Porotarama o te tairururaa haaati i mua nei

E nafea e nehenehe ai e mau papu i mua i te feia o te patoi uˈana ra i te haamoriraa mau? E nafea tatou e nehenehe ai e upootia i nia i te mau mana o te tamata noa ra i te faahoˈi ia tatou i te ao paieti ore? E pahono te porotarama o te tairururaa haaati o te matahiti taviniraa 2009 i teie mau uiraa faufaa roa. Te manaˈo tumu, oia hoi “Ia pohe . . . te ino ia oe i te maitai.” (Roma 12:21) E hiˈo anaˈe eaha te tiai maira ia tatou.

E vauvau te tiaau mataeinaa i na tumu parau “Faaitoitohia ia pohe te ino i te maitai,” “A ara i te tiaturi rahi roa ia oe iho!,” “Ua fatata te hopea o te ino atoa!,” e “E haapaari anaˈe i to tatou faaroo ia vî hoi te ao ia tatou.” E hohora te tiaau haaati i te mau manaˈo tumu “I teie nei anotau e vai ara noa ˈi!,” niuhia i nia i te Roma 13:11-13, e “Ia ore ia paupau to aho i te mahana e ati ai ra,” niuhia i nia i te Maseli 24:10. E tiai taa ê atoa tatou i te tuhaa a te tiaau haaati “E hiˈopoa anaˈe i te mau hinaaro o te tuhaa haaati.” E riro te tahi atu tuhaa, “E nehenehe anei oe e ‘rave maite i teie taviniraa’—ma te riro ei pionie?,” ei faaitoitoraa mau. E tauturu mai te oreroraa parau tatuhaahia matamua “A patoi i te mau ravea paari a te Diabolo” ia ite e ia patoi i te mau ravea paari a te Diabolo i te pae o te ihi anohaa, faaanaanataeraa, e haapiiraa. E faaite mai te oreroraa parau tatuhaahia “Ia noaa mai te puai no te patoi i te enemi i teie mahana ino” e nafea ia faaohipa hau atu â i te aˈoraa faauruhia o te Ephesia 6:10-18.

E taairaa mau te vai ra i rotopu i te upootiaraa i nia i te ino i to ˈna ra tumu e te pororaa i te poroi o te Basileia. (Apo. 12:17) E ere ïa i te mea maere ia aro Satani ma te tuutuu ore i te mau Ite no Iehova! (Isa. 43:10, 12) Eita roa ˈtu râ te Diabolo e manuïa no te mea ua faaoti papu tatou ‘ia pohe te ino i te maitai.’ A rave i te mau faanahoraa papu no te haafaufaa roa i na rururaa e maha atoa o tera tairururaa haaati.