Te hoê tauturu e mea ohie ia itehia
1. E nafea te tahi e nehenehe ai e paruparu i te pae varua?
1 Ua ite Anna, te hoê tuahine e ere te tane i te Ite e e ohipa titau-rahi-hia te taime ta ˈna, e e mea fifi ia tae tamau i te mau putuputuraa Kerisetiano, ia apiti i te pororaa, e ia haapii i te Parau a te Atua. Noa ˈtu e ua here noa oia ia Iehova, aita râ oia e poro faahou ra. Auaa, ua fanaˈo oia i te tauturu pae varua no ǒ mai i te mau matahiapo e tapitapi ra.
2. E nafea te mau Kerisetiano atoa e nehenehe ai e riro ei tauturu e mea ohie ia itehia?
2 Te faaite ra te fariiraa i te tauturu pae varua pûpûhia na roto i te amuiraa Kerisetiano i te tiaturi ia Iehova iho. Ei peeraa i to Iesu Mesia haapao maitai î i te here, e imi te mau matahiapo o te amuiraa i te mau taime maitatai no te pûpû i te faaitoitoraa e te tauturu au no te feia o te fifi ra i te pae varua. (Tes. 1, 5:14) E pinepine, e nehenehe te hoê parau maitai o te faaitoito no roto mai i te mau Papai tamahanahana e navai noa. E tapitapiraa na te mau Kerisetiano atoa, eiaha na te mau matahiapo anaˈe, te raveraa i te mau taahiraa matamua no te turu i te feia i roto i te hoê tupuraa paruparu poto. Ma te feaa ore, ua ite tatou taitahi i te mana o ‘te hoê parau feruri-maitai-hia ia parauhia i te taime mau ra.’—Mas. 25:11; Isa. 35:3, 4.
3, 4. Eaha te titauhia no te tauturu ia vetahi ê, e e nafea tatou e nehenehe ai e na reira?
3 A rave i te taahiraa matamua: No te faaite i te anaanatae î i te here i te feia o te hinaaro ra i te tauturu, e titauhia ia rave tatou i te taahiraa matamua, ia faaite i te aroha, e ia tapea maite. I to Ionatana iteraa i te tupuraa peapea o Davida, “ua tia aˈera” o ˈna, “haere atura ia Davida ra i roto i te uru raau, e ua haamahanahana ˈtura ia ˈna.” (Sam. 1, 23:15, 16) A tauturu ia vetahi ê ma te mǎrû. E horoa te mau parau i parauhia ma te haapeapea mau i te mau faahopearaa maitatai roa ˈˈe. Hau atu â, ua faahohoˈa o Iesu ma te maramarama e e titauhia te tutava-maite-raa e te faaoti-papu-raa ia roaa faahou mai te taeae aore ra tuahine i te pae varua. (Luka 15:4) E turai te hinaaro-mau-raa e turu i te tahi atu taata ia tatou ia tamau i te horoa i te tauturu noa ˈtu e aita o ˈna e haere oioi ra i mua.
4 E mea faaitoito mau ia rave tatou i te taahiraa matamua no te titau manihini ia vetahi ê, mai te feia o ta tatou haapiiraa buka, ia haere e o tatou i roto i te taviniraa! A tauturu ai tatou i te hoê hoa tavini o Iehova ia paraparau i roto i te pororaa, e nehenehe tatou e faaohipa i te taime maitatai no te faaitoito ia ˈna ia ohipa atu â i roto i te taviniraa i te Atua. E mea faaitoito iho â râ tera mau taime oaoa i faaohipa-amui-hia i roto i te taviniraa ia Iehova no te feia e itea mai ia ratou to ratou aifaito pae varua.
5. I roto i te tahi mau tupuraa, eaha te tauturu ta te mau matahiapo e nehenehe e pûpû atu?
5 Te hoê faanahoraa î i te here: E hinaaro paha te feia aita e poro ra aore ra e apiti ra i te amuiraa no te tahi taime i te tauturu hau no te haapuai i to ratou faaroo. E hinaaro-noa-hia paha te tahi haapiiraa bibilia ia ˈna iho i nia i te hoê papai mai te buka Adorez le seul vrai Dieu, E haafatata ˈtu ia Iehova aore ra Eaha ta te Bibilia e haapii mau ra? I te mea e ua bapetizo-aˈena-hia tera taata, e pinepine eita e titauhia ia tamau te haapiiraa no te hoê taime roa. E mea tia ia hiˈopoa maite te tomite tiaauraa a te amuiraa o vai te nehenehe e fanaˈo i teie faanahoraa.—A hiˈo i te mau tumu parau tarenihia Pahonoraa i ta outou mau uiraa i roto i Ta tatou taviniraa i te Basileia no Novema 1998 e no Novema 2000.
6. Mea nafea te hoê tuahine i te itoito-faahou-raa i te pae varua?
6 Ua farii o Anna, o tei faahitihia na mua ˈtu, ma te mauruuru i te pûpûraa a te mau matahiapo e ia faatere te hoê tuahine paari i te pae varua i ta ˈna haapiiraa bibilia. E maha noa haapiiraa i faaterehia no te tauturu ia ˈna ia haafatata faahou atu ia Iehova. Ua apiti faahou o ˈna i te mau putuputuraa a te amuiraa e ua hinaaro faahou o ˈna e arue ia Iehova i mua i te taata. Ua tauturu atoa te tuahine paari ia ˈna i roto i te taviniraa ma te afai ia ˈna i roto i te tahi atu haapiiraa bibilia e tae roa i te taime ua itoitohia oia no te poro i tera fare i tera fare. E rima tauturu noa ta ˈna i hinaaro no te faaitoito faahou ia ˈna.
7. Eaha te mau maitai e noaa mai i te faaitoitoraa ia vetahi ê i te pae varua?
7 E haamaitai te haapuairaa i te feia o te hinaaro ra i te tauturu i te taatoaraa. E oaoa te taata o tei tauturuhia i te haafatata ˈtu ia Iehova e i te rave i te mau ohipa i taaihia i ta ˈNa faanahonahoraa. E oaoa te mau matahiapo ia ite i tera mau haereraa i mua i te pae varua. (Luka 15:5, 6) E tahoê-amui-hia te mau melo o te amuiraa ia tapitapi ratou te tahi i te tahi ma te here. (Kol. 3:12-14) E tumu maitai anaˈe ta tatou e pee ai ia Iehova, te hoê tauturu e mea ohie ia itehia!—Eph. 5:1.