A oaoa i ta tatou haapiiraa Eaha ta te Bibilia e haapii mau ra?
1 Te tuhaa anaanatae o te tairururaa mataeinaa “Te auraroraa i te Atua,” o te matararaa mai ïa te buka Eaha ta te Bibilia e haapii mau ra? Fatata roa tatou i te faaohipa pinepine i te reira i roto i ta tatou taviniraa, ia faatere iho â râ tatou i te mau haapiiraa bibilia i te fare. No reira, e mea titauhia ia matau maitai tatou i teie buka apî. E nehenehe no te mea e haapii tatou i te reira i roto i te mau haapiiraa buka a te amuiraa mai te hebedoma o te 17 no Eperera 2006 atu.
2 E aratai te tiaau no te haapiiraa buka a te amuiraa i te ara-maite-raa i nia i te mau uiraa i te omuaraa o te pene taitahi. E e faaterehia te haapiiraa ma te faaohipa i te mau uiraa i raro o te api. E taiohia e e tauaparauhia te mau irava tumu, e e tauturu te tumu parau tarenihia “Ta te Bibilia e haapii ra” i te hopea o te pene taitahi ia hiˈo faahou i te haapiiraa no te mea te vai ra i roto i te tumu parau tarenihia te mau pahonoraa a te Bibilia i te mau uiraa faaomuaraa o te pene. E oaoa outou i te tatararaa no te mea te faataa ra teie buka i te mau tumu parau ma te maramarama, te ohie, e te anaanatae.
3 Te horoa ra te tuhaa hau o teie buka i te mau faataaraa rii no nia i te tumu parau e rave rau. E nehenehe tatou e faaohipa i teie buka ia hinaaro te mau piahi Bibilia i te haamaramaramaraa hau no nia i te tahi tumu parau. E tauaparauhia te hoê pae o te tuhaa hau i te tahi taime i te roaraa o te haapiiraa buka a te amuiraa. Na te taeae taio e taio i te mau tuhaa hau atoa no nia i te hoê tumu parau, e e nehenehe te mau tumu parau roa e tatuhaahia. Aita te mau uiraa haapiiraa i roto i te tuhaa hau. E nehenehe râ te tiaau e titau i te feia i tae mai ia faataa ma te pahono i te mau uiraa o te haamahitihiti ra i te mau tuhaa faufaa.
4 E faahaere vitiviti te mau haapiiraa o te buka Bibilia haapii i mua i roto i te mau haapiiraa buka a te amuiraa. Eiaha tatou e manaˈo e e haere vitiviti te haapiiraa i mua ia haapii tatou teie buka ia vetahi ê, mai te peu iho â râ e mea iti aore ra aita roa ˈtu e ite bibilia to ratou. (Ohi. 26:28, 29) I roto i te mau haapiiraa bibilia i te fare, e mea titauhia ia tauaparau hohonu atu â tatou i te mau irava, ia faataa i te mau faahohoˈaraa e te vai ra ˈtu â. No reira, a haamau ei fa na outou te haereraa i te mau hebedoma atoa e te apiti-roa-raa i ta tatou haapiiraa i te buka Eaha ta te Bibilia e haapii mau ra?