Te hoê video e tano ia feruri-maitai-hia
“E haaferuri mau teie video ia oe!”
“Ua puta oioi to ˈu aau!”
“Ua putapû roa vau!”
1 Tera anei to oe huru i muri aˈe i te mataitai-matamua-raa oe i te video Les jeunes s’interrogent . . . Comment se faire de vrais amis? Tau matahiti aˈenei, ua farerei te hoê taeae apî i te hoê taime fifi i roto i to ˈna oraraa, te reira no te mau hoa ta ˈna i maiti. Ua turai ratou ia ˈna ia ore e anaanatae faahou i te parau mau e i to ˈna taairaa e o Iehova. E ua matara mai te video Vrais amis. Ua papai o ˈna: “A mataitai tamau ai au i te video, ua tahe to ˈu roimata. Ua haamauruuru vau ia Iehova no te tauturu i te taime au.” Ua turai te video ia ˈna ia taui roa i to ˈna oraraa e ia faahoa i te hoa mau. Ua parau faahou oia e: “Mea papu maitai e ua ite maite outou i ta te mau taurearea e faaruru nei.” E te mau metua e te mau taurearea e, no te aha e ore ai e mataitai faahou i te video i ta outou haapiiraa utuafare i mua? A tapea i te video i muri aˈe i te mau tuhaa atoa, e a tauaparau amui ma te huna ore e ma te aau tae i te mau uiraa i roto i te mau paratarafa i muri nei.
2 Omuaraa: Eaha te hoê hoa mau?—Mas. 18:24.
3 Te mau otia o te auhoaraa: E nafea oe e aro ai i te huru aau o te moemoe? (Phil. 2:4) No te aha e mea tia ˈi ia ineine oe i te haamaitai i to oe huru, e o vai te nehenehe e tauturu ia oe no te na reira? Eaha ta oe mau ravea maitatai ia noaa rahi atu â te hoa, e ihea ratou e itehia ˈi?—Kor. 2, 6:13.
4 Te auhoaraa e te Atua: E nafea oe e faatupu ai i te taairaa piri atu â e o Iehova, e no te aha e hoona ˈi te tutavaraa ia na reira? (Sal. 34:8) O vai te nehenehe e haapaari i to oe auhoaraa e te Atua?
5 Te auhoaraa iino: O vai ma te amuimuiraa iino? (Kor. 1, 15:33) E nafea te auhoaraa iino e faaino ai i te pae varua? Eaha ta te Bibilia e faatia ra no nia ia Dina e haapii atu ia oe?—Gen. 34:1, 2, 7, 19.
6 Te hoê darama no teie tau: Mea nafea te moemoe i te ohiparaa i nia ia Tara? Mea nafea to ˈna imiraa i te otoheraa no ta ˈna amuimuiraa e te mau hoa o teie nei ao? Ua farerei o ˈna i teihea mau tupuraa atâta? No te aha to ˈna na metua i ore ai i ite i to ˈna tupuraa atâta, ma teihea râ huru to raua tautururaa ia ˈna ia itoito faahou i te pae varua? Mea nafea to te hoê tuahine pionie faaiteraa e e hoa mau o ˈna no Tara? No te aha e mea tia ˈi ia haapao te mau Kerisetiano i te Maseli 13:20 e te Ieremia 17:9? Eaha te haapiiraa faufaa ta Tara i haapii mai?
7 Opaniraa: Eaha te mau haapiiraa ta oe i huti mai i roto i tera video? E nafea oe e nehenehe ai e faaohipa i te reira no te tauturu i te tahi atu?—Sal. 71:17.