Pororaa i tera fare i tera fare
1. Eaha te uiraa e matara mai no nia i te pororaa i tera fare i tera fare, e no te aha?
1 “E farii te feia atoa o tei haaparare i te Parau mau ma te ravea rau e o te pororaa i tera fare i tera fare e te L’AURORE DU MILLÉNIUM te ravea manuïa roa ˈˈe no te poro i te Parau mau i teie tau.” Te haamahitihiti ra teie parau no roto mai i Te Pare Tiairaa (Phare de la Tour de Sion o te 1 no Tiurai 1893 [Beretane]) i te faufaaraa ia poro i tera fare i tera fare. Ua hiˈo te mau taata e ati aˈe te fenua i te reira mai te huru taa ê o te mau Ite no Iehova. E ravea manuïa noa anei tera, i te mea e mea fifi noa ˈtu â ia farerei i te taata i te fare i te tahi mau fenua?
2. Eaha te niu bibilia no te pororaa i tera fare i tera fare?
2 No roto i te Bibilia e mea faufaa: Ua niuhia i nia i te Bibilia te pororaa i tera fare i tera fare. Ua haapii Iesu i na pǐpǐ e 70 ia haere tatoopiti i te mau fare o te mau taata. (Luka 10:5-7) I muri rii aˈe i te poheraa o Iesu, te parau ra te Bibilia no nia i ta ˈna mau pǐpǐ: “Aore e mahana tuua ia ratou i te aˈo, e te haapii atu i te taata [i te parau apî maitai], . . . i roto i te hiero, e i tera fare, i tera fare.” (Ohi. 5:42; MN) Ua haapii atoa te aposetolo Paulo ma te itoito rahi i tera fare i tera fare.—Ohi. 20:20.
3. Eaha te tahi mau vahi maitatai o te pororaa i tera fare i tera fare?
3 Te tamau ra te pororaa i tera fare i tera fare i te riro ei ravea faufaa no te haaparare i te parau apî maitai i teie mahana. E nehenehe ïa tatou e “imi” i te feia e au ma te nahonaho. (Mat. 10:11, MN) E pinepine e mea au roa te mau taata i te fare. Ma te paraparau roa ˈtu ia ratou—ma te faaroo i to ratou reo, ma te ite i te huru o to ratou hohoˈa mata, e ma te hiˈopoa i te mau mea e haaati ra ia ratou—e nehenehe ïa tatou e taa i ta ratou e anaanatae e e tapitapi. E pinepine e horoa mai te reira i te ravea maitai roa ˈˈe no te tauaparau atu â.
4. E nafea te pororaa i tera fare i tera fare e nehenehe ai e hoona ˈtu â?
4 A rave i te mau faatitiaifaroraa: Ua ineine te aposetolo Paulo i te rave i te mau faatitiaifaroraa “no te evanelia.” (Kor. 1, 9:23) Peneiaˈe e nehenehe tatou e faatano i ta tatou porotarama no te poro tei te fare anaˈe te taata e rave rahi roa, i te pae ahiahi anei, i te mau hopea hebedoma anei, aore ra i te mau mahana faafaaearaa anei. A tapao i te mau fare aita e taata, e a tamata faahou i te tahi atu mahana o te hebedoma aore ra i te tahi atu taime o te mahana.
5. E nafea te feia maˈimaˈi e nehenehe ai e faaôhia i roto i te ohipa pororaa i tera fare i tera fare?
5 E nehenehe atoa te feia maˈimaˈi e poro i tera fare i tera fare. E nehenehe paha tatou e faanaho i te rave na muri ia tatou i te mau fare e mea ohie ia haere atu, a nehenehe atu ai ratou e ohipa ma te au. Ua nehenehe te hoê tuahine mea paupau te aho e poro i te hoê fare i te mau afa hora atoa. Tera râ, ua oaoa e ua mauruuru o ˈna i to ˈna faaôraahia i roto i te pǔpǔ!
6. No te aha e mea tia ˈi ia faariro i te pororaa i tera fare i tera fare ei tuhaa tamau o ta tatou taviniraa?
6 Te ite-tamau-hia nei te taata e rave rahi e au i te mamoe i roto i te ohipa pororaa i tera fare i tera fare. Ua patoto te hoê taata poro i te hoê opani e ua pahonohia ˈtu e: “A tomo mai. Ua ite au o vai oe. Ua pure au i te Atua e tono mai i te hoê taata no te tauturu ia ˈu, e i muri iho ua faaroo vau i te patotoraahia te opani. Ua faaroo mai te Atua ia ˈu e ua tono mai ia oe.” Te haapapu ra te mau faahopearaa e te haamaitai ra Iehova i teie ravea o te pororaa. (Mat. 11:19) A faaoti i te faariro i te pororaa i tera fare i tera fare ei tuhaa tamau o ta oe taviniraa.