Te hoê faanahoraa no te feia poro
1. Eaha te faanahoraa apî i ravehia i 1938, e ma teihea fa?
1 Ua rave te faanahonahoraa a Iehova i te hoê faanahoraa apî i 1938. Ua titauhia te mau amuiraa ia tae mai i te mau tairururaa, tei parauhia tairururaa haaati i teie nei. Ma teihea fa? Teie te pahonoraa a te Informateur (Ta tatou taviniraa i te Basileia i teie nei) no Tenuare 1939: “Teie mau tairururaa o ta Iehova faanahonahoraa, no te aratai ïa i te mau ohipa a to ˈna Basileia. E mea faufaa roa te haapiiraa horoahia i reira ia rave maitai te taata taitahi i te ohipa i faauehia.” Ia hiˈohia te maraaraa o te feia poro, e 58 000 noa hoi i 1938 e e 7 000 000 tiahapa i 2009, e mea papu e te tauturu noa nei â teie mau tairururaa haaati i te feia poro ia ‘rave i te ohipa i faauehia.’
2. Eaha te vauvauhia i ta tatou tairururaa haaati o te matahiti taviniraa apî?
2 Te manaˈo tumu: Te tiai ru nei tatou i te mau faaitoitoraa o te tairururaa haaati e haamata mai Tetepa ˈtu. No roto mai te manaˈo tumu “E ere outou i to teie nei ao” i te Ioane 15:19. E fanaˈo papu te mau tavini a te Atua i te aha? I te Mahana maa, e faaroo tatou i te oreroraa parau “E paruru te taviniraa taime taatoa ia tatou—E nafea?” e te vauvauraa e toru tuhaa “Eiaha ia haaviiviihia e . . .” “Te puaa,” “Te vahine faaturi rahi,” e “Te feia hoohoo o te ao nei.” I te Tapati, teie te manaˈo tumu o te oreroraa parau tatuhaahia: “A hinaaro ia Iehova, eiaha i teie nei ao.” Teie atoa te tahi atu: “A tamau noa ei ‘taata ěê e te purutia’” e “A faaitoito! E riro ia outou te re o teie nei ao.”
3. Eaha ta tatou e fanaˈo ia tae atu tatou i te tairururaa haaati?
3 I muri aˈe i te hoê tairururaa haaati i tupu aˈenei, ua papai te hoê tuahine tei topatopa rii i roto i ta ˈna taviniraa e ua turai te porotarama ia ˈna ia hiˈopoa â i to ˈna oraraa e ua faaoti papu oia e “haere e poro e e faaea i te imi i te otoheraa!” Papu roa e e tauturu mai te tairururaa o teie matahiti taviniraa e haere mai nei ia tatou paatoa ia hinaaro ia Iehova, eiaha i teie nei ao. (Ioa. 1, 2:15-17) Ia tae atu iho â oe no te faaroo maitai i te porotarama. E faufaa-rahi-hia oe i teie faanahoraa î i te here ravehia no te feia poro!