E nafea ia haamata i te haapiiraa i nia i te buka Bibilia haapii
E oaoa e rave rahi o tatou i te faatere i te hoê haapiiraa bibilia mai te peu noa ïa e e nehenehe tatou e haamata i te haapiiraa. E nehenehe te buka apî Eaha ta te Bibilia e haapii mau ra? e tauturu ia tatou. Ua faanahohia te omuaraa parau i te mau api 3-7 no te aratai i te fatu fare i roto i te hoê aparauraa bibilia ma te faaohipa i te buka. E ite atoa te feia e ere i te mea aravihi i roto i te taviniraa e e mea ohie te reira ia faaohipa no te haamata i te mau haapiiraa.
◼ E nehenehe outou e tamata i teie raveraa ma te faaohipa i te api 3:
I muri aˈe i te faahitiraa i te hoê parau apî aore ra i te hoê fifi o te haapeapea ra i te taata o ta outou tuhaa fenua, a huti i te ara-maite-raa o te fatu fare i nia i te mau uiraa i papai-meumeu-hia i te api 3, e a titau manihini ia ˈna ia horoa i to ˈna manaˈo. E a huri i te mau api 4-5.
◼ Aore ra mea au aˈe paha na outou e haamata ma te haamahitihiti i te mau api 4-5:
E nehenehe outou e parau, “E ere anei i te mea faahiahia ahiri i tupu iho â te mau tauiraa i penihia i ǒ nei?” Aore ra e nehenehe outou e ui atu, “Teihea o tera mau parau fafau ta oe e hinaaro e ite ia tupu?” A faaroo maite atu i te pahonoraa.
Mai te peu e e faaite te fatu fare i te hoê anaanatae taa ê no te hoê o te mau irava, a faaite atu ia ˈna eaha ta te Bibilia e haapii ra no nia i tera tumu parau ma te hiˈo i te mau paratarafa o te buka o te faahiti ra i tera parau. (A hiˈo i te tumu parau tarenihia o teie api.) A hiˈo i te tumu parau mai ta outou e rave no te hoê haapiiraa bibilia. E nehenehe te reira e ravehia i roto e pae e tae atu hoê ahuru minuti i te farereiraa matamua i te pae opani.
◼ Te tahi atu raveraa, o te faaitoitoraa ïa i te taata ia paraparau ma te faaohipa i te api 6:
A huti i te ara-maite-raa o te fatu fare i nia i te mau uiraa i raro i te api, e a ani atu, “Ua ui aˈena anei oe i te tahi o tera mau uiraa?” Mai te peu e e anaanatae oia i te hoê o tera mau uiraa, a haere atu i te mau paratarafa o te buka e pahono ra i te uiraa. (A hiˈo i te tumu parau tarenihia o teie api.) A hiˈopoa amui ai outou i te mau manaˈo, te faatere ra ïa outou i te hoê haapiiraa bibilia.
◼ E nehenehe te api 7 e faaohipahia no te faaite i te tereraa o te hoê haapiiraa bibilia:
A taio i na pereota matamua e toru o te api, a haere atu i te pene 3, e a faaite i te tereraa o te hoê haapiiraa ma te faaohipa i te mau paratarafa 1-3. A faanaho i te hoˈi e tauaparau i te mau pahonoraa i te mau uiraa o te paratarafa 3.
◼ E nafea ia faanaho i te hoˈi e farerei:
Ia faaoti te haapiiraa matamua, a faanaho i te tamau â i te aparauraa. E nehenehe noa outou e parau e: “I roto tau minuti noa, ua hiˈo mai tâua eaha ta te Bibilia e haapii ra no nia i te hoê tumu parau faufaa. I mua nei, e nehenehe tâua e tauaparau [a vaiiho i te hoê uiraa e hiˈopoahia]. E nehenehe anei au e haere mai i teie iho â hora i teie hebedoma i mua?”
A fatata ˈi tatou i te taime faataahia e Iehova, te tamau nei oia i te faaineine ia tatou no te ohipa e mea tia ia rave tatou. (Mat. 28:19, 20; Tim. 2, 3:17) E faaohipa maitai anaˈe i teie mauhaa apî faahiahia no te haamata i te mau haapiiraa bibilia.
[Tumu parau tarenihia i te api 3]
Aparauraa i nia i te mau irava o te mau api 4-5
◻ Apokalupo 21:4 (api 27-8, par. 1-3)
◻ Isaia 33:24; 35:5, 6 (api 36, par. 22)
◻ Ioane 5:28, 29; MN (api 72-3, par. 17-9)
◻ Salamo 72:16; MN (api 34, par. 19)
Pahonoraa i te mau uiraa o te api 6
◻ No te aha tatou e mauiui ai? (api 108-9, par. 6-8)
◻ E nafea tatou e nehenehe ai e faaruru i te mau tapitapi o te oraraa? (api 184-5, par. 1-3)
◻ E nafea to tatou oraraa utuafare e oaoa ˈtu â ˈi? (api 142-3, par. 20)
◻ Eaha te tupu i nia ia tatou ia pohe tatou? (api 58-9, par. 5-6)
◻ E farerei faahou anei tatou i to tatou feia here i pohe? (api 72-3, par. 17-9)
◻ E nafea tatou e papu ai e e faatupu te Atua i ta ˈna mau parau fafau no a muri aˈe? (api 25, par. 17)