Pahonoraa i ta outou mau uiraa

◼ Hou a bapetizohia ˈi, ia aha te taata poro bapetizo-ore-hia e tia ˈi?

O te bapetizoraa te faaotiraa faufaa roa ˈˈe no te hoê taata. Hou râ a fariihia ˈi no te reira, e mea tia ia taa maitai ia ˈna i ta te Atua e titau atu ra. Ua faaau ê na atoa oia i to ˈna oraraa i ta te Atua mau titauraa.

Te faauehia ra te mau Kerisetiano eiaha e faarue i te mau haaputuputuraa. E mea tia ïa ia tae te taata poro bapetizo-ore-hia i te mau putuputuraa atoa a te amuiraa a horoa atoa ˈi i te mau pahonoraa. (Heb. 10:24, 25) Noa ˈtu e e ere te hoê titauraa, e tapao-atoa-hia o ˈna i te Haapiiraa no te taviniraa Kerisetiano.

Ua faaue-atoa-hia te mau Kerisetiano ia poro i te parau apî oaoa a faariro atu ai i te taata ei pǐpǐ. Hou a bapetizohia ˈi, e mea tia ïa ia haere tamau te taata poro bapetizo-ore-hia i roto i te taviniraa. (Mat. 24:14; 28:19, 20) Ehia ïa avaˈe e tia ia ˈna ia poro? Te taime e navai no te faaite i to ˈna hinaaro mau e poro tamau ma te itoito i tera e tera avaˈe. (Sal. 78:37) Eiaha râ te reira ia maoro roa. E nehenehe oia e bapetizo tau avaˈe noa i muri aˈe i to ˈna haamataraa i te poro. Ehia hora pororaa te tia ia ˈna ia rave? Aita e ture oti noa. E mea tia ia haapao te mau matahiapo i te tupuraa o te taata poro taitahi a faaite atu ai i te manaˈo faito noa.—Luka 21:1-4.

Ia farerei te mau matahiapo (aore ra tavini tauturu aita anaˈe i rahi te matahiapo) i tei hinaaro e bapetizo, e mea tia ia haamanaˈo e mea taa ê te tahi taata i te tahi atu. Ia faaohipahia ïa te paari no te ite e te faaîhia ra anei te mau titauraa no te bapetizoraa. E mea tia ia taa i te mau matahiapo i to ˈna hinaaro e riro ei Ite no Iehova e e mea faufaa no ˈna ia apiti i te faanahonahoraa a Iehova e i te taviniraa Kerisetiano. E itehia ïa e ua paari anei oia i te pae varua aore ra mea aravihi no te poro. Mai te peu e aita o ˈna i faaî i te mau titauraa, ma te mǎrû, e faaite atu te mau matahiapo i te mau tumu Bibilia o ta ratou faaotiraa a ara ˈtu ai ia tauturuhia oia.