Tutavaraa amui na te ao nei no te faaite haere i te tairururaa mataeinaa “A pee i te Mesia!”
E opere â te feia poro i te hoê titau-manihini-raa taa ê
1 I te matahiti i mahemo, mea puai te faahopearaa o te faaite-haere-raa na te ao nei i te tairururaa mataeinaa “Faaoraraa fatata!” i nia i te feia tei anaanatae. A tahi ra te feia o tei farii i te titau-manihini-raa taa ê e o tei haere mai, a ite ai mai te aha te huru te oroa tamaaraa pae varua rahi i rotopu i te mau Ite no Iehova. (Isa. 65:13) Ua au ratou i te amui atu i to tatou fetii taeae Kerisetiano tahoê e te mahanahana. (Sal. 133:1) No te tauturu e rave rahi roa taata ia haere i te tairururaa mataeinaa “A pee i te Mesia!,” e opere â tatou na te ao nei i te hoê titau-manihini-raa taa ê.
2 Faahopearaa o te matahiti i mahemo: Ia au i te mau parau faataa no te mau tuhaa atoa o te ao nei, e faahopearaa maitai roa tei noaa mai maoti te faaite-haere-raa i te tairururaa mataeinaa “Faaoraraa fatata!” I e rave rahi vahi, e parau maitai to tatou. I te hoê oire, ei hiˈoraa, ua pia te hoê vea i te hoê tumu parau e ono anairaa no nia i te opereraa, o te na ô ra: “No te farerei oioi i te mau taata atoa, ua tutava ˈtu â te mau Ite na te oire—ma te haa maoro atu â, ma te haere atea ˈtu â, e ma te paraparau vitiviti atu â.” Ua faaara tera opereraa naho maitai i te anaanatae o te mau vea i te tahi atu oire, o tei apee maite i te tupuraa. E toru aˈe vea o tei faataa maitai i ta tatou ohipa hou te tairururaa. Ua papai te hoê papai vea i te tahi mau tumu parau hohonu e hau atu i te piti api i roto i te vea o te Tapati. Te faataa-maitai-hia ra ta tatou mau tiaturiraa, to tatou fetii taeae, te opereraa i te titau-manihini-raa, e te tairururaa. I to te hoê vahine poro faaiteraa i te titau-manihini-raa i te hoê uputa, ua na ô atu te fatu fare e: “Ua ite au. No taio noa ˈtura vau i te reira i roto i te vea!” Ua parau te tahi atu fatu fare e: “No taio noa ˈtura vau i tei papaihia no nia ia outou, e to ǒ nei outou! Na ˈu anei tena titau-manihini-raa?” E ua na ô atura e, “E ohipa maitai roa ta te mau Ite no Iehova e rave nei.”
3 Mea rahi te taata tei anaanatae tei haere atu i te tairururaa e ta ratou titau-manihini-raa i roto i te rima. Na te mau oire atea mai vetahi i te tereraa mai no te haere i te mau rururaa. Maoti ta tatou mau tutavaraa itoito rahi no te titau manihini ia vetahi ê, mea rahi tei ruru mai, ei hiˈoraa, te feia i tae i te tairururaa i te hoê fenua, e 27 % hau atu ïa i to na mua ˈtu matahiti.
4 Tuhaa fenua e poro: E nehenehe oe e haamata i te opere i te titau-manihini-raa e toru hebedoma hou te haamataraa o ta oe tairururaa. A tutava roa i te poro i te tuhaa fenua taatoa a te amuiraa. I roto i te mau amuiraa e mea rahi te tuhaa fenua, e nehenehe te feia poro e vaiiho omoe i te titau-manihini-raa i te mau fare aita e taata i te hebedoma hopea hou te tairururaa. E faaitoito te mau amuiraa i te opere i te mau titau-manihini-raa atoa e ia poro i te tuhaa fenua e rave rahi e nehenehe. E nehenehe te mau pionie e opere i te mau titau-manihini-raa hau.
5 Eaha te parau: E nehenehe oe e parau mai teie: “Te tutava nei matou na te ao nei i te opere i teie titau-manihini-raa i te hoê ohipa faufaa e tupu i mua nei. Teie ta oe. E ite oe i te tahi atu â mau haamaramaramaraa i nia i teie titau-manihini-raa.” A haapoto noa, e rahi atu â ïa te opereraa. Parau mau, mai te peu e e uiraa ta te fatu fare, a faataa i te taime no te pahono atu. Ia anaanatae mai te taata, a tapao i te reira e a farerei oioi faahou ia ˈna.
6 Mea faufaa roa ia tutava tatou i te pee i te Mesia! (Ioa. 3:36) Maoti ta tatou tairururaa mataeinaa i mua nei e nehenehe ai te taata atoa e tae mai e na reira. Mea papu e e nehenehe tatou e tiai e e faaiteraa rahi roa te horoahia â maoti teie tutavaraa amui no te faaite haere i te tairururaa mataeinaa “A pee i te Mesia!” No reira, a faaitoito rahi i te titau manihini e rave rahi roa taata ia haere mai. Ia haamaitai rahi Iehova i ta oe mau tutavaraa no te apiti i teie opereraa tahoê na te ao nei.