Porotarama o te mahana tairururaa taa ê i mua nei
Teie te manaˈo tumu o te porotarama o te mahana tairururaa taa ê no te matahiti taviniraa 2009 ‘E ara noa i te taviniraa, ia rave oe i te reira,’ niuhia i nia i te Kolosa 4:17 (MN). Ei Kerisetiano, e haafaufaa roa tatou i tera faaueraa. Ta tatou fa, o te raveraa ïa i ta tatou taviniraa ma te haapao maitai mai ta Iesu i rave. (Ioa. 17:4) E hiˈoraa maitai roa atoa te aposetolo Paulo no tatou i roto i te reira tuhaa. Ua faaoti papu oia e faaoti i ta ˈna hororaa i roto i te taviniraa.—Ohi. 20:24.
E faaite mai te tuhaa a te tiaau haaati e nafea te taata poro e rave rau e faaruru ai i te mau haafifiraa i roto i ta ratou taviniraa. E e haamahitihiti mai te oreroraa parau “A atuatu i ta oe i tanu” e nafea tatou e nehenehe ai e tauturu mau i te feia “[aau farii e tano] no te ora mure ore.” (Ohi. 13:48; MN) E paraparau hoê hoê na mua te taeae orero ratere i te mau irava o te Korinetia 2, 6:1-10 i roto i te oreroraa parau “E faaite hua tatou ia tatou iho ei tavini.” I te taperaa mahana, e aparau oia i te feia e faaroo ra i nia i te manaˈo tumu “A haafaufaa rahi i ta oe taviniraa.” E fanaˈo oe i te faaitoitoraa i roto i na oreroraa parau “Mea au na te feia apî e te feia paari te taviniraa” e “Te feia apî e rave ra i te taviniraa.” E mea maitai ia faaara oioi te feia o te hinaaro e faataipe i ta ratou pûpûraa na te Atua ma te bapetizo i roto i te pape i te tairururaa haaati aore ra taa ê, i te tiaau peretiteni. Te hoê tuhaa faufaa o ta tatou mau tairururaa atoa, oia hoi te hiˈopoaraa ïa i Te Pare Tiairaa. A afai mai i ta oe vea o te haapiihia i te hebedoma o te mahana tairururaa taa ê.
A rave maite ai tatou i ta tatou taviniraa, e hiˈo maitai tatou e aita te tahi atu mau mea faufaa e ohipa i tapoˈi i ta Iehova i horoa mai. E tauturu mai iho â te faaitoitoraa bibilia horoahia na roto i tera porotarama o te mahana tairururaa taa ê ia tatou paatoa ia taa eaha te titauhia ia rave tatou no te tapea i te mea faufaa roa ˈˈe e no te hiˈopoa i ta tatou taviniraa ma te fa e rave hope roa ˈtu.