Eiaha e faarue i to oe here matamua
1 Ua aˈo o Iesu i faahanahanahia i te amuiraa o te senekele matamua no Ephesia: “Te vai nei . . . taˈu pariraa ia oe, i te mea ua [faarue] ïa oe to [here] matamua ra.” (Apo. 2:4; MN) E au ra e mea rahi o tei faarue i to ratou here matamua ia Iehova. A haapii ai tatou i te parau mau, ua faatupu tatou i te hoê here puai i te Atua e te taata-tupu, e ua turai te reira ia tatou ia faaite i to tatou tiaturiraa ite-apî-hia ma te itoito rahi. Eaha te tapea ia tatou eiaha ia faarue i to tatou here matamua e ia ere mârû i te itoito rahi i roto i te taviniraa?
2 Te haapiiraa ia ˈna iho e te apitiraa i te putuputuraa: Na te aha i turai ia tatou ia faatupu i te here i te Atua e te taata-tupu ia tatou i haapii i te parau mau i te omuaraa? E ere anei na te mau mea atoa ta tatou i ite no nia ia Iehova na roto i ta tatou haapiiraa i te mau Papai? (Ioa. 1, 4:16, 19) No reira, ‘ia tupu maite â e ia rahi atu â’ to tatou here, e mea tia ia tamau tatou i te titau i te ite mau, ma te heru i roto i ‘te mau mea hohonu a te Atua ra.’—Phil. 1:9-11; Kor. 1, 2:10.
3 E nehenehe te tapearaa i te hoê tereraa maitai matauhia o ta ˈna iho haapiiraa e riro ei mea fifi mau i teie anotau hopea o tei î i te ahoaho e te faaanaanataeraa e rave rahi. (Tim. 2, 3:1) E mea tia ia faataa tatou i te taime i roto i ta tatou porotarama no te rave i te maa pae varua. E mea faufaa roa atoa te apiti-tamau-raa i te mau putuputuraa a te amuiraa, ‘a hiˈo ai’ iho â râ tatou “i taua mahana ra i te fatataraa mai.”—Heb. 10:24, 25.
4 Te taviniraa: E tauturu te apitiraa ma te itoito rahi i te taviniraa ia tatou ia tapea i to tatou here matamua i te Atua. A poro ai tatou i te parau apî maitai, e haamanaˈo tatou i te parau fafau î i te here a Iehova, e e tauturu te reira ia tatou ia anaana noa to tatou tiaturiraa e ia vai oraora to tatou here. E titau te haapiiraa i te pue parau mau bibilia ia rave tatou i te maimiraa ia taa maitai ia tatou iho i te reira e e haapuai te reira i to tatou faaroo.—Tim. 1, 4:15, 16.
5 E au ia Iehova te mau mea atoa, e to tatou atoa here. (Apo. 4:11) Eiaha e vaiiho i to oe here ia iti mai. A tapea i to oe here matamua ma te haapii maite ia oe iho i te Bibilia, ma te apiti tamau i te putuputuraa, e ma te faaite ma te itoito rahi i te tahi atu i te mea faufaa roa ˈˈe no oe.—Roma 10:10.