Pahonoraa i ta outou mau uiraa

◼ Nafea tatou e nehenehe ai e tauturu i te hoê taata aita e poro faahou ra mea maoro i teie nei ia ineine faahou oia no te riro ei taata poro i te parau apî maitai?

E oaoa tatou ia faaite te hoê o to tatou mau hoa aita i ohipa faahou i to ˈna hinaaro mau e tavini ia Iehova. (Luka 15:4-6) Peneiaˈe, ua toaruaru oia no te patoiraa aore ra te mau fifi o te oraraa, aita ˈtura ïa to ˈna e taime faahou no te haapii tataitahi i te Bibilia, no te haere i te mau putuputuraa e i te pororaa. Eaha te ravea maitai roa ˈˈe no te tauturu ia ˈna ia haere oia i mua i te pae varua?

Mea titauhia ia rave tatou paatoa i te tahi mea no te haapapu ia ˈna i to tatou here Kerisetiano mau. E hiˈo te mau matahiapo ma te haamarirau ore eaha to ˈna mau hinaaro pae varua. (Iak. 5:14, 15) Mai te peu e e ere i te mea maoro to taua taata oreraa e ohipa faahou, e navai paha ïa te tauturu a te hoê taata poro aravihi ia poro faahou oia. Mai te peu râ e mea maoro to ˈna oreraa e apiti faahou i te amuiraa, e hinaarohia paha ïa te hoê tauturu rahi atu â. No te patu i to ˈna faaroo e to ˈna mauruuru, mea maitai aˈe paha e faatere faahou i te hoê haapiiraa e o ˈna i nia i te hoê buka e tano. No reira, e ani te tiaau no te taviniraa i te hoê taata poro aravihi e faatere i te haapiiraa. (Heb. 5:12-14; hiˈo Pahonoraa i ta outou mau uiraa i roto i Te taviniraa o te Basileia no Novema 1998.) Mai te peu e ua matau outou i te hoê taata e hinaaro i taua tauturu ra, a faaara ˈtu i te tiaau no te taviniraa o ta outou amuiraa.

Hou a titau ai i te hoê taata mea maoro to ˈna oreraa e ohipa ia poro faahou, mea titauhia ia farerei e piti matahiapo ia ˈna no te hiˈo e te faaî ra anei o ˈna i te mau titauraa no te riro ei taata poro i te Basileia. E rave raua mai ta raua e rave e te mau taata apî o te tutava ra i te haere i mua no te riro ei feia poro i te parau apî maitai. (Hiˈo te Tour de Garde o te 15 no Novema 1988, api 17.) Mea titauhia ia faaite taua Kerisetiano aita e ohipa faahou ra i te hinaaro mau e faaite i te parau apî maitai ia vetahi ê, ia faaî i te mau titauraa e vai ra i te api 99 o te buka Notre ministère e e haere tamau i te mau putuputuraa a te amuiraa.

E tauturu rahi te mau peu pae varua maitatai i te taata e hinaaro ra e ohipa faahou ia haapaari e ia tapea noa i to ˈna mau taairaa faufaa e o Iehova, e ia tamau i te haere na te eˈa e tae atu ai i te ora. (Mat. 7:14; Heb. 10:23-25) Ia “faaitoito hua” e ia faahotu taua taata ra i te mau huru maitatai Kerisetiano o te vai maoro, eita ïa oia e riro faahou ei pǐpǐ Kerisetiano ‘toaruaru aore ra hotu ore.’—Pet. 2, 1:5-8.