A hoˈi e farerei i te feia atoa e faaite ra i te tahi anaanatae
1 E rave rahi o tatou to roto i te parau mau i teie mahana no te mea ua tapao te tahi i to tatou farii maitai i te poroi o te Basileia e ua hoˈi faahou e farerei ma te faaoromai—peneiaˈe e rave rahi taime—no te atuatu i te anaanatae. E mea tia ia hoˈi maite tatou e farerei i te feia atoa e faaite ra i te tahi anaanatae. Inaha, e ohipa atoa na tatou te raveraa i te mau farerei-faahou-raa no te ‘faariro i te taata atoa ei pǐpǐ.’—Mat. 28:19, 20.
2 Te haroaroaraa i te anaanatae: Noa ˈtu e eita te hoê taata e farii i te papai, e nehenehe to ˈna hohoˈa mata, toparaa reo, aore ra te mau taˈo i maitihia e faaite i te tahi anaanatae no te poroi o te Basileia. I nia i taua niu ra e nehenehe paha tatou e rave i te hoê farerei-faahou-raa. Ua hoˈi te hoê taeae e farerei i te hoê taata e pae hebedoma i te maoro ma te ore e vaiiho i te papai. I te onoraa o te farereiraa, ua farii te taata i te papai, e ua haamatahia ihora te hoê haapiiraa bibilia.
3 Ia ite oe i te anaanatae, a hoˈi oioi, peneiaˈe tau mahana i muri aˈe. Eiaha e horoa te ravea i “te mea ino” ia rave ê atu i tei ueuehia i roto i te aau o te taata. (Mat. 13:19) Mai te peu e ua faanahohia e e hoˈi faahou oe i te hoê taime taa maitai, a tapea i ta oe parau.—Mat. 5:37.
4 I te aroâ ohipa: Te tutava ra anei oe i te atuatu i te anaanatae ta oe e ite ra i roto i te aroâ ohipa aore ra ia poro oe ma te faanaho-ore-hia? I te pae hopea o ta oe tauaparauraa e nehenehe oe e parau e: “Ua au vau i ta tâua tauaparauraa. Ihea vau e nehenehe ai e farerei ia oe no te paraparau faahou?” Mai te peu e e tano, e nehenehe paha te feia poro e maiti i te horoa i ta ratou numera niuniu i te taata anaanatae aore ra e ani atu i ta ˈna numera niuniu. Ia ite te mau taata ia oe ia poro tamau na te aroâ ohipa i te hoê â vahi, e hinaaro paha ratou e horoa i ta ratou numera niuniu aore ra to ratou vahi faaearaa. Noa ˈtu e eita ratou e hinaaro e parau mai e nafea ia farerei ia ratou, e nehenehe noa oe e atuatu i to ratou anaanatae ia farerei oe ia ratou na te aroâ i te tahi atu taime.
5 Ia mataitai tatou i te mau tiare ta tatou i pîpî i te pape e i faahotu ia ruperupe, e faaoaoa te reira ia tatou. Oia atoa, e nehenehe tatou e oaoa roa ma te rave i te mau farerei-faahou-raa e ma te tauturu i te mau taata ia haere i mua i te pae varua. (Kor. 1, 3:6) A faariro ei fa na oe te hoˈi-faahou-raa e farerei i te mau taata atoa e faaite ra i te tahi anaanatae.