Rata a te Tino aratai

E au mau hoa Ite no Iehova e:

E anotau faahiahia mau â teie! E auê hoi te oaoa! Te oaoa mau nei matou i te haa “ma te aau hoê” e o outou te mau taeae e tuahine here e, no te horoa i te faaiteraa rahi roa ˈˈe i to tatou Metua i te raˈi ra o Iehova.—Zeph. 3:9; Ioa. 14:12.

E ere no te mea te tavini ra tatou ia Iehova ma te oaoa aita ïa to tatou e fifi. I te matahiti taviniraa i mairi, ua fifihia te tahi o outou no te aueueraa fenua, te pape pue, te mataˈi rorofai e vetahi atu â ati natura peapea mau. (Mat. 24:7) I te mau mahana atoa, te aro nei e rave rahi i te mau faahopearaa iino o te maˈi e o te ruhiruhia. E faaruru iho â tatou paatoa i te mau “pohe,” aore ra ati, e rahi noa ˈtura. (Mat. 24:8) I te tahi mau fenua, mai ia Aramenia, Érythrée e Korea apatoa, mea rahi o to tatou mau taeae tei tapeahia no to ratou faaroo.—Mat. 24:9.

Eaha tei tauturu mai ia maitai noa to tatou manaˈo noa ˈtu teie mau fifi? Ua haamanaˈo mai te irava matahiti no 2010 i te tahi tumu faufaa: ‘E haamahu te aroha i te mau mea atoa. E ore roa te aroha e mou.’ (Kor. 1, 13:7, 8) Maoti to tatou here te tahi i te tahi, e ia Iehova atoa, e mau papu ai tatou.

Te maere nei e rave rahi e parau ra e e Kerisetiano ratou i te rahi e te mau maite o ta tatou pororaa. Noa ˈtu e te patoi ra paha ratou i ta tatou mau tiaturiraa e haapiiraa, ua parau vetahi, “Te rave nei outou i te mea tei titauhia ia matou!” Na te aha e tauturu ra i te mau Ite no Iehova ia tamau i te poro i te mau mahana atoa? Na te here noâ. Mai to tatou Metua i te raˈi, eita tatou e hinaaro ia haamouhia te tahi. (Pet. 2, 3:9) E itehia to tatou hinaaro ia noaa paatoa te tatarahapa i roto i te numera apî maitai roa ˈˈe e 7 508 050 feia poro i te matahiti taviniraa i mairi. Ua ite anei outou i roto i te tahi atu haapaoraa e rave rahi taata te horoa ra ia ratou iho ma te aau tae no te haere e poro?

Te faaitoitohia ra tatou ia hiˈo i te tupuraa o te parau tohu a Isaia: “E riro ia tae i te mau mahana hopea ra, e faatiahia te mouˈa ra o te fare o Iehova i nia i te tupuai mouˈa, e faateiteihia ïa i nia ˈˈe i te mau aivi; e tairuru atoa mai te mau etene atoa ra i reira.” (Isa. 2:2-4) I rotopu i teie nahoa taata e tairuru ra i te fare o Iehova e 294 368 tei bapetizohia i te matahiti taviniraa i mairi. Manava ia ratou i roto i ta tatou faanahonahoraa. No to tatou here Kerisetiano, e tauturu noa anaˈe ia ratou ia patoi i te mau aroraa a to tatou enemi Satani te Diabolo.—Pet. 1, 5:8, 9.

I te Mahana piti 30 no Mati 2010, ua tae atu 18 706 895 taata i te Oroa haamanaˈoraa. Te faaite ra teie numera apî maitai roa ˈˈe e e mirioni â te nehenehe e apiti ia tatou no te haamori ia Iehova. Auê te oaoa aita Iehova i haamou atura i teie nei ao ino! A tiai noa ˈi, e tauturu mai to tatou here ia faaoromai noa.—Tes. 2, 3:5.

Ua haapaari te tairururaa mataeinaa “Ia piri noa to oe taairaa e o Iehova!” i tupu no te rahiraa i 2010, i to tatou mau taairaa e to tatou Metua i te raˈi o Iehova. Ua tano iho â te mau parau a te fatu salamo: “E ao to te feia, o Iehova to ratou Atua.” (Sal. 144:15) Noa ˈtu eaha to ananahi, tei pihai iho anaˈe Iehova ia tatou, eita roa ˈtu tatou e mǎtaˈu i te tahi noa ˈˈe mea. (Sal. 23:4) E fatata Iehova maoti ta ˈna Tamaiti i te ‘haamou i te ohipa a te Diabolo.’ (Ioa. 1, 3:8) Oia mau, te tiai ru nei tatou i taua mahana ra! A tiai noa ˈi râ, mea rahi â te ohipa e rave.—Kor. 1, 15:58.

Ia papu ia outou e tei roto noa outou i ta matou mau pure aore e faaea. (Roma 1:9) Ia “tamau maite outou i to outou iho hinaaro i te Atua, i te tiairaa i te aroha o to tatou Fatu ra o Iesu Mesia, e tae noa ˈtu i te ora mure ore.”—Iuda 21.

Te here nei matou ia outou paatoa!

To outou mau taeae,

Tino aratai a te mau Ite no Iehova