Ia hoˈi faahou mai outou e tia ˈi!
1 “Auê ïa tauaparauraa anaanatae e! E tia mau ia ˈu ia hoˈi faahou mai e farerei i taua taata ra.” Ua manaˈo aˈena anei outou i te reira e i muri iho ua moehia ia outou te vahi faaearaa o taua taata ra? Mai te peu e tera iho â, te taa ra ïa ia outou e te ravea hoê no ta outou hoˈi-faahou-raa e farerei, o te tapao-maite-raa ïa.
2 A tapao taatoa: A haamanaˈo noa ˈi outou i te hoê tauaparauraa e te hoê taata i anaanatae maitai mai, a rave i te taime no te tapao i te mau haamaramaramaraa faufaa atoa. A papai i te iˈoa o te taata e te mea e nehenehe ai outou e ite ia ˈna. A tapao i to ˈna vahi faaearaa, eiaha râ e tamata i te manaˈo noa—a hiˈo maitai ia papu ia outou e mea tano ta outou e papai ra. A tapao i te tumu parau ta outou i paraparau, te mau irava ta outou i taio e te papai ta outou i horoa ˈtu.
3 Mai te peu e ua faahiti outou i te hoê uiraa, a papai i te reira. Ua ite anei outou i te tahi mea no nia i te taata, to ˈna utuafare aore ra no nia i ta ˈna haapaoraa? A tapao ïa i te reira. I te hoˈi-faahou-raa i mua nei, e faaite ïa outou i to outou anaanatae ma te faahiti i te reira. I te pae hopea, a tapao i te mahana e te hora o ta outou farereiraa matamua, oia atoa te taio mahana tei faanahohia no te hoˈi-faahou-raa e farerei. Na roto i te raveraa i te mau tapaopaoraa taa maitai, eita ïa outou e haamoe i ta outou tǎpǔ e hoˈi faahou mai.—Tim. 1, 1:12.
4 Ua oti anaˈe ta outou mau tapaopaoraa, a tuu atu i te reira e te toea o ta outou mau tauihaa pororaa—pute, Bibilia, Comment raisonner e te mau papai—ia nehenehe noa outou e rave mai. Mea au aˈe ia tapao i te mau taata aita i te fare i nia i te tahi mau api taa ê i ta outou e faaohipa ra no te tapao i ta outou mau hoˈi-faahou-raa. Hau atu â râ i te tapaopaoraa i te mau iˈoa o te feia i farereihia, te mea faufaa, o te hoˈi-faahou-raa mai ïa e farerei ia ratou.
5 A manaˈonaˈo i te taata: Ia faaineine outou i ta outou mau hoˈi-faahou-raa e farerei, a hiˈo faahou i ta outou mau tapaopaoraa. Ia au i te huru o te taata, a feruri i te ravea maitai aˈe no te aparau faahou e no te faaara i to ˈna anaanatae no te hoê haapiiraa Bibilia. Ia na reira outou, e rahi atu â to outou aravihi ei tavini no te parau apî maitai, e oia atoa to outou oaoa.—Mas. 21:5a.
6 No reira, ia farerei outou i te hoê tariˈa o te faaroo maite mai i mua nei, eiaha outou e manaˈo e e nehenehe outou e haamanaˈo ohie ia ˈna. A tapao râ, a hiˈo faahou i te reira, a manaˈonaˈo noa i te taata, e ia hoˈi faahou mai outou e tia ˈi!