E tauturu anaˈe i te taata ia “auraro ma te aau atoa”
1. Eaha ta Iehova e titau ra i to ˈna feia haamori?
1 E mea faufaa te auraroraa no te haamori ia Iehova ma te tano. (Deut. 12:28; Pet. 1, 1:14-16) Ua fatata ta te Atua faautuaraa i te tae mai i nia i “te feia aore i ite i te Atua, e tei ore i [auraro] i te evanelia.” (Tes. 2, 1:8; MN) E nafea tatou e nehenehe ai e tauturu i te taata ia “[auraro] ma te aau atoa” i te mau haapiiraa o te Parau a te Atua?—Roma 6:17; MN.
2. No te aha e mea faufaa ˈi ia tauturu i te taata ia patu i te hoê faaroo puai?
2 Ma te tauturu ia ratou ia patu i to ratou faaroo e to ratou here: I roto i te mau Papai, e taairaa piri roa to te auraroraa e te faaroo. Ua parau te aposetolo Paulo i ‘te faaue a te Atua pohe ore ra ia noaa te haapao faaroo ra.’ (Roma 16:26) Te faahiti ra te Hebera pene 11 e rave rahi hiˈoraa o te faaroo, mea rahi tei ohipa ia au i to Iehova hinaaro i faahitihia. (Heb. 11:7, 8, 17) I te tahi aˈe pae, ua taaihia te auraro-ore-raa i te ereraa i te faaroo. (Ioa. 3:36; Heb. 3:18, 19) E mea titauhia ia faarahi tatou i te aravihi i te faaohiparaa i ta te Atua Parau; e nehenehe ïa tatou e tauturu i te taata ia atuatu i te huru faaroo o te faatupu i te auraroraa.—Tim. 2, 2:15; Iak. 2:14, 17.
3. (a) Mea nafea te auraroraa i taaihia ˈi i te here? (b) E nafea ia tauturu i te mau piahi Bibilia ia faarahi noa i to ratou here ia Iehova?
3 Ua taai-atoa-hia te auraroraa i te hinaaro, aore ra here, i te Atua. (Deut. 5:10; 11:1, 22; 30:16) “Teie hoi te hinaaro i te Atua,” ta Ioane 1, 5:3 e parau ra, “o te haapao i ta ˈna ra parau: e ere hoi ta ˈna parau i te mea teimaha.” E nafea ia tauturu i te feia e haapii ra i te Bibilia ia faarahi noa i to ratou here ia Iehova? E imi anaˈe i te mau taime maitatai i te roaraa o te haapiiraa, no te faarahi i to ratou mauruuru no to Iehova mau huru maitai. E faaite anaˈe i to tatou mau huru aau hohonu no te Atua. E tauturu anaˈe i te mau piahi ia feruri e nafea ratou e nehenehe ai e faatupu i te hoê taairaa piri roa e o Iehova. Hau atu i te tahi atu mea, e turai te here ia Iehova ia vetahi ê—oia atoa ia tatou iho nei—ia auraro ia ˈna ma te aau atoa.—Mat. 22:37.
4. (a) No te aha e mea faufaa ˈi to tatou hiˈoraa? (b) Eaha te titauhia ia rave tatou no te atuatu i te hoê “aau ite”?
4 Na roto i to tatou hiˈoraa: Te hoê ravea maitai roa no te faaitoito i te hoê taata ia auraro i te parau apî maitai, o to tatou ïa hiˈoraa. E mea tia ia tutava tamau tatou i te atuatu i te hoê “aau ite.” (Arii 1, 3:9; Mas. 4:23) Eaha ta te reira e titau? E faaî anaˈe i to tatou aau i te maa varua na roto i te haapii-tamau-raa i te Bibilia e te taeraa i te mau putuputuraa. (Sal. 1:1, 2; Heb. 10:24, 25) E amui anaˈe i te feia aau taatoa i roto i te haamoriraa mau. (Mas. 13:20) E ohipa tamau anaˈe i roto i te taviniraa, ma te hinaaro rotahi e tauturu i te taata atoa o te tuhaa fenua. E pure anaˈe ia Iehova no te aratai ia tatou i te faatupuraa i te hoê aau maitai. (Sal. 86:11) E haapae anaˈe i te mau mea e nehenehe e faaino i to tatou aau, mai te mau faaanaanataeraa morare ore aore ra haavî uˈana. E aruaru anaˈe i te mau mea e haafatata ˈtu ia tatou i te Atua e e haapaari i to tatou taairaa e o ˈna.—Iak. 4:7, 8.
5. Eaha te mau haamaitairaa ta te feia auraro ma te aau atoa e ite ra?
5 Ua haapapu o Iehova i ta ˈna mau tavini i tahito ra e e vai mau te mau haamaitairaa i nia ia ratou ia faaroo noa ratou i to ˈna reo. (Deut. 28:1, 2) Oia atoa, i teie mahana, te haamaitai rahi ra Iehova i “te feia i faaroo ia ˈna ra.” (Ohi. 5:32) No reira, na roto i ta tatou haapiiraa e to tatou hiˈoraa, e tauturu anaˈe i te taata ia auraro ma te aau atoa.