E haamata anei oe i te hoê haapiiraa Bibilia i Atopa?
1. Eaha te pûpûhia i Atopa?
1 O Te Pare Tiairaa e te Réveillez-vous! te pûpûhia i Atopa. No te atuatu i te anaanatae o te taata, te faaitoitohia ra tatou ia faaite i te api parau E hinaaro anei oe e ite i te parau mau? e ia tutava i te haamata i te hoê haapiiraa Bibilia. E nafea ïa ia farerei faahou tatou i te taata?
2. E nafea ia faaohipa i te api parau Ite i te parau mau no te haamata i te haapiiraa e te hoê taata i rave na i te mau vea?
2 E nafea ia faaohipa i te api parau? E parau paha tatou: “Te faaitoito ra te mau vea ta ˈu i vaiiho atu i te mau taata o te mau huru oraraa e haapaoraa atoa ia hiˈopoa i te Bibilia. [A horoa ˈtu i te api parau Ite i te parau mau e a faaite i te mau uiraa i te api matamua.] Teie te tahi mau uiraa faufaa ta te Bibilia e pahono mau ra. Ua ui aˈena anei oe i te tahi o teie mau uiraa?” I muri aˈe i to te taata faaiteraa mai i to ˈna manaˈo, a hiˈo e o ˈna i te pahonoraa o ta ˈna uiraa i nia i te api parau, e a taio i te hoê irava faahitihia. E a faataa e o te hoê noa hiˈoraa teie ta te Bibilia e haapii ra, e a horoa ˈtu i te buka Bibilia haapii. E nehenehe i muri iho e hiˈopoa i te mau paratarafa matamua o te pene ta ˈna i maiti i roto i te tapura tumu parau. Aore ra e nehenehe e rave i te hoê pene o te faahohonu ra i te tumu parau o te api parau ta tatou i hiˈopoa. Teie te tahi mau hiˈoraa:
● Te tapitapi mau ra anei te Atua ia tatou? (api 9-11 par. 6-10)
● E ore anei te tamaˈi e te mauiui? (api 12 par. 12-13)
● Eaha te tupu mai ia pohe tatou? (api 59-60 par. 7-8)
● E tiaturiraa anei to tei pohe? (api 71 par. 13-15)
● E nafea vau e pure ai e e faaroohia ˈi e te Atua? (api 166-167 par. 5-8)
● E nafea vau e oaoa ˈi i te oraraa nei? (api 9 par. 4-5)
3. E nafea ia faatano i nia i te mau tupuraa?
3 Parau mau, mai te peu e no te mau tupuraa eita e nehenehe e haamata i te haapiiraa e te buka Bibilia haapii i te farerei-faahou-raa matamua, e hoˈi noa ˈtu ïa tatou no te tamau i te aparauraa. Ia au i te anaanatae o te taata, e nehenehe e aparau i nia i te tahi atu mau uiraa o te api parau e rave rahi taime hou a haamata ˈi i nia i te buka. E faaohipa maitai anaˈe ïa i teie api parau faufaa i Atopa no te haamata i te hoê haapiiraa Bibilia e no te tauturu i te feia aau haavare ore ia ‘ite i te parau mau.’—Ioa. 8:31, 32.