A pee i te Mesia ma te faaite i te tura
1. E nafea te manaˈo tumu o te tairururaa mataeinaa o teie matahiti e taaihia ˈi i te faaiteraa i te tura?
1 Te faataa ra te Bibilia i te Arii o te ao taatoa nei ra o Iehova mai tei vehîhia i te hanahana. (Sal. 104:1) Ua paraparau e ua ohipa noa Iesu ma te faahanahana i to ˈna Metua e te mau faanahoraa a to ˈna Metua. (Ioa. 17:4) E ravea ta tatou taitahi no te pee ia Iesu e no te haamaitai ia Iehova i te roaraa o ta tatou mau tairururaa mataeinaa i mua nei “A pee i te Mesia!”
2. E nafea to tatou faaineineraa no te tae mai i te rururaa taitahi e faahanahana ˈi ia Iehova?
2 Haamoriraa tura: E nehenehe tatou e faahanahana ia Iehova ma te faanaho e ia tae mai tatou i te oroa amuraa maa pae varua ta ˈna i faaineine no tatou. Ua paraparau anei oe i ta oe paoti ohipa e ua faanaho anei oe i ta oe mau ohipa no te haere mai i na mahana e toru atoa o te tairururaa, tae noa ˈtu i te Mahana pae? Ua opua anei oe i te tae oioi mai no te imi i te parahiraa e te apiti i te himene e te pure haamataraa? Ua feruri anei oe i ta oe maa no te avatea ta oe e nehenehe e amu i te vahi tairururaa e to oe mau taeae? I te haamataraa o te rururaa taitahi, ia ani mǎrû mai te peretiteni ia tatou ia parahi hou te upaupa e haamata ˈi, e mea tia ia tâpû oioi tatou i ta tatou mau aparauraa e ia parahi no te haamataraa o te porotarama.
3. E nafea e tura ˈi ta tatou haamoriraa ia horoa roa tatou i te ara-maite-raa i te porotarama?
3 Ma te horoa roa i te ara-maite-raa, e faahanahana atoa tatou i to tatou Metua i te raˈi. No nia i te hoê tairururaa mataeinaa, ua papai te hoê taata papai vea e e maere te mau taata mataitai i “te haerea maitai o te feia i tae mai, a pee ai ratou i te mea e parauhia ra ma te maniania ore faatura e ma te faaite i to ratou anaanatae i te mau mea pae varua.” Ua faahiti atoa oia i “te numera faahiahia o te mau tamarii . . . , te mea maere, e haerea maitai to te taatoaraa aore ra te haa atoa ra ratou i te imi i te mau irava i roto i te mau Papai Moˈa.” I te roaraa o te mau rururaa, e ere i te taime no te mau parau faufaa ore, no te hapono i te mau SMS, no te amu i te tahi mea, aore ra no te hahaere na roto i te mau vahi haereraa. E mea tia ia parahi te feia apî i pihai iho i to ratou mau metua ia nehenehe to ratou mau metua e tauturu ia ratou ia faufaahia i te porotarama. (Deut. 31:12; Mas. 29:15) E faaite tera mau tutavaraa i to tatou faatura ia vetahi ê e to tatou mauruuru no te maa pae varua faufaa roa e horoahia ra.
4. No te aha e mea tia ˈi ia faaite tatou i te hiˈoraa rapaeau tura i te roaraa o te tairururaa?
4 Hiˈoraa rapaeau tura: Mea rahi tei faaite i to ratou mauruuru no te mau haamanaˈoraa i roto i te oreroraa parau o te tairururaa mataeinaa i te matahiti i mairi aˈenei “A faaite i te tura Kerisetiano i te mau taime atoa,” o tei haamahitihiti hoi e e mea tia ia tutava te mau tavini a te Atua i te faaite i te tura Kerisetiano i roto i to ratou faaahuraa e faaneheneheraa. I teie matahiti, ia haapao maitai â tatou i te reira e tia ˈi. Te faaite ra to tatou hiˈoraa rapaeau i to tatou manaˈo ia Iehova e ta tatou fanaˈoraa taa ê i te riroraa mai ei Ite no ˈna. Ia ahu noa tatou mai te mau taata “e parau ra e te faatura ra [ratou] i te Atua” e tia ˈi.—Tim. 1, 2:9, 10, MN.
5. E nafea tatou e faaite noa ˈi i te hoê hiˈoraa rapaeau tura i te taime faafaaearaa i te oire tairururaa?
5 E mea tia anei ia faaite tatou i te hoê hiˈoraa rapaeau tura i te mau rururaa noa? A haamanaˈo e e ite e rave rahi i ta tatou tareta tairururaa i te oire tei reira te tairururaa. Ia taa ê to tatou hiˈoraa rapaeau i to vera ma e tia ˈi. No reira, i te taime faafaaearaa atoa, ei hiˈoraa, ia haere atu tatou e tamaa i muri aˈe i te rururaa, e mea tia ia ahu tatou mai tei au i te mau tavini o te parahi ra i roto i te oire no te fa e haere mai i te hoê tairururaa Kerisetiano e eiaha e omono mai i teie mau ahu mai te jeans, te mau piripou poto, aore ra te mau piriaro. Auê faaiteraa ta te reira e horoa i te tuhaa oire e! Mea au na Iehova ia haapapu to tatou hiˈoraa rapaeau e e tavini tatou.
6. Eaha te mau faahopearaa maitatai ia faaite i te tura Kerisetiano?
6 Te mau faahopearaa oaoa: Ma te faaite i te tura Kerisetiano i ta tatou mau tairururaa, te faatupu ra ïa tatou i te mau ravea no te horoa i te faaiteraa ma te faanaho ore e no te horoa i te hoê manaˈo maitai i mua i te taata e mataitai maira. I te otiraa te hoê tairururaa, ua tapao te hoê taata toroa e: “Aita matou i ite aˈenei i te mau taata haerea maitai mai teie. Te hinaaro nei te Atua ia riro matou mai ia outou.” Ma te faaite i te tura, te faatura ra tatou e te here ra tatou te tahi i te tahi e te haamaitai ra tatou ia Iehova. (Pet. 1, 2:12) Te faaite ra te reira i to tatou mǎtaˈu paieti e to tatou mauruuru no te fanaˈoraa taa ê i te haapiiraahia e to tatou Metua. (Heb. 12:28) Ia tutava ïa tatou i te faaite i te tura a tiai noa ˈi tatou ma te anaanatae i te tairururaa mataeinaa o teie matahiti “A pee i te Mesia!”
[Tumu parau tarenihia i te api 5]
Haamanaˈoraa no te tairururaa mataeinaa
◼ Hora: E haamata te porotarama i na mahana taitahi i te hora 9:20. E matara te opani i te hora 8. Tau minuti na mua ˈˈe e haamata ˈi te rururaa, e haere te peretiteni e parahi i nia i te tahua a taˈi ai te upaupa o te Basileia. E mea titauhia ia haere tatou paatoa e parahi ia nehenehe te porotarama e haamata ma te tura. E hope te porotarama i te hora 5:05 i te Mahana pae e te Mahana maa, e i te hora 4:10 i te Tapati.
◼ Vairaa pereoo: I te mau vahi tairururaa atoa i reira te vairaa pereoo e tiaihia ˈi, e nehenehe e tomo atu ma te tamoni ore e e faanahohia na mua te mau pereoo e tae matamua mai. O te mau pereoo anaˈe e fanaˈo nei i te parau faatia a te ture no te tapea i te mau vahi faataahia no te mau huma mero te nehenehe e tapea i te vahi faataahia no ratou. I te mea e e mea pinepine e taotiahia te rahiraa pereoo i te vairaa pereoo, te faaitoito atu nei matou mai te peu e e nehenehe eiaha e haere mai i te tairururaa hoê aore ra piti taata hoê pereoo.
◼ Parahiraa: E tapaohia te mau parahiraa no te feia anaˈe e tere na muri ia oe aore ra e noho ra i ǒ oe.
◼ Tamaaraa i te avatea: A hopoi mai i ta oe maa eiaha râ e faarue i te vahi tairururaa i te taime faafaaearaa i te avatea no te haere e hoo mai i te maa. E nehenehe oe e faaohipa i te hoê farii faatoetoeraa maa nainai o te nehenehe e tuuhia i raro aˈe i to oe parahiraa. Eita e fariihia te mau farii faatoetoeraa maa rahi, te mau farii hiˈo e te ava i te vahi tairururaa.
◼ Ô: Te vai ra te mau haamâuˈaraa rahi ia faanahohia te hoê tairururaa mataeinaa. E nehenehe tatou e faaite i to tatou mauruuru ma te horoa i te mau ô no te ohipa na te ao nei i ta tatou Piha a te Basileia aore ra i te tairururaa. E mea tia ia papaihia i nia i te parau moni atoa o te horoahia ˈtu i te tairururaa te iˈoa i muri nei: “Association Les Témoins de Jéhovah.”
◼ Ati e rapaauraa ru: No te hoê rapaauraa ru i te vahi tairururaa, a faaite atu i te hoê taeae e haapao ra i te fariiraa o te faaara oioi i te utuuturaa matamua. I reira, na te hoê pǔpǔ tauturu rapaauraa e hiˈo e mea atâta anei te tupuraa e e rave i tei titauhia. Ia hinaarohia, e niuniu o ˈna i te piha rapaauraa ru.
◼ Feia eita e faaroo maitai: E horoahia ˈtu te mau haamaramaramaraa no te reira i te haamataraa iho â o te rururaa matamua. Te haamanaˈohia ˈtu nei râ e e hurihia te porotarama na roto i te reo aparaa rima Farani i te tairururaa e tupu i te 29 no Tiunu e tae atu i te 1 no Tiurai 2007.
◼ Haruharuraa: Eiaha e patia i te mau mauhaa faaharuharuraa rau atoa i nia i te mau faahaereraa uira aore ra i nia i te faanahoraa o te haapurororaa, e eiaha roa ˈtu to ratou faaohiparaa ia haapeapea ia vetahi ê.
◼ Faanoˈanoˈa: I te mea e e faatupuhia ta tatou mau tairururaa i te hoê vahi e tapirihia te opani, e tapao o te hamani maitai eiaha e pîpî faarahi i te monoˈi e te faanoˈanoˈa hauˈa puai o te nehenehe e haafifi i te feia e maˈi hutiraa aho to ratou aore ra te tahi atu.—Kor. 1, 10:24.
◼ Atuatu i te anaanatae: E faaohipahia te api parau Veuillez suivre l’intérêt (S-43) no te horoa i te mau haamaramaramaraa no nia i te taata atoa o tei anaanatae mau i te pororaa faanaho-ore-hia i te roaraa o te tairururaa. E manaˈo ïa te mau taata poro i te afai mai hoê aore ra e piti o taua api parau ra. Te vai atoa ra i te vahi tairururaa, i te tuhaa haapao buka. E nehenehe te mau api parau i faaîhia e horoahia i taua tuhaa ra aore ra i te papai parau o ta oe amuiraa ia hoˈi atu oe.—A hiˈo i Ta tatou taviniraa i te Basileia no Fepuare 2005, api 6.
◼ Hotera: (1) Eiaha e tarahu i te mau piha hau aˈe i te hinaaro-mau-hia, e a faatura i te rahiraa taata fariihia no te hoê piha. (2) Mai te peu e e mea titauhia ia faaore i ta oe tarahuraa, a faaara oioi atu i te hotera. (3) A rave noa i te hoê turairaa taihaa ua ineine anaˈe oe i te faaohipa i te reira. (4) Eiaha e tunu i te maa i roto i te mau piha mai te peu e eita e faatiahia. (5) Ei Kerisetiano, e vai faito noa tatou ia rave tatou i te maa e pûpûhia na te mau hoani o te amuhia i te hotera (taime taoferaa, taofe aore ra pape paari). (6) A faaite i te hotu a te varua i nia i te mau rave ohipa o te hotera i te mau taime atoa.