A faaitoito te tahi i te tahi i roto i te taviniraa
1 Mea au na tatou paatoa e fanaˈo i te hoê ‘parau faaitoito ia parauhia i te taime mau ra.’ (Mas. 25:11) Ia ohipa tatou e te tahi atu i roto i te taviniraa, e nafea e papu ai ia tatou e e faaitoito ta tatou aparauraa ia ratou?
2 Aparauraa faaitoito: E mea maitai mau â ia faaô i te mau tumu parau pae varua i roto i ta tatou aparauraa a poro ai tatou! (Sal. 37:30) E nehenehe tatou e paraparau i nia i ta tatou faaiteraa aore ra e faatia i te tahi mau tupuraa faaitoito i roto i te taviniraa ta tatou i fanaˈo aˈenei. (Ohi. 15:3) Ua huti mai anei tatou i te hoê manaˈo anaanatae i roto i ta tatou iho taioraa i te Bibilia, i te mau vea apî, aore ra i te hoê putuputuraa a te amuiraa? E nehenehe tatou e paraparau i nia i te mau manaˈo i vauvauhia i roto i te hoê oreroraa parau no te taatoaraa ta tatou i faaroo aˈenei i te Piha a te Basileia.
3 E toaruaru paha tatou ia faahiti te hoê fatu fare i te hoê patoiraa aita i noaa ia tatou ia pahono. E mea maitai mau â no tatou ia rave maa minuti i muri aˈe i te vaiihoraa i te fatu fare no te aparau e to tatou apiti e nafea ia pahono atu a muri aˈe, ma te hiˈo paha i te buka Haaferuriraa. E mai te peu e ua au tatou i te tahi mea i roto i te faaiteraa a to tatou apiti, e nehenehe tatou e faaitoito ia ˈna ma te haapopou atu ma te haavare ore.
4 Na oe e haamata: Te vai ra anei, i roto i ta tatou haapiiraa buka, vetahi aita tatou i poro aˈenei e o ratou? E nehenehe te aniraa i te hoê ia apee ia tatou i roto i te taviniraa e ‘haamahanahana ia tatou e ia ˈna atoa.’ (Roma 1:12) E mauruuru te mau pionie tamau e tauturu ia ohipa ratou e te tahi atu, i te poipoi roa iho â râ aore ra i te ahiahi, i te taime e mea iti te taata poro i roto i te taviniraa. E nehenehe tatou e turu i te mau pionie ma te haavata ia tatou iho. Te vai ra anei te hoê taata poro maˈimaˈi tei taotiahia i roto i tei maraa ia ˈna ia rave i roto i te taviniraa? E nehenehe te raveraa ia ˈna na muri ia tatou, i roto paha i te hoê haapiiraa bibilia, e haamaitai ia ˈna e ia tatou atoa.—Mas. 27:17.
5 I roto atoa i te mau mea rii, e mea faaitoito noa iho â te haapopouraa e te mau faaiteraa i te mauruuru. I te mea e te hinaaro nei tatou e ‘faatupu â i te maitai te tahi i te tahi,’ ia haamanaˈo tatou i te reira ia poro tatou e te tahi atu e tia ˈi.—Tes. 1, 5:11.