Titau-manihini-raa no te Oroa haamanaˈoraa e operehia na te ao atoa nei
1. Eaha te opereraa taa ê i faanahohia na te ao atoa nei hou te Oroa haamanaˈoraa?
1 “E na reira outou ei manaˈoraa ia ˈu.” (Luka 22:19) Ia au i ta Iesu faaueraa, e putuputu te feia haamori ia Iehova e te taata tei anaanatae i te 30 no Mati 2010, no te haamanaˈo i te poheraa o Iesu. Mai te 13 no Mati atu, e operehia na te ao atoa nei te mau titau-manihini-raa taa ê no tera Oroa haamanaˈoraa.
2. E nafea ia pûpû i te titau-manihini-raa?
2 E nafea ïa? E horoa paha oe i te titau-manihini-raa i te fatu fare ia ite oia i te hohoˈa i te api matamua, a parau atu ai: “I te arui o te 30 no Mati, e mirioni taata e ati aˈe te ao o te putuputu no te haamanaˈo i te poheraa o Iesu. Ua haere mai au e titau manihini ia oe e to oe utuafare no tera oroa. E nehenehe atoa oe e afai mai i to oe mau hoa. Teie te hora e te vahi e tupu ai teie oroa.” Ia nehenehe, e taio paha oe i te Luka 22:19 i roto i te Bibilia no te faaite i te faaueraa a te mau Papai. A haamanaˈo râ e e taime taotiahia to tera opereraa, e mea maitai aˈe ïa ia haapoto noa.
3. O vai ta tatou e titau manihini?
3 Mai te peu e e tuhaa fenua rahi ta ta oe amuiraa, e parau atu paha te mau matahiapo ia vaiiho i te mau titau-manihini-raa i te mau fare aore e taata i te taime matamua iho â. Ia tano, a pûpû atu i te titau-manihini-raa e te mau vea. Eiaha e haamoe i ta oe mau farerei-faahou-raa, piahi Bibilia, hoa ohipa, hoa haapiiraa, fetii, taata tapiri, e te tahi atu ta oe i matau.
4. No to tatou mauruuru i to Iehova here i te horoaraa mai i te hoo, ia aha ïa tatou?
4 A poro rahi atu â: E taime maitai roa te tau o te Oroa haamanaˈoraa no te poro hau atu â. E nehenehe anei oe e faanaho ia oe no te riro ei pionie tauturu? E tamarii aore ra e piahi Bibilia anei ta oe e haere maitai ra i mua i te pae varua? Mai te peu e e, a paraparau atu ïa i te mau matahiapo no te ite e ua ineine anei ratou i te apiti atu i te opereraa taa ê ei taata poro bapetizo-ore-hia. No to tatou mauruuru i to Iehova here i te horoaraa mai i te hoo, e tae ïa tatou i te Oroa haamanaˈoraa e e titau manihini atoa tatou e rave rahi roa taata ia amui mai.—Ioa. 3:16.