa ˈtu â i teie opereraa taa ê?

4. No te aha tatou e hinaaro ai ia tae mai te feia aau haavare ore i te Oroa haamanaˈoraa?

⁴ E fanaˈo te feia anaanatae e tae mai i te hoê faaiteraa puai mau! E faaroo ratou mea nafea Iehova i te faaiteraa i to ˈna here rahi maoti te hoo. (Ioa. 3:16) E ite ratou e nafea te Basileia o te Atua e haamaitai ai i te huitaata. (Isa. 65:21-23) E nehenehe atoa ratou e paraparau i te tahi atu e e ani i te hoê haapiiraa Bibilia no te ite hau atu â. Ta tatou e hinaaro, ia farii maitai mai ïa te taata aau haavare ore e rave rahi i te titau-manihini-raa e ia apiti atoa mai i te Oroa haamanaˈoraa!