Ua horoa ratou i te hoê hiˈoraa o te haapao maitai

¹ I 1937, ua haamata te hoê huru apî o te taviniraa ma te taime taatoa—te taviniraa pionie taa ê. Ua farii te mau tane e te mau vahine aravihi i roto i te taviniraa Kerisetiano ma te aau tae, i te mau hopoia no te tavini i te mau vahi atoa ta te faanahonahoraa i faaue atu. I teie nei, tau ahuru matahiti i muri aˈe, te tamau nei te mau pionie taa ê i te horoa i te hoê hiˈoraa o te haapao maitai e mea faufaa ia pee.—Heb. 6:12.

² Ua rave ratou i te aratairaa: Mai te omuaraa mai â, na te mau pionie taa ê i haamata i te ohipa pororaa ma te faaohipa i te matini faataˈi pehe afaifai i te uputa o te fatu fare. Ua faaohipa atoa ratou i te mau faaharuharuraa ei niu o ta ratou mau tauaparauraa bibilia i roto i te mau farerei-faahou-raa. Ua ravehia te reira i roto i te mau oire rarahi i reira te haamau-aˈena-raahia te mau amuiraa. I muri aˈe, ua tonohia te mau pionie taa ê i te mau vahi e hinaaro-rahi-hia ˈi te feia poro i te Basileia. Ua tamau ratou i te farerei i te feia o tei anaanatae i te poroi o te Basileia e ua faatere i te mau haapiiraa bibilia. Ei faahopearaa o ta ratou mau tutavaraa aau tae, ua haamauhia te mau hanere amuiraa apî. Ua faatupu ta ratou pororaa evanelia ma te rohirohi ore i te aanoraa rahi roa o te faanahonahoraa ta tatou e ite nei i teie mahana. (Isa. 60:22) E tuhaa faufaa noâ ta te mau pionie taa ê i roto i te haaparareraa i te parau apî maitai “i te taata atoa i raro aˈe i teie nei raˈi.”—Kol. 1:23.

³ E mea faufaa ia pee: Tau ahuru matahiti i te maoro to te tahi mau pionie taa ê taviniraa ma te taime taatoa. I te roaraa o te mau matahiti, ua haamaitaihia te faaroo o tera mau tane e vahine i roto i te mau huru tupuraa rau. (Pet. 1, 1:6, 7) Ua haapae ratou ma te aau tae i te oraraa fanaˈo i te pae materia no te tavini i te mau vahi te vai ra te hinaaro taa ê. Mea ruhiruhia e mea maˈi vetahi i teie nei, aore ra te faaruru nei ratou i te tahi atu mau tupuraa fifi. (Kor. 2, 4:16, 17) Tera râ, “e hotu â” ratou “e tae noa ˈtu i te paariraa ra.” (Sal. 92:14) Te tiaturi nei ratou ia Iehova e te ite nei i ta ˈna haamaitairaa.—Sal. 34:8; Mas. 10:22.

⁴ E tano roa ia haapopou tatou ma te mahanahana i te mau pionie taa ê. Mai te peu e te vai ra te mau pionie taa ê i roto i ta oe amuiraa, a rave i te taime no te haere na muri ia ratou e no te fanaˈo i to ratou aravihi. A faaite i te mauruuru no ta ratou taviniraa ei taata poro haapao maitai i te Basileia. E puaihia oe maoti to ratou vai-aueue-ore-raa. E nehenehe atoa te mau taata o te pee ra i to ratou faaroo e fanaˈo i te farii maitai e te haamaitairaa a Iehova no te mea “te feia . . . e rave i te parau mau ra te au ra oia ia ratou.”—Mas. 12:22.