A tamau i te faatupu i te maitai te tahi i te tahi
1 Ua rave te aposetolo Paulo i tei nehenehe atoa ia ˈna no te faaitoito i to ˈna mau hoa Kerisetiano. (Ohi. 14:19-22) Oia atoa, e tapitapi tatou i to tatou mau taeae i roto i te mau tupuraa fifi, e e hinaaro tatou e tauturu ia ratou. Te faataa ra te Bibilia e e mea tia ia anaanatae tatou pauroa, e eiaha noa te mau matahiapo, i te tahi atu. (Roma 15:1, 2) E hiˈo mai tatou e piti ravea no te haapao i teie faaitoitoraa î i te here: “E haamahanahana outou ia outou iho, e e faatupu i te maitai te tahi i te tahi.”—Tes. 1, 5:11.
2 A haroaroa i to ratou mau hinaaro: Te faatia ra te Parau a te Atua e “e rahi ta [Doreka] ohipa maitai i rave, e te horoa hoi i te taoˈa.” (Ohi. 9:36, 39) Ma te ite i te feia e hinaaro ra i te tauturu, ua rave o ˈna i tei nehenehe ia ˈna no te tauturu ia ratou. Auê ïa hiˈoraa nehenehe mau no tatou! Te hinaaro ra anei te hoê taata ruhiruhia ia faahorohia oia i te mau putuputuraa? Te poro ra anei te hoê pionie e o ˈna anaˈe i te hoê taperaa mahana i te hebedoma? Ia haroaroa outou i tera hinaaro i nia i to outou mau hoa e ia pûpû atu i te hoê tauturu e au, a feruri na e e faaitoito roa ïa outou ia ratou!
3 Te mau tauaparauraa pae varua: E nehenehe atoa tatou e faatupu i te maitai na roto i ta tatou mau parau i te feia e haaati ra ia tatou. (Eph. 4:29) Ua faataa te hoê matahiapo aravihi e: “Mai te peu e e hinaaro outou e faaitoito, a paraparau no nia i te mau tumu parau pae varua. No te haamata i te hoê tauaparauraa o te patu, e nehenehe outou e ui noa: ‘Mea nafea oe i te iteraa i te parau mau?’” A anaanatae ma te haavare ore i te feia apî o te amuiraa. A haere atu e farerei i te feia toaruaru e te feia mamahu. (Mas. 12:25) Eiaha e vaiiho i te mau parau no nia i te faaanaanataeraa a teie nei ao ia haafifi i ta outou mau tauaparauraa maitatai pae varua e to outou mau hoa.—Roma 1:11, 12.
4 Eaha râ te nehenehe e parau no te faatupu i te maitai i nia i te hoê taata? Ua ite anei outou aita i maoro aˈenei, i roto i ta outou taioraa e ta outou iho haapiiraa i te Bibilia, i te hoê faaueraa tumu o tei faarahi i to outou mauruuru ia Iehova? Ua faaitoitohia anei outou e te hoê manaˈo o te hoê oreroraa parau no te taatoaraa aore ra te hoê haapiiraa o Te Pare Tiairaa? Ua haapuaihia anei to outou faaroo e te hoê tupuraa putapû? Mai te peu e mea poihere na outou tera mau taoˈa nehenehe pae varua, e mau parau faaitoito noa ïa ta outou e parau atu i te tahi atu.—Mas. 2:1; Luka 6:45.
5 Ma te pûpû atu i te hoê tauturu e au e ma te faaohipa maitai i to tatou arero, e tamau tatou i te faatupu i te maitai te tahi i te tahi.—Mas. 12:18.